دۋلات تاستەكەيدى كوپشىلىك قازاق ءتىلىنىڭ جاناشىرى رەتىندە تانيدى. ول ءوزى باسقاراتىن كومپانيادا قىزمەتكەرلەردىڭ قازاق تىلىندە سويلەۋىن تالاپ ەتىپ, ءىس-قاعازداردى قازاقشالاعان.
«مەن ەل پرەزيدەنتى قاسىم-جومارت كەمەل ۇلىنىڭ باستاماسىن قولداپ, جاڭادان قۇرىلعان Qazaq Tili Endowment قورىنا ASSYLTAS قوعامدىق قورىنان 100 ملن تەڭگە اۋداراتىنىمدى حابارلايمىن. قازاقتىڭ ءبىرتۋار اقىنى ماعجان جۇماباەۆ: «ۇلتقا تىلىنەن قىمبات نارسە بولماق ەمەس, ءبىر ۇلتتىڭ تىلىندە سول ۇلتتىڭ سىرى, تاريحى, تۇرمىس-تىرشىلىگى, مىنەزى ايقىن كورىنىپ تۇرادى», دەگەن. دەمەك قاي سالادا قىزمەت ەتسەك تە, قانداي ءتىلدى ۇيرەنسەك تە ءبىزدىڭ باستى بايلىعىمىز قازاق ءتىلى بولماق. قازاق ءتىلى ولمەيدى, ماڭگى جاسايدى», دەدى دۋلات تاستەكەي.
بۇل قوردىڭ باستى مىندەتى – مەملەكەتتىك ءتىلدى قولداۋ جانە دامىتۋمەن اينالىساتىن ەلىمىزدەگى ەڭ ءىرى ۇيىم – «قازاق ءتىلى» قوعامىنىڭ تۇراقتى ءارى ۇزاقمەرزىمدى دامۋىن قامتاماسىز ەتۋ.
ەنداۋمەنت قورىنىڭ ەرەكشەلىگى – قورعا جينالعان قارجى جۇمسالمايدى. قورداعى قاراجات باسقارۋعا بەرىلەدى جانە ينۆەستيتسياعا قۇيىلادى. ينۆەستيتسيالىق قىزمەتىنەن تۇسكەن تابىس «قازاق ءتىلى» قوعامىنىڭ جارعىلىق مىندەتتەرىنە جۇمسالادى.
QAZAQ TILI Endowment قورىن بەدەلدى قوعام قايراتكەرلەرى, عالىم-لينگۆيستەر مەن مەملەكەت وكىلدەرىنەن قۇرالعان تاۋەلسىز قامقورشىلار كەڭەسى باقىلايدى.
ايتا كەتەيىك, 7 جەلتوقساندا ەڭ العاشقى بولىپ اتالعان قورعا جەكە قاراجاتىنان قازاقستان پرەزيدەنتى قاسىم-جومارت توقاەۆ 7 ملن تەڭگە اۋدارعان بولاتىن.
