«سامۇرىق-قازىنا» اق ستراتەگيا جانە اكتيۆتەردى باسقارۋ جونىندەگى باسقارۋشى ديرەكتورى ەرنات بەردىعۇلوۆ قوعامدىق كەڭەس مۇشەلەرىنە قوردىڭ ءىرى ينۆەستيتسيالىق جوبالارىنا مونيتورينگ جۇرگىزۋدىڭ نەگىزگى قۇرالدارى جانە وسى باعىتتا سوڭعى ۋاقىتتا ەنگىزىلگەن جاڭالىقتار تۋرالى ايتىپ بەردى. ونىڭ ايتۋىنشا, قور جۇرگىزەتىن مونيتورينگ ىقتيمال تاۋەكەلدەردى جەدەل انىقتاۋعا جانە تۇزەتۋ شارالارىن جەدەل قابىلداۋعا مۇمكىندىك بەرەدى.
«قۇرىلىس الاڭىنداعى جۇمىستىڭ كولەمى, جوبالىق كەستەنىڭ ورىندالۋى, يگەرۋ سوماسى, اپتالىق جۇمىس جوسپارىنىڭ ورىندالۋ دارەجەسى جانە باسقا دا ماسەلەلەر تۇراقتى نەگىزدە تالدانىپ وتىرادى. قوردىڭ ديرەكتورلار كەڭەسىنىڭ تاپسىرماسىنا سايكەس ينۆەستيتسيالىق جوبالاردى جۇزەگە اسىرۋعا قوردىڭ 50 پايىز سالماعى بار كورپوراتيۆتىك پايدالى اسەر كوەففيتسيەنتى (پاك) جانە پورتفەلدىك كومپانيالاردىڭ 30-40 پايىز سالماعى بار كورپوراتيۆتىك پاك ەنگىزىلگەن. سايكەسىنشە بۇل پورتفەلدىك كومپانيالاردىڭ جوبالاردى ءتيىمدى باسقارۋىنا زور ىقپال ەتتى», دەدى ەرنات بەردىعۇلوۆ.
باياندامادا جۇمىستاردىڭ كولەمى مەن مەرزىمىن وبەكتيۆتى باعالاۋدى, جوبادا كوزدەلگەن ءىس-شارالاردىڭ حرونولوگياسىن ەسكەرە وتىرىپ, بارلىق جوبا بويىنشا ەگجەي-تەگجەيلى كەستەلەردى بەكىتۋ ماسەلەلەرى دە ايتىلدى. وسى ءىس-شارالاردىڭ بارلىعى قورعا جوبانىڭ ىقتيمال تاۋەكەلدەرىنە جەدەل دەن قويۋعا جانە تۇزەتۋ شارالارىن جىلدام قابىلداۋعا مۇمكىندىك بەرەدى.
بايانداما سوڭىندا قور تاراپىنان ينۆەستيتسيالىق جوبالارعا مونيتورينگ جۇرگىزۋ تەتىكتەرىن جەتىلدىرۋ جۇمىستارى ودان ءارى جالعاساتىنى مالىمدەلدى. اتاپ ايتقاندا, ورتامەرزىمدى كەلەشەكتە جوبالارعا اۆتوماتتاندىرىلعان مونيتورينگ جۇيەسىن ەنگىزۋ جوسپارلانعان. «بۇل جۇمىس مۇلدەم اتقارىلماعان دەپ ايتۋ قيىن, ويتكەنى قاتارلاس پورتفەلدىك كومپانيالاردا تانىمال جۇيەلەر ىستەپ كەلەدى. الايدا قوردا ماقساتتارىمىزعا ساي اۆتوماتتاندىرىلعان, بارلىق تاراپقا ىڭعايلى جۇيەنى ەنگىزۋ جوسپارى بار», دەدى ەرنات بەردىعۇلوۆ.
قازىرگى ۋاقىتتا قور مونيتورينگ جاسايتىن 42 جوبانىڭ ۇشەۋى جۇزەگە اسىرۋ ساتىسىندا.
«بۇل جوبالاردىڭ مونيتورينگى, ىسكە اسىرۋ مەرزىمى مەن تيىمدىلىگى ماسەلەلەرىنە ۇلكەن كوڭىل ءبولىنىپ, تالقىلاندى. ال قوعامدىق كەڭەستىڭ ءبىر وتىرىسىندا باسىم ينۆەستيتسيالىق جوبالاردىڭ مونيتورينگى قالاي ۇيىمداستىرىلاتىنى, مونيتورينگ پەن باقىلاۋدىڭ تيىمدىلىگىن ارتتىرۋ ءۇشىن قانداي وزگەرىستەر ەنگىزىلەتىنى تۋرالى ارنايى ماسەلە كوتەرىلدى», دەدى «سامۇرىق-قازىنا» اق قوعامدىق كەڭەسىنىڭ توراعاسى بولات جامىشەۆ.
ءىرى جوبالاردىڭ جۇزەگە اسىرىلۋ بارىسىن باقىلاپ وتىرۋ ءۇشىن قور قۇرىلىمىندا جوبالىق كەڭسە اشىلدى. ول ءار اپتا سايىن ءتيىستى باقىلاۋ جۇرگىزىپ, ەسەپتىك اقپاراتتى قوردىڭ ديرەكتورلار كەڭەسىنىڭ قاراۋىنا وتىرىس سايىن ۇسىناتىن بولادى. تۇراقتى نەگىزدە تالدانىپ وتىراتىن پارامەترلەر قاتارىندا – قۇرىلىس الاڭىندا اتقارىلعان جۇمىستىڭ كولەمى, جوبا بويىنشا جۇمىستىڭ ورىندالۋ كەستەسى, يگەرىلگەن سوما, اپتالىق جۇمىس جوسپارىنىڭ اتقارىلۋ دەڭگەيى بار.
«بارلىق جوبا بەلگىلى ءبىر كەزەڭدەرگە بولىنگەن. ءار كەزەڭگە سايكەس اتالعان جوبا بويىنشا ناقتى تالداۋ جۇرگىزىلەدى. سونىمەن قاتار ءبىز قور دەڭگەيىندە ساپانى قامتاماسىز ەتۋ تۇرعىسىنان دا, جۇمىستىڭ ناقتى كولەمىن ورىنداۋ تۇرعىسىنان دا ينۆەستيتسيالىق جوبالار توبىنىڭ مونيتورينگىن جولعا قويدىق. بۇل قاي تۇستا اۋىتقۋلار بولۋى مۇمكىن ەكەنىن جانە جوبانى كەستەگە قايتارۋ ءۇشىن قانداي شارالاردى قولدانۋعا بولاتىنىن ءتۇسىنۋ ءۇشىن كەرەك», دەيدى ەرنات بەردىعۇلوۆ.
ونىڭ ايتۋىنشا, «سامۇرىق-قازىنا» اق-نىڭ جوبالاردى قارجىلاندىرۋعا جۇمساعان شىعىنى 24 ترلن تەڭگەگە جۋىق جانە قارجىلاندىرۋدىڭ ءارتۇرلى نىسانى قولدانىلادى: قارىز الۋ, سەرىكتەس تابۋ, مەنشىكتى كاپيتال قۇيۋ جانە باسقالار.
«سامۇرىق-قازىنا» قولعا العان جوبالاردىڭ 15-ءى – ەنەرگەتيكا, 7-ءى – كولىك جانە كوممۋنيكاتسيا, 10-ى – گاز ينفراقۇرىلىمى جانە گاز وڭدەۋ, 1-ءى – مۇناي حيميا, 5-ءى – تاۋ-كەن جانە حيميا سەكتورلارىندا. بۇلاردان بولەك, تاعى 4 ۇقساس جوبا بار.
