قۇندى ەڭبەك 3 بولىمنەن, 22 عالىمنىڭ زەرتتەۋ جۇمىسىنان تۇرادى. تاعىلىمى مول جيناقتان م.ءجۇسىپوۆ, ت.جۇرتباي, د.ىسقاق ۇلى, د.الكەباەۆا, ع.بايتىلەۋوۆا, و.جۇباي, س.ءجۇسىپ, ا.سالقىنباي, تاعى دا باسقا اۆتورلاردىڭ زەرتتەۋىن كەزدەستىرۋگە بولادى.
كىتاپتىڭ نەگىزگى ماقساتى – الاش قايراتكەرلەرىنىڭ وزىق يدەيالارىن الىس-جاقىن شەتەلدەرگە دە تانىتىپ, ومىرشەڭ قازىناعا اينالدىرۋ. كىتاپتا الاش زيالىلارىنىڭ وقۋ-اعارتۋ, ءبىلىم, تاربيە جانە مادەنيەت ماسەلەلەرى بويىنشا قالدىرعان مۇرالارىن شەتەل عالىمدارىنىڭ تۋىندىلارىمەن سالىستىرا وتىرىپ تالدانعان عىلىمي ماقالالار توپتاستىرىلعان.
«ۋنيۆەرسيتەت – الاش ازاماتتارىن تاربيەلەيتىن جەر. ال الاشتىڭ ارىستارى ۇنەمى حالىقتىڭ ساۋاتىن اشۋعا تىرىسقانى اقيقات. سول سەبەپتى بۇگىن جۇرەگى قازاق دەپ سوعاتىن ءار ازاماتتان ءسۇيىنشى سۇرايمىن! ءبىز AlmaU-دىڭ 35 جىلدىق مەرەيتويىنا ارناپ «الاش قايراتكەرلەرىنىڭ وزىق يدەيالارى» اتتى عىلىمي جيناقتى دايىندادىق. الاش يدەياسى – حح عاسىر باسىنداعى قازاقتىڭ ۇلتتىق-مەملەكەتتىك يدەياسى, جاڭاشىلدىق پەن جاسامپازدىقتىڭ كوشباسشىسى بولدى. الاش مۇددەسى مەن يدەياسىنا ادالدىق قاشان دا قازاقستاننىڭ ساياسي, رۋحاني وركەندەۋى مەن ورىستەۋىنىڭ بارومەترى بولىپ قالماق. الاشوردانىڭ دۇنيەگە كەلگەن كۇنىمەن الماتى مەنەدجمەنت ۋنيۆەرسيتەتىنىڭ تۋعان كۇنىنىڭ سايكەس كەلۋى بىزگە ۇلكەن مىندەتتەر جۇكتەيدى. سوندىقتان دا ءبىز الاش قايراتكەرلەرى مەن ولاردىڭ ۇلى ىستەرىن زەرتتەپ, ناسيحاتتاۋدى ءارى قاراي جالعاستىرماقپىز. اعىلشىن تىلىنە اۋدارىپ, بۇكىل الەمگە تاراتۋ جوسپارى ويىمىزدا. وسىلايشا, الاش زيالىلارىنىڭ قايراتكەرلىك جولىن حالىقارالىق عىلىمي قاۋىمداستىققا تانىتۋدى كوزدەيمىز», دەپ اتاپ ءوتتى Almaty management university پرەزيدەنتى اسىلبەك قوجاحمەتوۆ.
ۇيىمداستىرۋ كوميتەتىنىڭ مۇشەسى, فيلولوگيا عىلىمدارىنىڭ دوكتورى مەڭدىگۇل شىڭداليەۆا جوباعا ەلىمىزدىڭ 5 قالاسىنان 10 جوعارى وقۋ ورنىنىڭ ماماندارى قاتىسقانىن ايتادى.
«الاش زيالىلارىنىڭ ەڭبەكتەرىن وقىپ وتىرىپ, ولاردىڭ ەجەلگى ريم, گرەكيا, ءۇندىستان مەن قىتاي ويشىلدارى مۇراسىمەن ەتەنە تانىس بولعانىن, سول ۇلىلاردىڭ دانالىقتارىنا قانىق بولعانىنا كوز جەتكىزەمىز. ءبىزدىڭ بايقاعانىمىز, الاش قۇندىلىقتارى ماحاتما گاندي, مارتين ليۋتەر كينگ, مۇستافا كەمالدىڭ كۇرەس جولىنداعى ۇندەۋلەرىمەن, ۇستانىمدارىمەن ۇشتاسىپ, الەمدىك ساياسي وقيعالارمەن تىعىز بايلانىسقان», دەيدى عالىم.
الماتى
