2023 جىلدىڭ 1 جەلتوقسانىنان باستاپ «وتباسى بانكى» قازاقستان عالىمدارىنىڭ تۇرعىن ءۇي ساتىپ الۋعا نەسيەلىك وتىنىمدەرىن قابىلداي باستادى.
جوبا 5 جىلعا ەسەپتەلگەن. وسى كەزەڭدە بانك ءوز قاراجاتىنان شامامەن 16,6 ملرد تەڭگە ءبولۋدى جوسپارلاپ وتىر.
«اكادەميالىق عىلىمدا ارقاشان جاس كادرلار تاپشى. سوندىقتان وسىنى زەرتتەي كەلە, باعدارلاما ازىرلەۋدى ءجون كوردىك. قازىر اكادەميالىق عىلىمدا جۇمىس ىستەيتىن جاس عالىمداردىڭ وتىنىشتەرىن قابىلداپ جاتىرمىز. بۇل عىلىم جانە جوعارى ءبىلىم مينيسترلىگىنە قارايتىن 53 ۇيىم. بۇل – مەملەكەت تاريحى ينستيتۋتى, ماتەماتيكا جانە ماتەماتيكالىق مودەلدەۋ ينستيتۋتى, ەكونوميكا ينستيتۋتى, ادەبيەت جانە ونەر ينستيتۋتى, ارحەولوگيا ينستيتۋتى جانە ت.ب.», دەدى «وتباسى بانكى» اق ءتورايىمى ءلاززات يبراگيموۆا ورتالىق كوممۋنيكاتسيالار قىزمەتىنىڭ بريفينگىندە.
باعدارلاما «وتباسى بانكىندە» جىلدىق 5% مولشەرلەمەمەن (GESV 5,2%-دان) ەڭ تومەنگى 10% باستاپقى جارنامەن نەسيە الۋعا مۇمكىندىك بەرەدى. باعدارلاماعا قاتىسۋشى 20 ميلليون تەڭگە شاماسىندا باسپانا الا الادى. نەسيە مەرزىمى 19 جىل.
«مىسالى, جاس عالىم 20 ميلليون تەڭگەگە پاتەر ساتىپ السا, وندا العاشقى 8 جىلداعى الدىن الا نەسيە اياسىندا ونىڭ اي سايىنعى نەسيە تولەمى 155 مىڭ تەڭگەنى قۇرايدى. وسى كەزەڭنەن كەيىن ول تۇرعىن ءۇي نەسيەسىنە كوشەدى جانە نەسيە تولەمى 11 جىلعا قازىردىڭ وزىندە 84 مىڭ تەڭگەنى قۇرايدى», دەدى ءلاززات يبراگيموۆا.
باعدارلاماعا 40 جاسقا دەيىنگى جاس عالىمدار قاتىسا الادى. ولاردىڭ جانە ولارمەن بىرگە تۇراتىن وتباسى مۇشەلەرىنىڭ سوڭعى 5 جىل ىشىندە باسپاناسى بولماۋى كەرەك.
تۇرعىن ءۇي باعدارلاماسىنا عىلىمي جانە/نەمەسە عىلىمي-تەحنيكالىق قىزمەتپەن اينالىساتىن, ماگيستر دارەجەسىنەن كەم ەمەس, عىلىمي-زەرتتەۋ جۇمىسىنىڭ كەمىندە ءۇش جىل جۇمىس ءوتىلى بار, ونىڭ ىشىندە عىلىمي-تەحنيكالىق جوبالار مەن باعدارلامالارعا قاتىساتىن عالىمدار قاتىسا الادى.
