KZgovernment
تامىز ايىندا پرەزيدەنت قاسىم-جومارت توقاەۆ «ارسەلورميتتال تەمىرتاۋ» اق-دا ورىن العان اپات كەزىندە كومپانيانىڭ ينۆەستيتسيالىق جانە وزگە دە مىندەتتەمەلەرىن ورەسكەل بۇزعانىن سىنعا الدى. مەملەكەت باسشىسى امت-مەن ينۆەستيتسيالىق ىنتىماقتاستىقتى توقتاتۋ جونىندە تاپسىرما بەرگەن بولاتىن. ەل ۇكىمەتى «ارسەلورميتتال تەمىرتاۋ» يەلەرىمەن ArcelorMittal كومپانياسىن مەتاللۋرگيالىق كومبينات قۇرامىنان شىعارۋ مۇمكىندىگى تۋرالى كەلىسسوزدەر جۇرگىزدى. كەلىسسوزدەر 2022 جىلدىڭ 3 قاراشاسىندا امت-نىڭ ەنشىلەس كاسىپورنى – لەنين اتىنداعى شاحتادا بولعان قايعىلى اپاتتان كەيىن باستالىپ, ۇكىمەت «ارسەلورميتتال تەمىرتاۋ» كومپانياسىنا ناقتى تالاپتار قويدى. كەلىسسوزدەر ناتيجەسىندە 2022 جىلعى 9 جەلتوقساندا قازاقستان ۇكىمەتى مەن ArcelorMittal اراسىندا قازاقستان تاراپىنا كاسىپورىندى باعالاۋ جانە اۋديت جۇرگىزۋگە مۇمكىندىك بەرەتىن «Standstill Agreement» كەلىسىمىنە قول قويىلدى.
مينيستر كەلىسسوزدەر بارىسىندا ArcelorMittal $3,5 ملرد سۇراعانىن, بۇل حالىقارالىق كونسۋلتانتتاردىڭ ەسەبىنە سايكەس كەلمەيتىنىن ايتتى. «بۇل كەلىسسوزدەر ۇدەرىسىنىڭ ۇزاققا سوزىلۋىنىڭ باستى سەبەپتەرىنىڭ ءبىرى بولدى. ءبىزدىڭ ماقساتىمىز – قىمبات جانە ۇزاققا سوزىلاتىن حالىقارالىق سوت پروتسەستەرىنە جول بەرمەي, كومبيناتتى ءادىل باعامەن ساتىپ الۋ بولدى. كاسىپورىننىڭ توقتاپ قالماۋى ءۇشىن كەلىسسوزدەردى جەدەل ءارى جىلدام جۇرگىزۋدىڭ قاجەتتىلىگى تۋىندادى», دەدى قانات شارلاپاەۆ. 11 راۋندتان تۇرعان كەلىسىم وڭ ناتيجە بەردى. «قازاقستان ۇكىمەتى مەن «ارسەلورميتتال» اراسىنداعى كەلىسىمدى مەگا-مامىلە دەپ اتاۋعا بولادى, ونىڭ ەلىمىز ءۇشىن ماڭىزى ەرەكشە. ءبىز باسقا ەلدەردىڭ ۇكىمەتتەرى تاپ بولاتىن كوپتەگەن تاۋەكەلدەردى اينالىپ وتە الدىق», دەدى مينيستر.
ول سونداي-اق جاسالعان مامىلەنىڭ ءۇش نەگىزگى ەلەمەنتىن جاريالادى: ق.شارلاپاەۆ كەلىسىمنىڭ بىرنەشە تيىمدىلىگىن اتادى. اتاپ ايتقاندا, مەملەكەت اكتيۆتەر قۇنىن $3,5 ملرد-تان $286 ملن-عا دەيىن تومەندەتتى. مامىلەنى جۇزەگە اسىرۋعا مەملەكەتتىك بيۋدجەتتەن ەشقانداي قاراجات جۇمسالعان جوق. جاڭا ينۆەستور ArcelorMittal باس كومپانياسىنىڭ الدىندا 4 جىل ىشىندە $250 ملن سوماسىنداعى قىسقا مەرزىمدى نەسيەنى جانە $450 ملن ۇزاق مەرزىمدى نەسيەنى وتەۋ بويىنشا مىندەتتەمە الاتىن بولدى.
«$286 ملن – بۇل تولىق جۇمىس ىستەپ تۇرعان ەكى كاسىپورىننىڭ قۇنى ەكەنىن ەرەكشە اتاپ وتكىم كەلەدى. سونىمەن قاتار ArcelorMittal قازاقستان ۇكىمەتىنە ەشقانداي تالاپ قويمايدى. كەلىسىم حالىقارالىق قۇقىق نورمالارىن تولىق ساقتاي وتىرىپ, قۇقىقتىق نەگىزدە جاسالدى», دەدى قانات شارلاپاەۆ.
بۇدان بولەك كەلىسسوز بارىسىندا ArcelorMittal كومپانياسى «قازاقستان حالقىنا» قايىرىمدىلىق قورىنا 16 ميلليارد تەڭگە جارنا اۋداراتىن بولدى. بۇل قارجى قاراعاندى وبلىسى تۇرعىندارىنىڭ وزەكتى ماسەلەلەرىن شەشۋگە جانە الەۋمەتتىك ماڭىزى بار جوبالاردى جۇزەگە اسىرۋعا جۇمسالادى. سونداي-اق بۇل سومانىڭ 50%-ى تەمىرتاۋ قالاسىنا بولىنبەك.
