سۋرەتتى تۇسىرگەن – اۆتور
التاي تاۋ شاڭعى كلاستەرى ەلىمىزدىڭ تۋريستىك كارتاسىنىڭ توپ-50 ايماعىنىڭ تىزىمىنە ەنەدى. ەنسە, ەنگەندەي-اق. شىعىستاعى شاڭعى بازالارىنىڭ قاي-قايسىسىن الساق تا, سىرعاناق تەبەمىن دەگەن تۋريستەرگە جان-جاقتى جاعداي قاراستىرىلعان.
– قازىر وڭىردە قىسقى دەمالىس تۇرلەرىن دامىتۋعا ايرىقشا كوڭىل ءبولىنىپ جاتىر. جالپى, ءبىزدىڭ وبلىستا قىسقى سپورت تۇرلەرىن, قىسقى ءتۋريزمدى دامىتۋعا بارلىق العىشارت بار. اسىرەسە وبلىس ورتالىعىنىڭ ىرگەسىندەگى گلۋبوكوە اۋدانىن مىسال رەتىندە كەلتىرۋگە بولادى. بۇل اۋداندا ءبىر ەمەس, بىرنەشە دەمالىس بازاسى ورنالاسقان. وندا شاڭعى تەبۋدى, شانامەن سىرعاناۋدى ۇناتاتىندار ءۇشىن بارلىق جاعداي جاسالعان. بۇگىنگى ءىس-شاراعا جينالعاندار وسىعان تاعى ءبىر مارتە كوز جەتكىزە الدى, – دەيدى وبلىستىق تۋريستىك-اقپاراتتىق ورتالىعىنىڭ باسشىسى تالعات داۋلەتوۆ.
ءيا, بيىلعى قىسقى تۋريستىك ماۋسىمنىڭ اشىلۋ سالتاناتى ەرەكشەلىگىمەن قوناقتاردىڭ ەسىندە قالاتىن سياقتى. بۇل كۇنى وسكەمەننىڭ ىرگەسىندەگى «نۇرتاۋ» تاۋ شاڭعى بازاسىنا كەلگەن دەمالۋشىلار شاڭعى تەۋىپ, ستيۋبپەن سىرعاناپ قانا قويماي, يت شانامەن دە سەرۋەندەدى. تيردە مەرگەندىكتەرىن سىناپ, ءتۇرلى كونكۋرستارعا قاتىسۋعا مۇمكىندىك الدى. سونىمەن قاتار وڭىردەگى قولونەر شەبەرلەرى جاساعان بۇيىمداردىڭ كورمە-جارمەڭكەسى ۇيىمداستىرىلدى.
– دەمالىس كۇندەرى ءۇيدىڭ كۇيكى تىرلىگىن ىسىرا تۇرىپ, بالا-شاعامىزبەن دەمالۋدى داعدىعا اينالدىرىپ ءجۇرمىز. بۇگىن شاڭعى تەبۋگە كەلدىك. الاڭسىز دەمالىسقا ءتيىستى جاعدايدىڭ ءبارى جاسالعان, – دەيدى وسكەمەندىك نۇرجان كەنجە.
بۇدان بىلاي تاماشا تابيعات اياسىندا دەمالامىز دەگەن قالا تۇرعىندارىنا, قوناقتارعا شاڭعى بازالارىنىڭ ەسىگى ايقارا اشىق. شىعىستا شاڭعى تەبەمىن دەسەڭىز, تاڭداۋ كوپ.
شىعىس قازاقستان وبلىسى
