ءىس-شاراعا اۋىل شارۋاشىلىعى, ساۋدا جانە ينتەگراتسيا, سۋ رەسۋرستارى جانە يرريگاتسيا, عىلىم جانە جوعارعى ءبىلىم مينيسترلىكتەرىنىڭ, شىعىس قازاقستان جانە باسقا دا وبلىس اكىمدىكتەرىنىڭ, س.سەيفۋللين اتىنداعى قازاتۋ, سالالىق قوعامدىق ۇيىمداردىڭ وكىلدەرى, اۋىل شارۋاشىلىعى تاۋارىن وندىرۋشىلەر مەن ساراپشىلار قاتىستى.
ءىسساپار بارىسىندا دەپۋتاتتار اۋىل شارۋاشىلىعى نىساندارىنا «ۆوستوك-مولوكو» كورپوراتسياسى», «بوبروۆكا+» جانە «مايلى داقىلداردىڭ تاجىريبەلىك شارۋاشىلىعى» سەرىكتەستىكتەرىنە بارىپ, ءسۇت تاۋارلارى فەرمالارىنىڭ جانە سىر وندىرەتىن جاڭارتىلعان تسەحتىڭ جۇمىسىمەن تانىستى.
وتىرىستى اشقان سەرىك ەگىزباەۆ شىعىس قازاقستان وبلىسىنا كەلگەندەگى باستى ماقسات – ەلىمىزدەگى ءسۇت سالاسىنداعى جوبالاردىڭ جاعدايى مەن فەرمەرلەردىڭ تاجىريبەسىن قاراۋ ەكەنىن اتاپ ءوتتى.
– ستاتيستيكالىق مالىمەتتەرگە سۇيەنسەك, قازىر ەلدە 6 ملن توننادان استام ءسۇت وندىرىلەدى. سونىڭ تەك 2 ميلليونعا جۋىعى, ياعني 30 پايىزى وڭدەلەدى. بۇل وسى سالانىڭ دامۋىن قاناعاتتاندىرا الماي وتىر. وسىعان بايلانىستى مەملەكەت باسشىسى قاسىم-جومارت توقاەۆ جالپى اۋىل شارۋاشىلىعى ءونىمىن وڭدەۋدى 70 پايىزعا جەتكىزۋ جونىندە مىندەت قويدى. قازىرگى تاڭدا رەسپۋبليكانى 95 پايىز شيكى سۇتپەن قامتىساق تا, 4 ملن تونناعا جۋىق ءسۇت وڭدەلمەي قالىپ وتىر. سوندىقتان ءبىزدىڭ دۇكەندەردە بەلارۋس, رەسەي ەلدەرىنەن كەلگەن ونىمدەردىڭ باسىم ەكەندىگى جاسىرىن ەمەس, – دەدى دەپۋتات.
سونىمەن قاتار سەرىك ەگىزباەۆ ءسۇت ءوندىرۋ سالاسىنداعى كادر تاپشىلىعى ماسەلەسىنە دە نازار اۋداردى. دەپۋتاتتىڭ ايتۋىنشا, اۋىلدىق جەرلەردەگى ءسۇت فەرمالارىندا جاستاردىڭ جۇمىس ىستەۋگە ىنتالارى جوق. سوندىقتان جاستارعا سۋبسيديا ارقىلى تۇرعىن ءۇي سالۋ ماسەلەسىن دە كوتەردى.
جيىن بارىسىندا اۋىل شارۋاشىلىعى ۆيتسە-ءمينيسترى ەربول تاسجۇرەكوۆ, حالىقارالىق ساراپشى الەكساندر ۆالەبنىي, رەسپۋبليكالىق ءسۇت پالاتاسىنىڭ اتقارۋشى ديرەكتورى ازامات ساعىنباەۆ, اۋىل شارۋاشىلىعى تاۋار وندىرۋشىلەرى فاريد ابىتاەۆ جانە ارمان ۋاتاەۆ ءسۇت ءوندىرۋ سالاسىنىڭ دامۋىنا قاتىستى ءوز پىكىرلەرىن ايتتى.
وتىرىستا ءسۇتتى مال شارۋاشىلىعىنداعى ءوندىرۋ جانە وڭدەۋ, شيكىزاتتىڭ ساپاسى, مەملەكەتتىك قولداۋ, جەم-ءشوپ ءوندىرۋ, ۆەتەريناريا, سەلەكتسيالىق-اسىل تۇقىمداندىرۋ جۇمىستارى, كادر دايارلاۋ جانە تاعى باسقا وزەكتى ماسەلەلەر تالقىلاندى. اتاپ ايتقاندا, قاتىسۋشىلار ءسۇت ونىمدەرىن وڭدەۋ سەگمەنتىنىڭ دامىماعانىن جانە ونىڭ يمپورتقا تاۋەلدىلىگىن, جاڭا تەحنولوگيالاردى مەڭگەرگەن جانە ولارمەن جۇمىس ىستەۋ داعدىسى بار مامانداردىڭ تاپشىلىعىن جانە اسىل تۇقىمدى مالدىڭ ساپاسىن باعالاۋدىڭ حالىقارالىق جۇيەلەرى مەن ينتەگراتسيالاۋ دەڭگەيىنىڭ تومەندىگىنە توقتالدى.
كوشپەلى وتىرىس قورىتىندىسى بويىنشا ۇكىمەتكە ءسۇت ءوندىرۋ سالاسىنىڭ پروبلەمالارىن شەشۋ جولدارى جونىندە ءتيىستى ۇسىنىمدار جولداناتىن بولادى.
