فوتو: اشىق دەرەككوز
دۇنيەجۇزىندەگى مما سپورتىنىڭ تاڭداۋلى ساڭلاقتارى قاتاڭ سۇزگىدەن وتكەن سوڭ عانا جولى تۇسەتىن UFC ارەناسىندا شاۆكات راحمونوۆ وسى ۋاقىتقا دەيىن 5 مارتە جەكپە-جەككە ءتۇسىپ, بارلىعىندا جەڭىسكە جەتتى. كەزەكتى ايقاسىن 16 جەلتوقساندا (استانا ۋاقىتىمەن 17 جەلتوقساندا) اقش-تىڭ لاس-ۆەگاس قالاسىندا امەريكالىق ستيۆەن تومپسونعا قارسى وتكىزەدى.
وسى جەكپە-جەك كەشىنىڭ Countdown اڭداتپاسىندا شاۆكات راحمونوۆ تۋرالى دا كەڭىنەن قامتىلىپ ايتىلدى. بۇعان دەيىن قازاقستاننىڭ بىردە-ءبىر سپورتشىسى UFC-ءدىڭ Countdown بەينەروليگىنىڭ نازارىنا ىلىنگەن ەمەس. Countdown – UFC وكتاگونىندا ايقاسقا تۇسەتىن جاۋىنگەرلەردىڭ ىشىندەگى شوقتىقتىسى تۋرالى جان-جاقتى مالىمەت بەرىپ, جەكپە-جەككە قاتىستى وي-پىكىرىن تالقىلايتىن بەينەروليك. شاۆكات دۇنيەجۇزىنە تارالاتىن بەينەروليكتە ءوزى جايىنداعى مالىمەتتى قازاق تىلىندە باياندادى.
