جيىن كەزىندە ەلىمىزدىڭ ديپلوماتى بۇۇ-نىڭ نايروبيدەگى بولىمشەسى جانىنداعى قازاقستاننىڭ تۇراقتى وكىلى قىزمەتىنە تاعايىندالعانى تۋرالى وكىلەتتىك سەرتيفيكات تابىس ەتتى. اڭگىمەلەسۋ بارىسىندا ەلشى 2030 جىلعا دەيىنگى تۇراقتى دامۋ ماقساتتارىنا قول جەتكىزۋ بويىنشا بۇۇ كۇن ءتارتىبىن ىسكە اسىرۋ جونىندەگى قازاقستان قابىلداپ جاتقان شارالار تۋرالى حاباردار ەتتى. قازاقستاننىڭ الماتى قالاسىنداعى بۇۇ كەڭسەسىن ورتالىق ازيا مەن اۋعانستان ەلدەرى ءۇشىن تۇراقتى دامۋ جونىندەگى بۇۇ وڭىرلىك ورتالىعى رەتىندە قايتا ۇيىمداستىرۋ باستاماسى بويىنشا پىكىر الماستى.
تاراپتار قازاقستاندا 2026 جىلى بۇۇ قامقورلىعىمەن ەكولوگيا بويىنشا وڭىرلىك سامميت وتكىزۋ جونىندەگى قازاقستان ۇسىنىسىن تالقىلادى. بۇۇ باس حاتشىسىنىڭ ورىنباسارى ز.بانگۋرا قازاقستاننىڭ حالىقارالىق بەيبىتشىلىكتى, قاۋىپسىزدىك پەن ورنىقتى دامۋدى نىعايتۋعا قوسقان زور ۇلەسىن اتاپ ءوتتى. ول تدم ىسكە اسىرۋ بويىنشا بىرلەسىپ جۇمىس ىستەۋگە, جوبالاردى ىسكە اسىرۋعا جاردەمدەسۋگە دايىن ەكەنىن ءبىلدىردى.
ب.سادىقوۆ بۇۇ قورشاعان ورتانى قورعاۋ باعدارلاماسى (UNEP) باسشىسىنىڭ مىندەتىن اتقارۋشى دجيان ليۋمەن جانە بۇۇ باسقارۋشى ۇيىمدارىنىڭ ءبولىم باستىعى ۋلف بورنحولممەن كەزدەستى. تۇراقتى وكىل قازاقستان پرەزيدەنتىنىڭ UNEP باس ديرەكتورى ي.اندەرسەننىڭ اتىنا جولدانعان 2024 جىلعى ماۋسىمدا استانا حالىقارالىق فورۋمىنا قاتىسۋعا شاقىرۋ حاتىن تاپسىردى. قازاقستاننىڭ شىۇ-نىڭ توراعاسى رەتىندە بۇۇ-نىڭ نايروبيدەگى كليمات جونىندەگى باس اسسامبلەياسىنا (UNEA-6) العاش رەت قاتىسۋدى جوسپارلاپ وتىرعانىن مالىمدەدى.
بۇۇ-مەن ءوزارا ءىس-قيمىلدى كەڭەيتۋ, ونىڭ ىشىندە UNEP-پەن كليماتتىڭ وزگەرۋىنە بەيىمدەلۋ جانە وعان قارسى كۇرەس سالاسىنداعى زەرتتەۋ ىنتىماقتاستىعىن دامىتۋ ماسەلەلەرى تالقىلاندى.
سونىمەن قاتار قازاقستاننىڭ تۇراقتى وكىلى نايروبيدە ورنالاسقان حالىقتى ورنالاستىرۋ جونىندەگى بۇۇ باعدارلاماسىنىڭ (UN-Habitat) حاتشىلىعىندا UN-Habitat اتقارۋشى ديرەكتورىنىڭ ورىنباسارى مايكل ملينارمەن كەزدەسۋ وتكىزدى. كەزدەسۋ بارىسىندا ب.سادىقوۆ قازاقستانداعى قالالاردىڭ دامۋ جاي-كۇيى تۋرالى حاباردار ەتتى. جەرگىلىكتى تۇرعىندار ءۇشىن قالالىق قوعامدىق ينفراقۇرىلىمنىڭ جايلىلىعى مەن ەكولوگيالىق تازالىعىن قامتاماسىز ەتۋ ءۇشىن ەلدى مەكەندەردى تۇراقتى ۋربانيزاتسيالاۋ جانە ساپالى جوسپارلاۋ سالاسىنداعى بۇۇ-مەن ءوزارا ءىس-قيمىلدىڭ پەرسپەكتيۆالىق باعىتتارىن اتاپ ءوتتى. ەلىمىزدە قالا قۇرىلىسىنىڭ ينكليۋزيۆتىلىگىن, تۇراقتىلىعى مەن ەكولوگيالىق تازالىعىن قامتاماسىز ەتۋ ماقساتىندا بۇۇ-نىڭ وسى قۇرىلىمىمەن ىنتىماقتاستىقتى جانداندىرۋ تۋرالى ۋاعدالاستىقتارعا قول جەتكىزىلدى.
كەزدەسۋلەردىڭ قورىتىندىسى بويىنشا تاراپتار ءوزارا مۇددەلىلىك بىلدىرەتىن بۇۇ كۇن تارتىبىندەگى ماسەلەلەر بويىنشا تىعىز ءوزارا ءىس-قيمىل جاساۋعا كەلىستى.
