ۇلتتىق ۇلان ءباسپاسوز قىزمەتىنىڭ مالىمەتىنشە, 7 ءتىلدى مەڭگەرگەن سارباز «شىعىس» وڭىرلىك قولباسشىلىعىنا قاراستى №6699 اسكەري بولىمىنە الماتى قالاسىنان شاقىرىلعان. قاتارداعى جاۋىنگەر تۇركيادا ءبىلىم العان.
«مەن ورىس, اعىلشىن, تۇرىك, ازەربايجان, يسپان, فرانتسۋز, چەح تىلدەرىن بىلەمىن. ء«بىر ءتىل بىلگەن – ءبىر ادام, ەكى ءتىل بىلگەن – ەكى ادام» دەگەن ناقىل ءسوز بار. ءتىل ۇيرەنۋ ارقىلى سول ۇلتتىڭ مادەنيەتى جانە داستۇرىمەن تانىسۋعا بولادى. مەنىڭ پوليگلوت بولۋىما ەۋروپادا ءبىلىم الۋىم اسەر ەتتى. سەبەبى ول جاقتا ارالاسقان ادامدارىم كوپ ءتىلدى بىلەتىن», دەيدى باعجان بولات ۇلى.
ول مەرزىمدى اسكەري قىزمەتىن وتكەرگەننەن كەيىن اسكەري بولىمدە كەلىسىمشارت بويىنشا قىزمەت ەتپەك. قاتارداعى جاۋىنگەر اسكەري سالادا ءجۇرىپ تە شەت ءتىلىن مەڭگەرۋگە بولادى دەگەن پىكىردە. دارىندى پوليگلوت الداعى ۋاقىتتا جاپون, پارسى تىلدەرىن ۇيرەنۋگە پەيىلدى. ء«تىل ۇيرەنۋ بويىنشا جۇيەلى جوسپارلارىم جازىلعان قويىن داپتەرىم بار. بولاشاقتا كەمىندە 10 ءتىل بىلگىم كەلەدى», دەيدى جاس جاۋىنگەر.
