فوتو: استانا قالاسىنىڭ اكىمدىگى
«ۋچاسكەلىك قىزمەتكەرلەر قوعامدىق ءتارتىپتى كۇندەلىكتى قامتاماسىز ەتەدى. ولاردىڭ جۇمىسىنىڭ ارقاسىندا ەلوردادا قۇقىق بۇزۋ سانى ازايىپ, قالا تۇرعىندارىنا كومەك كورسەتىلەدى. ولاردىڭ جۇمىسى كۇردەلى, جاۋاپتى ءارى ماڭىزدى. ولار مىڭداعان ادامدى قاۋىپتەن قۇتقارىپ قالدى», دەپ جازدى قالا اكىمى.
جەڭىس قاسىمبەكتىڭ ايتۋىنشا, قالادا ەلوردانىڭ ۇزدىك ۋچاسكەلىك ينسپەكتورىن انىقتايتىن كونكۋرس ءوتتى. بۇل اتاققا اسقار پاپىشەۆ يە بولدى. ول بىرنەشە جىلدان بەرى ۋچاسكەلىك ينسپەكتور بولىپ جۇمىس ىستەپ كەلەدى. بۇگىنگە دەيىن ءوزىن كاسىبي مامان, جاۋاپتى ءارى باستاماشىل قىزمەتكەر رەتىندە كورسەتە ءبىلدى. بيىل اسقار پاپىشەۆ بىرنەشە بالا مەن ايەل ادامدى ۇلكەن قاۋىپتەن قۇتقارىپ قالدى, ينسپەكتور ولاردىڭ 9-قاباتتان قۇلاپ كەتۋىنە جول بەرمەدى. بىراق بۇل ونىڭ باتىل قادامدارىنىڭ ءبىرى عانا.
«مەملەكەت باسشىسى جەرگىلىكتى پوليتسيا قىزمەتىن رەفورمالاۋ اياسىندا قۇقىق بۇزۋشىلىقتىڭ الدىن الۋ سالاسىنداعى نەگىزگى بۋىن بولىپ سانالاتىن ۋچاسكەلىك پوليتسيا ينسپەكتورلارىنىڭ ءرولى زور ەكەنىن اتاپ ءوتتى. قالالىق پوليتسيا دەپارتامەنتىمەن بىرلەسىپ, ماتەريالدىق-تەحنيكالىق بازانى, ۋچاسكەلىك پۋنكتەردى, قىزمەتكەرلەردىڭ ەڭبەك جاعدايىن جاقسارتۋ; ۋچاسكەلىك ينسپەكتورلار سانىن كوبەيتۋ سەكىلدى ت.ب. جۇمىستاردى جالعاستىرامىز», دەپ جازدى جەڭىس قاسىمبەك.
