بۇل يگىلىكتى ىسكە ۇيىتقى بولعان – وبلىس اكىمى بەيبىت يساباەۆتىڭ ءوزى. بىلتىر عانا جەتىسۋ وبلىستىق فيلارمونياسىنىڭ قۇرىلۋىنا مۇرىندىق بولعان ءوڭىر باسشىسى قوعام زيالىلارىمەن اقىلداسا كەلە جەتىسۋدىڭ ءان ونەرىن اسقاقتاتقان الىپ تۇلعا دانەشتىڭ مۇراسىن دارىپتەۋدى تاپسىرعان ەدى. مىنە, سول ماقسات-مۇددەنىڭ نەگىزىندە تالدىقورعانداعى وبلىستىق فيلارمونيا عيماراتىنىڭ توبەسىنە ايدىك ءانشىنىڭ ەسىمى جازىلدى. وسى وقيعاعا وراي ءوڭىر ورتالىعىندا «جەتىسۋ ءدۇلد ۇلى» اتتى مەرەكەلىك كونتسەرت ۇيىمداستىرىلدى.
تالدىقورعان قالاسىنداعى نازارباەۆ كوشەسى, 101-ءۇيدىڭ قابىرعاسىنا «بۇل ۇيدە قازاقستاننىڭ حالىق ءارتىسى دانەش راقىشەۆ تۇرعان» دەگەن جازۋى بار تاقتا ورناتىلدى. ءىس-شاراعا وبلىس اقساقالدارى, مادەنيەت سالاسىنىڭ وكىلدەرى قاتىستى. ارنايى قوناقتاردىڭ ءبىرى حالىق ءارتىسى رامازان ستامعازيەۆ جەتىسۋلىقتارعا ءوزىنىڭ ىزگى تىلەگىن ءبىلدىردى.
«بۇگىنگى كۇن جەتىسۋ جۇرتشىلىعىنىڭ عانا ەمەس, تۇتاس قازاق ونەرىنىڭ قۋانىشى دەپ بىلەمىن. قازاقتىڭ ءان ونەرىنە ۇلكەن ۇلەس قوسقان دانەش اعامىز تۇرعان قاسيەتتى شاڭىراققا تاقتا ورناتىلىپ وتىر. مەن ساڭلاق ءانشىنى ەڭ العاش رەت ونەر بايقاۋىندا كوردىم, وندا بايقاۋعا قازىلىق ەتۋگە كەلدى. سول شاقتا تانىستىم, ادامگەرشىلىگىنە, تالانتىنا ءتانتى بولدىم. بۇگىندە دانەش اعانىڭ شاكىرتتەرى – ونەردە ءوز ورىندارىن تاپقان بەلگىلى انشىلەر. دانەش راقىشەۆتىڭ ەسىمى قازاق ونەرىمەن بىرگە جاساي بەرەدى», دەدى ول.
تالدىقورعان قالالىق ارداگەرلەر كەڭەسىنىڭ توراعاسى اقشاباي كەرىمبەكوۆ, دانەش راقىشەۆتىڭ قىزى گۇلنار جانە ءانشىنىڭ شاكىرتتەرى ءسوز الىپ, كوپشىلىككە قۇتتىقتاۋ لەبىزدەرىن جەتكىزدى.
اتاپ وتسەك, وبلىستىق فيلارمونياعا قازاقستاننىڭ حالىق ءارتىسى, ءانشى, كومپوزيتور دانەش راقىشەۆتىڭ ەسىمى بەرىلۋىنە وراي فيلارمونيا عايماراتىندا ارنايى كونتسەرت ءوتتى. وعان دانەش راقىشەۆتىڭ ءتول شاكىرتتەرى, اتاپ ايتقاندا, قازاقستاننىڭ ەڭبەك سىڭىرگەن ءارتىسى مىرزاحمەت مۇقامانوۆ, قازاقستاننىڭ ەڭبەك سىڭىرگەن قايراتكەرى باقبەرگەن اسقاربەكوۆ, مادەنيەت قايراتكەرى ابىلايحان قارمىسوۆ, سەرىكبول شىنىباەۆ, نۇرجان جانپەيىسوۆ جانە ءىزىن جالعاستىرۋشى, مادەنيەت سالاسىنىڭ ۇزدىكتەرى, ارافات ىسقاقوۆ, حالىقارالىق بايقاۋلاردىڭ لاۋرەاتى قۇرالاي شاياحمەتوۆا سىندى ونەر مايتالماندارى قاتىستى. سونىمەن قاتار حالىق ءارتىسى رامازان ستامعازيەۆ تە ءوز ونەرىن پاش ەتتى. كونتسەرتتە مۇقان تولەباەۆ اتىنداعى حالىق اسپاپتار وركەسترى, «جەتىسۋ سازى» فولكلورلى-ەتنوگرافيالىق ءانسامبلى جانە وبلىس ونەرپازدارى ونەر كورسەتتى.
«دانەش راقىشەۆ – قاراپايىم ءومىر كەشكەن ادام. جاركەنت ءوڭىرىنىڭ تالدى اۋىلىندا تۋىپ, ءتورت جاسىندا زورلاپ كولحوزداستىرۋ زاردابىنان قاشقان وتباسىمەن بىرگە شىعىس تۇركىستان اسىپ كەتەدى. ونىڭ مىنەز-قۇلقى, ونەرگە قۇشتارلىعى قازاقى ورتادا قالىپتاسادى. اكەسى راقىش اۋىل اراسىندا ايتىسقا قاتىسقان اقىن, ءانشى, سەرى مىنەزدى كىسى بولىپتى, ال شەشەسى ءتاجىحان ءانشى ەكەن, قايىم ايتىسقا دا قاتىسقان كىسى دەيدى. راقىش ەكەۋى سونداي ايتىس ۇستىندە تابىسىپتى. داكەڭنىڭ تاپقان شەشەسىمەن قاتار, اقمانار اتتى باققان شەشەسى دە بولعان. اقمانار بەت بىتكەننىڭ ادەمىسى, اسا اجارلى ايەل بولىپتى, تيگەنى راقىشتىڭ جاقىن اعايىنى, جازۋشى, مارقۇم ءىنىمىز تۇرسىنعازى الپەيىسوۆتىڭ تۋىسى ەكەن. سەرى جىگىت پەن سۇلۋ كەلىنشەك كوڭىل قوسىپ, راقىش الىپ قاشىپ ۇيلەنىپ, اعايىن اراسى ءبىراز دۇربەلەڭگە ءتۇسىپتى. اقىرى اقساقالدار اشۋدى اقىلعا جەڭدىرىپ, ەكى جاقتى ەبىن تاۋىپ تاتۋلاستىرىپتى. اكەنىڭ قانىندا بار سول سەرىلىك داكەڭە دە سەرىك بولىپتى. ون جاسىنان ولەڭ ايتىپ كوزگە ىلىنسە, ون بەسىندە سەرى بالا اتانىپتى. اۋەلى سىرناي تارتىپ ءان سالسا, كەيىن دومبىراعا ءبىرجولا اۋىپتى», دەيدى جازۋشى بەكسۇلتان نۇرجەكەەۆ.
ەسكە سالساق, دانەش راقىشەۆ 1986 جىلى قازاق كسر حالىق ءارتىسى اتاعىنا يە بولدى. قازاقتىڭ ءان قورجىنىنا 150-دەن استام اسەتتىڭ اندەرىن, حالىق اندەرىن, باسقا دا حالىق كومپوزيتورلارى مەن قىرعىز اندەرىن, قازاقستان كومپوزيتورلارىنىڭ جانە 100-گە جۋىق ءوز ءانىن اسقان شەبەرلىكپەن ورىنداپ قالدىردى. جەتىسۋدا دانەش راقىشەۆتىڭ ەسىمى انشىلىك-ورىنداۋشىلىق مەكتەبىن قالىپتاستىرۋشى تۇلعا رەتىندە تاريحتا قالدى. 90-جىلدارى تالدىقورعانداعى قازاق مەكتەپ-ينتەرناتىندا جانە جەتىسۋ مەملەكەتتىك ۋنيۆەرسيتەتى مۋزىكا فاكۋلتەتىندە ءوز كلاسىن اشىپ, تالاپتى بالالار مەن جاستاردى انشىلىككە باۋلىدى.
جەتىسۋ وبلىسى
