سەمينارعا قاتىسۋشىلار الدىندا العاش بولىپ ءسوز العان فريدريح ەبەرت اتىنداعى قوردىڭ استاناداعى وكىلدىگىنىڭ باسشىسى زاۋرەش شۋتوۆا قور قىزمەتى, جاريالىلىق نورمالارى جانە الەم ەلدەرى سۋديالارىنىڭ باق وكىلدەرىمەن قارىم-قاتىناس قاعيداتتارى تۋرالى جان-جاقتى اڭگىمەلەدى.
جوعارعى سوتتىڭ سۋديالارى ەلەنا ماكسيۋتا مەن نازگۇل راحمەتۋللينا, قۇقىقتىق مەديا ورتالىعىنىڭ وكىلدەرى گۇلميرا ءبىرجانوۆا مەن ديانا مەدۆەدنيكوۆا جۋرناليستەردى قۇقىق قولدانۋدىڭ, ۇدەرىستىك زاڭناما مەن سوت ۇدەرىسىنىڭ قىر-سىرىمەن بارىنشا تولىق تانىستىردى. تاقىرىپقا قاتىستى وتاندىق سوت تاجىريبەسىنەن ناقتىلى دەرەك-دايەكتەردى العا تارتتى. ماسەلەن, سپيكەرلەر جينالعاندارعا سوت تالقىلاۋىن, ونىڭ ىشىندە جابىق تۇردە وتەتىن سوت ۇدەرىستەرىن جاريالاۋ كەزىندە جۋرناليسكە نەنى ءبىلۋ كەرەكتىگى, سوتتا ءوز بەينەسىن كورسەتۋ قۇقىعى, كىناسىزدىك پرەزۋمپتسياسى, قۇپيا جانە دەربەس دەرەكتەر, سوتتاعى جۋرناليست مىنەز-قۇلقىنىڭ ەتيكالىق نورمالارى, سوت شەشىمدەرىنەن الىنعان اقپاراتتى دۇرىس پايدالانۋ, سوتتار مەن باق وكىلدەرىنىڭ ءوزارا ءىس-قيمىلىنىڭ وزەكتى ماسەلەلەرى تۋرالى تولىققاندى قۇقىقتىق كەڭەستەر بەردى.
سەميناردىڭ ينتەراكتيۆتى بولىگى جۋرناليستەردىڭ پراكتيكالىق كەيستەرىن ءبولۋ جانە رولدەردى اۋىستىرۋ ارقىلى سوت ۇدەرىسىن بەينەلى ساحنالاۋمەن ەرەكشەلەندى. اتاپ ايتقاندا, جس سۋديالارى باق وكىلدەرى, ال جۋرناليستەر – سۋديا, پروكۋرور, ادۆوكات, كۋا, ايىپتالۋشى جانە پريستاۆ رولىندە بولىپ كوردى. سەمينار بارىسىندا سپيكەرلەر ءىس-شاراعا قاتىسۋشىلاردىڭ ءتۇرلى سۇراعىنا جان-جاقتى جاۋاپ بەردى.
جالپى, جوعارعى سوتتىڭ, وبلىستاردا, استانادا جانە رەسپۋبليكالىق ماڭىزى بار قالالاردا اۋماقتىق بولىمشەلەرى بار جەرگىلىكتى جانە باسقا دا سوتتاردىڭ قىزمەتىن ۇيىمداستىرۋشىلىق-قۇقىقتىق, اقپاراتتىق-تالدامالىق جانە ماتەريالدىق-تەحنيكالىق قامتاماسىز ەتۋدى جۇزەگە اسىراتىن سوت اكىمشىلىگى مۇنداي مازمۇنداعى سەمينار-كەڭەستەر وتكىزىپ تۇرۋدى داستۇرگە اينالدىرعان. بۇرىنىراقتا وسىنداي سەمينارلار ءادىل ءسوز, وبسە, اۆا ROLI, ينتەرنيۋس سىندى بەدەلدى قوعامدىق ۇيىم, قورلارمەن بىرلەسىپ وتكىزىلدى. جۇيەلى جۇمىستاردىڭ ناتيجەسىندە ۋاكىلەتتى مەملەكەتتىك ورگان تسيفرلاندىرۋدى دامىتۋ, جاساندى ينتەللەكت پەن روبوتتاندىرۋ ەلەمەنتتەرىن ەنگىزۋ ماسەلەلەرى بويىنشا الەمدىك رەيتينگتە 47 ەلدىڭ اراسىنان 4-ورىنعا كوتەرىلدى. قازان ايىندا ارگەنتينادا وتكەن سوت اكىمشىلىگى جونىندەگى حالىقارالىق قاۋىمداستىقتىڭ وتىرىسىندا سوت اكىمشىلىگىنىڭ باسشىسى نايل احمەتزاكيروۆ وسى ۇيىمنىڭ ۆيتسە-پرەزيدەنتى بولىپ سايلاندى.
ايتا كەتكەن ءجون, گەرمانيانىڭ دەموكراتيالىق جولمەن سايلانعان تۇڭعىش پرەزيدەنتى فريدريح ەبەرت اتىنداعى قور (FES) – باي ءداستۇرى بار, ەڭ تۇراقتى ساياسي قورلاردىڭ ءبىرى. قور جۇمىسى الەۋمەتتىك دەموكراتيانىڭ نەگىزگى يدەيالارى مەن قۇندىلىقتارىنا – ەركىندىك, ادىلدىك جانە ىنتىماقتاستىققا باعىتتالعان. 100-دەن استام ەلدە ورنالاسقان حالىقارالىق كەڭسەلەر جەلىسى ارقىلى بەيبىت ىنتىماقتاستىق پەن ادام قۇقىقتارى جونىندەگى ساياساتتى قولدايدى, دەموكراتيالىق, الەۋمەتتىك جانە كونستيتۋتسيالىق قۇرىلىمداردى قۇرۋعا جانە نىعايتۋعا جاردەمدەسەدى.
