فوتو: اشىق دەرەكوز
– سوفيا روتارۋمەن سول كونكۋرسقا بارعاندا تانىستىڭىز عوي؟
– ءيا, وعان دەيىن نە اۋداندىق, وبلىستىق, قالالىق كونكۋرستىڭ بىرىنە دە قاتىسپاعان باسىم, ماسكەۋدەن ءبىر-اق شىعايىن. وزاعام, وزبەكالى جانىبەكوۆتىڭ تاباندىلىعى مەن ەرەن ەرلىككە پارا-پار قايراتكەرلىگىنىڭ ناتيجەسى عوي. ماسكەۋدە دايىندىق كەزىندە مولودوۆادان كەلگەن سوفيا روتارۋ, رەسەيدەن وپەرا ءانشىسى تامارا سينياۆسكايا جانە تاعى ءبىر قىز تورتەۋمىز ءبىر بولمەدە جاتتىق. ءبىر كۇنى ءتۇن ورتاسى اۋعاندا ەسىگىمىزدى قاقتى, اشساق مەنى ىزدەپ كەلىپتى. ءوزىن تانىستىرىپ «ەرتەڭگى ونەر بايقاۋىندا سەن بيلەمەيتىن بولدىڭ, ورنىڭا وزبەكستاننان كەلگەن ءبيشى شىعادى, سايىس وتەتىن سارايعا كەلمەسەڭ دە بولادى» دەپ كەتىپ قالدى. كونكۋرستىڭ شارتى بويىنشا قاتىسۋشىلاردىڭ ىرىكتەۋدەن ءوتىپ, فينالدىق تۋرعا جەتكەندەرى كەشىگىپ قالسا, يا بولماسا اۋىرسا, بىردەن سىزىلادى, ورنىنا باسقا ونەرپاز جىبەرىلەدى. ال مەندە ءبارى جاقسى, دايىندىعىم دا جوعارى. ەشقانداي سەبەپسىز جولىم بوگەلمەك. ەتەگىم جاسقا تولا جىلادىم. سوفيا روتارۋ بىلەگىمنەن تاس قىپ ۇستادى دا: «كىم سەنىڭ ەلىڭنەن جاۋاپتى؟ ءجۇر, سول كىسىگە بارامىز», – دەپ جاتاقحانادان شىعىپ, جارىم تۇندە ماسكەۋدىڭ كوشەسىندە جاياۋ جانىبەك اعا توقتاعان قوناقۇيگە قاراي تارتتىق. سوفيا ماعان قاراعاندا قالا كورگەن, بۇعان دەيىن دە تالاي كونكۋرستىڭ وتىنا دا, سۋىنا دا ءتۇسىپ ىسىلعان عوي. ال مەن اۋىلدىڭ ۇياڭ قىزىمىن, ء«بارى ءبىتتى, وسىمەن جولىم كەسىلدى» دەپ ۋايىمعا سالىنىپ ىلەسىپ كەلەم. ءار رەسپۋبليكانىڭ كومسومول حاتشىلارى توقتاعان قوناقۇيدە تىنىعىپ جاتقان وزبەكالى جانىبەكوۆتىڭ ەسىگىن قاقتىق. ءبىزدىڭ قوبالجىعان ءتۇرىمىزدى كورىپ شوشىپ كەتتى. مەن كوز جاسىمدى كولدەتە بولعان جايتتى كومەيىمە وكسىك تىعىلىپ ازەر جەتكىزدىم. اعانىڭ ءتۇرى بۇزىلىپ, قانى باسىنا شاۋىپ شىعا كەلدى. «قانە كەتتىك, مەن ولارعا كورسەتەيىن» دەپ ۇشەۋمىز بلكجو ورتالىق كوميتەتىنىڭ ءبىرىنشى حاتشىسى ەۆگەني تياجەلنيكوۆتىڭ بولمەسىنە باردىق. ءبىز سوفيا ەكەۋمىز ەسىك اۋزىندا قالدىق تا, جانىبەك اعا ەۆگەني ەكەۋى ارعى بولمەدە سويلەستى, داۋىستارى ۇدەپ بارادى. وزبەكالى اعا ءار سويلەگەن سايىن تارس-تارس ەتىپ ستولدى ۇرعانى دا ەستىلىپ تۇردى. كوپ ۇزاعان جوق قايتا شىقتى دا: «سەن الاڭداماي دەمالا بەر, ەرتەڭ بيلەيسىڭ, ونەرىڭدى كورسەتەسىڭ, ەشكىم كەدەرگى بولمايدى», – دەپ كوڭىلىمدى باستى. ە.تياجەلنيكوۆ تە قامقورلىق تانىتىپ, ەشكىم توسقاۋىل بولمايتىنىن, مەنىڭ بيلەيتىنىمدى ايتتى. بولمەمىزگە كەلگەن سوڭ قايدان ۇيقى كەلسىن, تاڭ اتقانشا دوڭبەكشىپ شىقتىم. ەگەر سول كەزدە سوفيا روتارۋ باتىلدىق تانىتپاسا, مەنىڭ كونكۋرسقا قاتىسپاي قالۋىم دا بەك مۇمكىن ەدى.
– كونكۋرستا بيلەدىڭىز عوي.
– ءيا ونەرىمدى كورسەتىپ, كۇمىس مەدال يەلەندىم. «ايجان قىز» ءبيىن بار ونەرىمدى سالا بيلەدىم. ساحنالىق كيىمىمدى وزبەكالى اعا قولى ىسمەر مەن دەگەن شەبەرلەرگە تىكتىرىپ بەردى. سوفيا روتارۋ ەسترادا جانرى بويىنشا جەڭىمپاز اتاندى, تامارا سينياۆسكايا وپەرادان جەڭىمپاز بولدى. جاڭا ايتقانىمداي, بۇعان دەيىن نە اۋداندىق كونكۋرسقا قاتىسپاعان تالپاقوۆانىڭ داڭقى بىردەن دۇركىرەپ الا جونەلدى. بۇكىل وداققا تارايتىن «وگونەك» جۋرنالىنىڭ مۇقاباسىنا مەنىڭ سۋرەتىم باسىلدى. اۋعانستاننىڭ جۋرنالىنا دا شىعاردى, باسقا دا ەلدەردىڭ ءباسپاسوزى قازاقتىڭ ءبيشى قىزى گۇلجان تالپاقوۆا تۋرالى جارىسا جازدى. وكىنىشتىسى, پاتەرىمىز ورتەنگەندە ارحيۆىمدەگى كوپتەگەن قۇندى جادىگەرلەر جانىپ كەتتى.
مەنىڭ جۇلدىزىمنىڭ جارقىراۋىنا وزبەكالى اعا وسىلاي ەڭبەك ءسىڭىرىپ, جولىمدى اشتى. كونكۋرستان كۇمىس جۇلدە العاننان كەيىن داڭقىم دا دۇركىرەدى. 31 جاسقا شىققانىمدا قازاقستاننىڭ حالىق ءارتيسى اتاعى بەرىلدى.
– سوفيا روتارۋمەن سول كونكۋرستان كەيىن دە بايلانىسىپ تۇردىڭىز با, قازىر حات-حابار الماساسىز با؟
– قۇربى اتانىپ ارالاستىعىمىز بەرتىنگە دەيىن جالعاستى. سوڭعى رەت الماتىعا كونتسەرت قويىپ كەلگەندە جۇزدەستىك, ودان كەيىن جولىمىز تۇيىسپەدى. ەكى رەت گاسترولدىك ساپارمەن كەلگەندە رەسپۋبليكا سارايىنداعى كونتسەرتىن تاماشالادىق. ۇيگە شاقىرىپ قوناق ەتتىك. بۇگىنگى كۇندە جاسىراتىنى جوق, تەلەفونمەن دە سويلەسۋدىڭ قيسىنى كەلمەي كەتتى. قازىر ەندى «بايتال تۇگىل باس قايعى», دەنساۋلىعىم سىر بەرىپ, اۋرۋحانانىڭ ەسىگىن ءجيى اشاتىن بولدىم.
وسىدان 55 جىل بۇرىن وتكەن وسى كونكۋرستا ارمەنيانىڭ حالىق ءارتىسى لەونيد ەنگيباروۆ, بالەتمەيستەر نيكولاي بارىشنيكوۆ سىندى تۇلعالارمەن دە تانىسىپ دامدەس بولعانىما تاۋبە دەيمىن. قازاقتىڭ بي ونەرىنىڭ ورلەۋىنە پەرزەنتتىك ۇلەسىمدى قوسقانىما ماقتانامىن.
