وبلىستىق قوعامدىق دامۋ باسقارماسىنىڭ «قوعامدىق تاماقتاندىرۋ ورىندارىنداعى اس مازىرلەرىنىڭ مەملەكەتتىك تىلدەگى لينگۆيستيكالىق بازاسىن قالىپتاستىرۋ» اتتى الەۋمەتتىك جوباسى شەڭبەرىندە زەرتتەۋ جۇرگىزگەن قورقىت اتا اتىنداعى قىزىلوردا ۋنيۆەرسيتەتىنىڭ عالىمدارى الداجار ءابىلوۆ, امان اباسيلوۆ, بولات بورانباي, ەربول بەكىش ازىرلەگەن «مەملەكەتتىك تىلدەگى اس ءمازىرى مەن تاعام تۇرلەرى: قازىرگى جاعدايى, پروبلەمالارى» اتتى مونوگرافيا-انىقتامالىق پەن «تاعام اتاۋلارى» اتتى سوزدىك ەل بويىنشا وسى باعىتتاعى العاشقى ەڭبەك بولىپ وتىر.
ءتىل جاناشىرلارى مەن وبلىستىق كاسىپكەرلىك پالاتا باسشىلىعى, قورقىت اتا اتىنداعى قىزىلوردا ۋنيۆەرسيتەتى ماگيسترانتتارىنىڭ قاتىسۋىمەن وبلىستىق جاستار رەسۋرستىق ورتالىعىندا وتكەن ءىس-شارادا وبلىستىق قوعامدىق دامۋ باسقارماسى باسشىسىنىڭ ورىنباسارى ارتۋر قامباروۆ قازاق توپىراعىنا العاش اياق باسىپ كەلگەن شەتەل ازاماتى الدىمەن كورنەكى اقپاراتتارعا, جارنامالار مەن اس مازىرىنە نازار اۋدارىپ, سول ارقىلى ەل تۋرالى پىكىر قالىپتاستىراتىنىن اتاپ ءوتتى.
– سوندىقتان مۇنى قوعامدىق-ساياسي, الەۋمەتتىك-ەكونوميكالىق جاعدايعا اسەر ەتەتىن فاكتور رەتىندە قاراۋىمىز كەرەك. جوبا اياسىندا جەرگىلىكتى عالىمدارىمىز كوپ ەڭبەكتەندى. وسىنىڭ ارقاسىندا ەلىمىزدە العاش رەت قوعامدىق تاماقتانۋ ورىندارىندا اس ءمازىرىن مەملەكەتتىك تىلدە ۇسىنۋ بازاسى جاسالدى, – دەدى ول.
مونوگرافيا-انىقتامالىق پەن سوزدىكتىڭ تانىستىرىلىم راسىمىندە فيلولوگيا عىلىمدارىنىڭ كانديداتتارى الداجار ءابىلوۆ پەن امان اباسيلوۆ انىقتامالىق پەن سوزدىكتە قامتىلعان ماسەلەلەرگە توقتالدى. عالىمداردىڭ زەرتتەۋىنشە, وبلىس اۋماعىنداعى قوعامدىق تاماقتاندىرۋ ورىندارىنداعى اس مازىرلەرىنىڭ 80 پايىزى ورىس تىلىندە, قالعان 20 پايىزى قازاق-ورىس تىلدەرىندە جازىلعاندىعى انىقتالىپتى.
امان ءاباسيلوۆتىڭ ايتۋىنشا, اۋەلى قازاقشا-ورىسشا ازىرلەنگەن سوزدىك تۇتىنۋشىلار ىڭعايىنا بايلانىستى ورىسشا-قازاقشا دا دايىندالدى. ەڭبەكتى دايىنداۋ بارىسىندا بۇرىن-سوڭدى تەرمينولوگيالىق كوميتەت بەكىتپەگەن 2052 ءسوز وبلىستىق قوعامدىق دامۋ باسقارماسى ارقىلى مەملەكەتتىك تەرمينولوگيا كوميسسياسىنا ۇسىنىلىپتى.
تانىستىرىلىمدا «قازاق ءتىلى» قوعامىنىڭ وبلىستىق فيليالى توراعاسى سادۋاقاس اڭسات, وبلىستىق كاسىپكەرلەر پالاتاسىنىڭ ديرەكتورى پىرمۇحاممەد سىزدىق, قوعامدىق تاماقتانۋ قاۋىمداستىعىنىڭ توراعاسى اقمارال ابدىرازاقوۆا پىكىر ءبىلدىرىپ, ەلگە كەرەكتى ەڭبەكتى ناسيحاتتاۋ جۇمىستارىن كۇشەيتۋدى ۇسىندى.
قىزىلوردا
