Kazinform تىلشىسىنە سۇحبات بەرگەن جەلتوقسانشى باتىس قازاقستان وبلىسىنداعى تالدىاپان اۋىلىندا دۇنيەگە كەلگەنىن ايتادى. مەكتەپتى اياقتاعان سوڭ الماتىداعى گاگارين اتىنداعى تىگىن فابريكاسىنا جۇمىسقا ورنالاسادى. جۇمىس ىستەپ ءجۇرىپ تەحنولوگيالىق ينستيتۋتقا سىرتتاي وقۋعا تۇسەدى.
– 16 جەلتوقسان كۇنى ادەتتەگىدەي جۇمىسقا كەلدىم. جۇمىستا ابىر-سابىر بولىپ جاتىر. فابريكادا كوپ ۇلتتىڭ وكىلدەرى جۇمىس ىستەدى. ولاردىڭ ىشىندە جاقسىسى دا, جامانى دا بار ەدى. بارىنە بىردەي كۇيە جاققىم كەلمەيدى. بىراق قازاق قىزدارىنا دەگەن قىسىمدى سەزىپ جۇردىك. سول كۇنى ماعان ءتيىستى. «سەن نەگە جۇمىسقا كەلدىڭ؟ قازاقتار بالاباقشالاردى ورتەپ, الاڭدا شۋ شىعارىپ جاتىر. تەز كەت, ايتپەسە, ميليتسيا شاقىرامىز», دەدى. سودان مەن تسەحتاردى ارالاپ, باراتىن قىزداردى جينادىم. قاراساق, ەسىكتەردى جاۋىپ تاستاپتى. ءبىز ەكىنشى قاباتتىڭ تەرەزەسىنەن سەكىرىپ ءتۇسىپ, الاڭعا قاراي بەت الدىق. كەلسەك, ءار جەردە توپتاسقان ادامدار تۇر. ءبارىنىڭ كوڭىل-كۇيى جوق. الاڭدا تۇنگى ساعات ۇشكە دەيىن جۇردىك. جاستار كەلىپ جاتىر. ءبىزدىڭ قارنىمىز اشتى, توڭدىق. سودان قاسىمداعى قىزدارمەن سولار جالداپ تۇراتىن ۇيگە كەتىپ قالدىم, - دەيدى اقكۇمىس ىقىلاسوۆا.
ونىڭ سوزىنە قاراعاندا, 17 جەلتوقسان كۇنى الاڭعا لەك-لەگىمەن اعىلعان جاستار توبى بەيبىت شەرۋ ارقىلى ورتالىقتىڭ كادر ساياساتىن دۇرىس جۇرگىزبەي وتىرعاندىعىنا نارازىلىق بىلدىرگەن. ۇلت ساياساتىن دۇرىس جۇرگىزۋدى, ۇلتتىق ءتىل مادەنيەتىنىڭ دامۋىنا قامقورلىق جاساۋدى, ۇلتتىق ساياسي قايراتكەرلەردىڭ باسشىلىق ورىندارىندا لايىقتى لاۋازىمعا يە بولۋىنا نازار اۋدارۋدى تالاپ ەتكەن.
– ءبىر كەزدە ايقاي-شۋ باستالىپ كەتتى. الدىمىزدان ارتقا قاراي ىعىستىرىلعان كەزدە, قۇلاپ قالعاندارعا شالىنىپ مەن دە اياقتىڭ استىندا تاپتالىپ قالدىم. ءبارى شىم-شىتىرىق بولىپ كەتتى. ءورت ماشيناسى سۋىق سۋ شاشتى, سوققىلار الدىق. سوندا دا ءجۇرمىز. بىزگە ءتىپتى قاشۋعا مۇمكىندىك تە بولمادى. قورشاۋدا قالدىق.
سول كۇنگى مۇزدى ايازدى سوزبەن ايتىپ جەتكىزۋ مۇمكىن ەمەس. 18 جەلتوقسان كۇنى تۇنگى ساعات 2-لەر شاماسىندا ءبىزدى ءولىمشى قىلىپ سابادى. سول كەزدە مەن ەسىمنەن تانىپ قالىپپىن. كەيىن قاسىمداعىلاردان ەستىدىم. ءبىزدى قوقىس تيەيتىن كولىكتەرگە تيەپ, قالا سىرتىنداعى پوليگونعا اپارىپ توككەن ەكەن. ال ەندى ءمايىتحانادا جاتقانىم تۋرالى بولسا, ول ەندى راس. سۆالكادا جاتقاندا مەنى قىزدار مەن جىگىتتەر كورگەن. الىپ كەتكەن. سول جاقتا اربامەن بوتەلكە جينايتىن سىعاندار جۇرەتىن. سولاردىڭ بىرەۋى كەزىگىپ قالعان عوي. ءبىزدى قالانىڭ شەكاراسىنا دەيىن جەتكىزىپ تاستاپتى. الايدا تاعى دا ميليتسياعا ۇستالىپ قالىپپىز. مەنىڭ ەسىمدە ەشتەڭە جوق. تسەليننىي كينوتەاترىنىڭ ماڭىندا جاتقان جەرىمنەن تانىس قىز كورىپ قالىپ, ميليتسياعا مەنى اۋرۋحاناعا اپارۋدى وتىنگەن ەكەن. مەنى 12-ءشى قالالىق اۋرۋحاناعا اپارادى, دارىگەرلەر «مىناۋ ءولىپ قالعان, ءمايىتحانادان الاسىڭدار» دەگەن. ەسىمدى ەمىس-ەمىس بىلەمىن, ورىس كەمپىر كەلىپ تۇر ەكەن. سول كەمپىر 7 كۇن ءمايىتحانادا جاتقان مەنى دارىگەرلەرگە الىپ بارىپ ءتىرى ەكەنىمدى ايتقان. 9 كۇن ەمدەلگەننەن كەيىن مەنى اۋرۋحانادان شىعاردى, - دەيدى جەلتوقسانشى.
سودان سوڭ ونى قۇقىق قورعاۋ ورگاندارى ونى دەنساۋلىعىنا بايلانىستى قۋدالاماعان. 8 جىل بويى اۋرۋحاناعا بارىپ, ەمدەلگەن. وقۋىن دا جالعاستىرا الماپتى.
اقكۇمىس قازىر زەينەتكەر. «تاۋەلسىزدىك-1986-جەلتوقسان» قوعامدىق ۇيىمىنىڭ مۇشەسى.
