اۋتيزم دەرتىنە دۋشار بولعان بالالارعا بۇعان دەيىن دە كومەك كورسەتىلىپ كەلگەن. دەرەككە جۇگىنسەك, جاڭا ورتالىقتا 1,5-18 جاس ارالىعىنداعى 125 بالا ءوز ءىسىنىڭ شەبەرى سانالاتىن ماماندار تاراپىنان تەگىن كومەك الماق. سونداي-اق ولاردىڭ اتا-انالارىنا دا ءتۇرلى دەڭگەيدە قولداۋ كورسەتۋ جاعى قاراستىرىلعان.
ورتالىقتىڭ اشىلۋ سالتاناتىنا ءوڭىر باسشىسى ەربول قاراشوكەەۆ, «قازاقستان حالقىنا» قوعامدىق قورىنىڭ باسقارما توراعاسى بولات جامىشەۆ, «سامۇرىق-قازىنا» قورى كورپوراتيۆتىك باسقارۋ, الەۋمەتتىك-ەڭبەك قاتىناستارى جونىندەگى باسقارۋشى ديرەكتورى عيبرات اۋعانوۆ, «قامقورلىق» كورپوراتيۆتىك قورىنىڭ ديرەكتورى ارايلىم ەركىنوۆا قاتىستى.
«بيلىك تاراپىنان بالالارعا, قاريالارعا, سونداي-اق مۇمكىندىگى شەكتەۋلى ازاماتتارعا قولدان كەلگەنشە قولداۋ كورسەتىلىپ جاتىر. ولارعا قوعامدا تەڭ جاعداي قالىپتاستىرۋ ءۇشىن جەرگىلىكتى اتقارۋشى بيلىك تە مۇمكىندىگىنشە جۇمىس اتقارىپ كەلدى. بالالارعا قامقورلىق جاساۋ – مەملەكەتتىڭ دە, ازاماتتاردىڭ دا اسىل بورىشى ەكەنى داۋسىز. سوندىقتان ءبىز بۇل ماسەلەگە باسىمدىق بەرىپ وتىرمىز. پرەزيدەنت تاپسىرماسىنا سايكەس وڭىردە مۇمكىندىگى شەكتەۋلى جاندارعا كومەك كورسەتۋ ماقساتىندا ءبىراز تىرلىك تىندىرىلعانىن ايتا كەتكەن ءلازىم. جالپى, وبلىستا 45 مىڭنان اسا مۇگەدەكتىگى بار ازامات تىركەلگەن. ولاردى قولداۋ ماقساتىندا 3,5 ملرد قارجى قاراستىرىلعان. بۇل باعىتتاعى جۇمىستار الداعى ۋاقىتتا دا جالعاسادى», دەدى ە.قاراشوكەەۆ.
ءىس-شارا بارىسىندا ءسوز العان «قازاقستان حالقىنا» قوعامدىق قورىنىڭ باسقارما توراعاسى بولات جامىشەۆ, «سامۇرىق-قازىنا» قورى كورپوراتيۆتىك باسقارۋ, الەۋمەتتىك-ەڭبەك قاتىناستارى جونىندەگى باسقارۋشى ديرەكتورى عيبرات اۋعانوۆ, «قامقورلىق» كورپوراتيۆتىك قورىنىڭ ديرەكتورى ارايلىم ەركىنوۆا اۋتيزم دەرتىنە شالدىققان بالالاردىڭ تولىققاندى ساۋىعۋى ءۇشىن ورتالىق ماماندارى جانە قوعامنىڭ قولداۋى اۋاداي قاجەت ەكەنىن اتاپ ءوتتى. ءوز كەزەگىندە ءوڭىر باسشىسى ە.قاراشوكەەۆ ورتالىقتىڭ اشىلۋىنا مۇرىندىق بولعان بارلىق تاراپقا العىسىن ءبىلدىردى.
جاڭا ورتالىقتا لوگوپەد, دەفەكتولوگ سەكىلدى وزگە دە ماماندار جۇمىس ىستەيدى. ولار ەرەكشە بالالارعا اۆا-تەراپيا, مۋزىكالىق تەراپيا, سەنسورلىق ينتەگراتسيا, ەرگوتەراپيا, كينەزيوتەراپيا, بەيىمدەلگەن جانە ەمدىك دەنە شىنىقتىرۋ, ەڭبەك تەراپياسى, ارت-تەراپيا, الەۋمەتتىك-تۇرمىستىق باعدارلاۋ بويىنشا ساباقتار وتەدى ەكەن. ماماندار ءار بالانىڭ قابىلەتى مەن قاجەتتىلىگىنە سايكەس ادىسكەرلەر ارنايى ازىرلەگەن باعدارلامالار بويىنشا جۇمىس جۇرگىزەدى.
ورتالىق ديرەكتورى راشيدا كاريموۆا جاڭا نىساننىڭ 125 بالاعا ارنالعانىن ايتىپ وتىر. ونىڭ سوزىنە سەنسەك, ورتالىقتا ءاۋتيزمى بار بالالاردى ەمدەۋگە قاجەتتى بارلىق جابدىق بار.
ء«بىزدىڭ ورتالىقتا 30-عا جەتەعابىل ءتۇرلى كابينەت بار. مۇنداعى كابينەتتىڭ بارلىعى قاجەتتى جابدىقتارمەن جابدىقتالعانىن ايتا كەتكەن ءجون. ءبىر سوزبەن ايتقاندا, بالالاردى ساۋىقتىرۋعا قولدان كەلگەنشە جاعداي قاراستىرىلعانى قۋانتادى. ورتالىق قىزمەتكەرلەرى ءوز قىزمەتىن مەديتسينالىق-الەۋمەتتىك ساراپتامانىڭ قورىتىندىسى نەگىزىندە جانە وڭالتۋدىڭ جەكە باعدارلاماسىنا سايكەس اتقارادى. جامبىلدىقتار ۇزاق ۋاقىت كۇتكەن ورتالىقتاعى ماماندار ەرەكشە بالالارعا قولدان كەلگەن كومەگىن كورسەتۋگە ءازىر», دەيدى ر.كاريموۆا.
جامبىل وبلىسى
