قازىر كاسىپورىننىڭ بۇكىل قارىزى وتەلىپ, تسەحتار جوندەلىپ, كابينەتتەر رەتكە كەلتىرىلىپ, تەرەزەلەر اۋىسىپ, جەلدەتكىشتەر ورناتىلعان. سونداي-اق جاڭا تىگىن ماشينالارىن دا ساتىپ الدى. كاسىپورىننىڭ نەگىزگى باعىتى – ارنايى كيىمدەر. بۇل رەتتە شاھارداعى تيتان-ماگني كومبيناتى, «وسكەمەن ونەركاسىپتىك ارماتۋرا زاۋىتى», «كاراۆاي» نان زاۋىتى, «رەگيستان» قوعامدىق تاماقتانۋ جەلىسى, «InVivo» زەرتحاناسى «راۋان» وسك-ءنىڭ تىكەلەي تۇتىنۋشىلارىنا اينالعان. كاسىپورىن نەگىزىنەن ءوندىرىستىڭ ءار الۋان تۇرىنە ارنالعان ارنايى كيىمدەر, ترانسپورت قۇرالدارىنا ارنالعان قاپتامالار, برونەجيلەت قاپتامالارى, پەردە, ءاسۇي قولورامالدارى, باسقا دا توقىما بۇيىمدارىن تىگەدى.
ء«بىز ارقاشان ەل يگىلىگىنە جۇمىس ىستەگىمىز كەلەدى. پاندەميا كەزىندە دە قىزمەتكەرلەر ەشقانداي دەمالىسسىز بەتپەردە, حالات, دارىگەرلەرگە ارنالعان كوستيۋم تىگۋمەن اينالىستى», دەيدى كاسىپورىن باسشىسى.
ءاليا اداموۆانىڭ نەگىزگى ماماندىعى – پەداگوگ. سوندىقتان بولار جاستاردى وقىتۋدى جانى قالاپ تۇرادى. كاسىپورىن جانىنان اشىلعان وقۋ ورتالىعى الەۋمەتتىك وسال توپ ساناتىنان شىققان قىز بالالارعا تىگىن شەبەرلىگىن ۇيرەتەدى. سونداي-اق جۇمىسپەن قامتۋ ورتالىعىمەن دە تىعىز قارىم-قاتىناس ورناتىپتى. ورتالىق مۇندا «جاستار تاجىريبەسى» جانە «العاشقى جۇمىس ورنى» جوبالارى بويىنشا جۇمىسسىز ازاماتتاردى جىبەرىپ وتىرادى. قازىر فابريكادا 23 ادام جۇمىس ىستەيدى. ونىڭ ۇشەۋى – مۇمكىندىگى شەكتەۋلى جاندار.
ء«بىز – الەۋمەتتىك جاۋاپكەرشىلىكتى سەزىنەتىن كاسىپورىنبىز, سوندىقتان كىم-كىمگە دە ەسىگىمىز اشىق. ماسەلەن, جاقىندا عانا ءبىر قىزبەن كەلىسىم جاساستىق. ماركەتپلەيسكە شىققاننان كەيىن ول ينتەرنەتكە قاتىستى جۇمىستاردى جۇرگىزۋمەن اينالىسادى», دەيدى ءا.اداموۆا.
مىنە, وسى جەردە تاقىرىپقا قويىلعان وي تىزبەگىن ءارى قاراي تارقاتاتىن ءسات كەلگەن سەكىلدى. كاسىپورىن بيىلدان باستاپ ەرەكشە باستامانى قولعا الدى. ەندى «راۋان» كاسىپورنى دامۋ ەرەكشەلىگى بار بالالارعا ارنالعان كيىمدەردى تىگىپ, نارىققا شىعارۋعا كىرىستى. ءا.اداموۆانىڭ ايتۋىنشا, ەلىمىزدە بىردە-ءبىر كاسىپورىن ەرەكشە بالالارعا ارناپ كيىم تىكپەيدى, ال سۇرانىس دەگەن تىم جوعارى. ساۋ بالالارعا كەز كەلگەن تيپتەگى كيىمدى وڭاي تابۋعا بولادى, ال ەرەكشە بالالاردىڭ جاعدايىن كىم ويلايدى؟ ءبىز وسى ولقىلىقتىڭ ورنىن تولتىرعىمىز كەلدى دەيدى كاسىپكەر.
ء«بىز ءبىراز ۋاقىت بۇرىن «اۋتيزم», «تسەرەبرالدى سال اۋرۋى» دياگنوزى بار بالالارمەن جۇمىس ىستەيتىن «مارحابات» ورتالىعىنىڭ قىزمەتكەرلەرىنە (تاربيەشى, پەداگوگ, قىزمەت كورسەتۋشى پەرسونال) ارناپ كيىم تىككەن ەدىك. ال ول قىزمەتكەرلەردىڭ بارلىعى دەرلىك – ەرەكشە بالالاردىڭ انالارى. سول كەزدە ولار «مەنىڭ بالاما ارناپ ارنايى كيىم تىگىپ بەرە الاسىزدار ما؟» دەپ بىزگە ءوتىنىش قىلا باستادى. ولار مۇنداي كيىمدى ساتىپ الا المايدى. سەبەبى قىمبات. ماسەلەن, ارنايى كيىمدەر قازاندا تىگىلىپ, ساتىلادى. بىراق باعاسى بىزدىكىنەن ءۇش ەسە جوعارى. ءبىزدىڭ باعامىز دا قولجەتىمدى, ساپامىز دا رەسەيلىك كيىمنەن جوعارى. راسىمەن, سول بالالاردىڭ وزدەرىنە بەيىمدەپ نەلىكتەن كيىم تىكپەسكە دەپ ويلانىپ قالدىق. كوپ ۇزاماي, قولعا الدىق. العاشقى توپتامانى بالالاردىڭ وزىنە تەگىن تارتۋ ەتتىك. مۇنداي كومەكتى ءىشىنارا ءالى كۇنگە جالعاستىرىپ كەلە جاتىرمىز. ءبىز راسىمەن كومەكتەسكىمىز كەلدى. اتا-انالارمەن اقىلداسىپ, ولاردىڭ قاجەتتىلىكتەرىن انىقتاپ بارىپ وسى ىسكە كىرىستىك», دەيدى.
ءاليانىڭ ايتۋىنشا, ءوز بەتىنشە كيىنىپ, قيمىلداي المايتىن بالالار ءۇشىن بۇل كيىمدەر توپتاماسى وتە ىڭعايلى بولماق. اسىرەسە ەرەكشە بالالاردى كۇزگى جانە قىسقى ماۋسىمدا كيىندىرۋ ءبىرشاما قيىندىق تۋدىرادى.
«ويتكەنى قازىرگى شىعارىلىپ جاتقان كيىمدەر ول بالالاردىڭ قاجەتتىلىكتەرىن ەسكەرمەيدى. ءبىزدىڭ ماماندار بەيىمدەلگەن توپتامانى ازىرلەپ شىقتى. كيىمدەر تولىقتاي سىرمامەن جابدىقتالعان. باستان اياققا دەيىن جاپسىرمالى تۇيمەلەر قادالعان. ءتىپتى پامپەرستى اۋىستىرۋ ءۇشىن دە بۇكىل كيىمدى قايتا شەشۋ قاجەت ەمەس. سونداي-اق ماتانىڭ 80-90 پايىزى ماقتادان تۇرادى, بۇل بالانىڭ دۇرىس تىنىس الۋىنا جانە اينالاسىنان ەش قىمسىنباي قيمىلداۋىنا مۇمكىندىك بەرەدى. ءىشى جىلى, قىستىق اياقكيىمدەرىمىز دە بار. بالالاردىڭ قولدانۋىنا اسا ىڭعايلى ارنايى قولعاپتار شىعارۋدى دا ۇمىتقان جوقپىز. بۇل بالالاردىڭ قوعاممەن ارالاسىپ, ادەمى, كيىمى جاراسىمدى بولىپ جۇرگەنىن قالايمىز. سول سەبەپتى وسى توپتامانى ەرەكشە ىقىلاسپەن, ەرەكشە ماحابباتپەن دايىنداپ جاتىرمىز», دەيدى مامان.
فابريكانىڭ العا قويىپ وتىرعان ماقساتى ايقىن ءارى اۋقىمدى – ولار ەلىمىزدەگى ەرەكشە قاجەتتىلىگى بار ءار بالانى قامتاماسىز ەتۋدى قالايدى. بالالاردان بولەك, دامۋىندا ەرەكشەلىگى بار جاستار مەن ەرەسەك ادامدار ءۇشىن دە ارنايى كيىمدەرگە تاپسىرىس قابىلداي باستاپتى. بۇل دا – قۋانتارلىق باستاما.
«ەرەكشە بالالارعا ارنالعان كيىمدەرگە دەگەن سۇرانىس تىم كوپ. ءبىز قالامىزدا وسىنشالىقتى كوپ ەرەكشە بالا تۇرادى دەپ ويلاماعان دا ەكەنبىز. ال بۇكىل ەل بويىنشا ولاردىڭ سانى قانشا دەسەڭىزشى. وكىنىشكە قاراي, ەشقانداي مەملەكەتتىك قولداۋ الىپ وتىرعان جوقپىز. سوندىقتان بولار, كيىمدەرىمىزدى اينالىمعا ءتۇسىرۋ, كوپشىلىككە تانىتۋ دا ءبىرشاما قيىنعا ءتۇسىپ جاتىر. قازان ايىندا كورمە بولىپ, سول كەزدە وبلىس اكىمى ءبىزدىڭ كيىمدەرىمىزگە نازار اۋداردى. ءتىپتى مۇنداي كيىمدەردى ساتۋ ءىسىن جولعا قويۋ بويىنشا تاپسىرما دا بەرگەن ەدى. ويتكەنى مۇنداي بالالار جەكەلەگەن وتباسىلاردا عانا ەمەس, بالالار ۇيىندە دە وتە كوپ قوي», دەيدى كاسىپكەر.
بالالارعا ارنالعان كيىمدەردى ەرەكشە بالالاردىڭ انالارى تىگەدى دەدىك قوي. سونىڭ ءبىرى – ايتولقىن مۇقاشەۆا. ول ءوزى وسى فابريكادا جانە «مارحابات» ورتالىعىندا تاربيەشى بولىپ جۇمىس ىستەيدى.
«مەنىڭ بالام – 5 جاستا, ول سويلەمەيدى, الەۋمەتتەن جىراق, شاعىن موتوريكاسى زاقىمدانعان. سوندىقتان وعان ءوز بەتىنشە كيىنۋ قيىن. ادەتتەگى كيىمدەگى سىرمالار وتە كىشكەنتاي, اشىپ, جابۋعا ءبىراز قينالادى. ال ءاربىر اتا-انانىڭ ماقساتى – بالاسىن ءوز بەتىنشە ارەكەت ەتۋگە ۇيرەتۋ. ءاليا ماراتقىزى بالالارىمىزعا ارناپ كيىم تىگۋگە ۇسىنىس جاساعان كەزدە وتە قاتتى قۋاندىق. ءبىزدىڭ بارلىق ۇسىنىسىمىز ۇساق-تۇيەگىنە دەيىن ەسكەرىلدى. ول ۇسىنىستار سىرمالاردىڭ ولشەمى, قالتالاردىڭ ورنالاسۋى, ماتەريال تاڭداۋعا دا قاتىستى بولدى. سونىمەن قاتار ءبىزدىڭ بالالار كيىم تۇسىنە دە ەرەكشە سەزىمتالدىقپەن قارايدى. كوبىنە بىركەلكى, قاراپايىم تۇستەردى ۇناتادى. بۇل دا ەسكەرىلدى», دەيدى ول.
كاسىپورىن ايرىقشا ىنتىماقتاستىق ورناتقان «مارحابات» تۇزەتۋ بالاباقشاسىنىڭ جەتەكشىسى جاننا تۋكۋباەۆا وسىنداي كەرەمەت جانە الەۋمەتتىك ماڭىزى بار جوباعا قولداۋ جاساعانىمىزعا قۋانىشتىمىز دەيدى.
«راۋان» جشس-مەن تانىستىعىمىز بەن ىنتىماقتاستىعىمىز ءبىزدىڭ قىزمەتكەرلەرگە ارنايى بىركەلكى كيىم تىگۋگە تاپسىرىستان باستالعان ەدى. ولار ساپالى ماتادان ىڭعايلى ەتىپ, ۋاقىتىلى تىگىپ بەردى. بالاباقشامىزدا تىرەك-قيمىل قوزعالىسى بۇزىلعان, جۇيكە-پسيحيكالىق اۋىتقۋى بار 80 بالا تاربيەلەنىپ جاتىر. اتا-انالارىمىز ءاليا ماراتقىزىنىڭ باستاماسىمەن قولعا الىنعان ەرەكشە بالالارعا بەيىمدەلگەن كيىم تىگۋ جوباسى اياسىندا كيىمدەردىڭ ۇلگىسىن بىرلەسە جاساۋعا اتسالىستى», دەيدى ورتالىق باسشىسى.
كاسىپورىن تۇتىنۋشىسىنىڭ ءبىرى سانالاتىن Demey ساۋىقتىرۋ ورتالىعىنىڭ باسشىسى ءمادينا اۋرەنوۆا دا – ەرەكشە بالانىڭ اناسى.
ء«ا.اداموۆا مەن ونىڭ ۇجىمىنا ەرەكشە قاجەتتىلىگى بار بالالارعا ارناپ ارنايى كيىمدەر تىگە باستاعانى ءۇشىن العىسىمدى بىلدىرەمىن. تسەرەبرالدى سال اۋرۋىنا شالدىققان بالالارعا كيىم تابۋ دا, كيىندىرۋ دە وڭاي ەمەس. بۇرىن تەك رەسەي, اقش, ەۋروپادان عانا تاپسىرىسپەن الدىرۋعا بولاتىن ەدى. ەندى ءوزىمىزدىڭ وسكەمەننەن تاباتىن بولدىق. كيىمدەرى وتە جەڭىل ءارى جىلى», دەيدى ول ەرەكشە العىسىن ءبىلدىرىپ.
كاسىپورىن باسشىسىنىڭ ايتۋىنشا, قويما قازىر مۇنداي كيىمدەرگە سىقاي تولىپ تۇر. تەك جارناماسى جەتىسپەي جاتقاندىقتان, كوپشىلىككە تارالا قويمادى. ايتپەسە ەل اۋماعىندا تاپ وسىنداي كيىمگە مۇقتاج بولىپ وتىرعان وتباسىلار قانشاما. ازىرگە تاپسىرىس قوستانايدان عانا كەلىپ جاتىر ەكەن.
«ماركەتپلەيسكە مۇلدە شىعا الار ەمەسپىز. قازىر وسى ماسەلە بويىنشا كەلىسسوز جۇرگىزىپ جاتىرمىز. جۋىق ارادا ارنايى قوسىمشالارعا شىعۋ بويىنشا ناتيجە بولىپ قالار. Ozon-مەن دە كەلىسسوز باستادىق. بىراق بۇل رەسەيلىك الاڭقاي بولعاندىقتان, وتاندىق وندىرۋشىلەر ءۇشىن اسا ءتيىمدى بولا قويمايتىن سياقتى. ءتيىستى ماركەتينگ جۇمىستارى جۇرگىزىلگەننەن كەيىن ءبىز تۋرالى بۇكىل قازاقستان بىلەدى, سول كەزدە كيىمدەرىمىزگە دەگەن سۇرانىس تا كوبەيەدى دەگەن ويدامىز. ەرەكشە بالالار قاۋىمداستىعىنىڭ ديرەكتورىمەن دە كەزدەسىپ, قولداۋ جايلى ايتتىم. ول ەڭبەگىمىزدى باعالاپ, كومەكتەسەتىنىن جەتكىزدى», دەدى ءا.اداموۆا بىزبەن اڭگىمەسىن تۇيىندەپ.
كوڭىل شىركىن قاي بالانىڭ دا اۋىرماعانىن تىلەيدى عوي. بىراق ەلىمىز بويىنشا ەرەكشە قاجەتتىلىكپەن ءومىر سۇرەتىن 98 مىڭنان اسا بالا بار ەكەنىن ستاتيستيكا راستايدى. قازىر ولاردى ەمدەۋ ماسەلەسى وتكىر تۇر. وسىنشاما بالانىڭ كيىنۋ ماسەلەسىنە قولعابىس ەتكەلى وتىرعان كاسىپورىننىڭ يگىلىكتى باستاماسى قولداۋعا, جاريا ەتىپ تاراتۋعا تۇرارلىق.
قازىر كاسىپورىن ماۋسىمدىق جانە قىستىق كيىمدەردى تىگۋمەن اينالىسىپ جاتىر. ولاردىڭ ىشىندە بودي, سپورتتىق كوستيۋمدەر, كومبينەزوندار بار.
