فوتو: Aqorda_resmi
«بۇل جۇمىستى مىندەتتى تۇردە سوڭىنا دەيىن جەتكىزۋىمىز كەرەك. ايتپەسە, حالىققا زيانى كوپ. ەكولوگيا ماسەلەسى وتە وتكىر ءارى وزەكتى. سوندىقتان بۇل ماسەلەگە باسا ءمان بەرۋ قاجەت», دەدى پرەزيدەنت.
بۇدان بولەك, ءىرى كومپانيالاردىڭ وكىلدەرى مەملەكەت باسشىسىنا وزدەرىنىڭ ينۆەستيتسيالىق جوبالارىن تانىستىردى.
اتاپ ايتقاندا, ERG باس ديرەكتورى سەرىك شاحاجانوۆ اقتوبە وبلىسىندا ەكولوگيالىق ستراتەگيانىڭ ىسكە اسىرىلۋى جونىندە باياندادى. وسى ماقساتتا 2030 جىلعا دەيىن 228 ميلليارد تەڭگە كولەمىندە ينۆەستيتسيا قۇيۋ جوسپارلانىپ وتىر. اتالعان ستراتەگيا شەڭبەرىندە اقتوبە فەرروقورىتپا زاۋىتىنداعى №1, 2 بالقىتۋ تسەحتارىنىڭ گاز تازارتۋ جۇيەسىن جاڭعىرتۋ جۇمىستارى اياقتالدى.
«سنپس-اقتوبەمۇنايگاز» اق باس ديرەكتورى لي شۋفەن قاسىم-جومارت توقاەۆقا مۇناي مەن گازدى دايىنداۋ ىسىندە زاماناۋي تەحنولوگيانىڭ ەڭ جوعارى ستاندارتتارىنا ساي كەلەتىن جاڭاجول مۇناي-گاز وڭدەۋ كەشەنىنە قاراستى ءۇشىنشى گاز وڭدەۋ زاۋىتىنىڭ (گوز-3) ءبىرىنشى, ەكىنشى جانە ءۇشىنشى كەزەكتە جۇزەگە اسىرىلاتىن جوبالارى تۋرالى ايتتى. جالپى ينۆەستيتسيا كولەمى – 3,5 تريلليون تەڭگە.
Eni Plenitude Arm Wind كومپانياسىنىڭ باسقارۋشى ديرەكتورى الەكس ستيللاۆاتو قاسىم-جومارت توقاەۆقا قازاقستان اۋماعىندا ىسكە اسىرىلعان جوبالار تۋرالى اقپارات بەردى. اتاپ ايتقاندا, كاسىپورىن اقتوبە وبلىسىندا «بادامشا-1», «بادامشا-2» جەل ەلەكتر ستانتسيالارىنىڭ, تۇركىستان وبلىسى ءشاۋىلدىر كەنتىنىڭ جانىندا قۋاتى 50 مۆت بولاتىن ءبىرىنشى كۇن ەلەكتر ستانتسياسىنىڭ قۇرىلىسىن جۇزەگە اسىرعان. سونداي-اق ول ماڭعىستاۋ وبلىسى جاڭاوزەن قالاسىنىڭ ماڭىندا «قازمۇنايگاز» ۇك اكتسيونەرلىك قوعامىمەن بىرلەسىپ, قۋاتى 250 مۆت بولاتىن جاڭارتىلاتىن ەنەرگيا كوزدەرى+گاز گيبريدتى ەلەكتر ستانتسياسىنىڭ جوباسى ازىرلەنىپ جاتقانىن ايتتى.
KazFeltec جشس باسشىسى ەرلان جاڭابەرگەنوۆ مەملەكەت باسشىسىنا قوي جۇنىنەن ەكولوگيالىق تازا ءارى جىلۋ ساقتايتىن ماتەريالدار شىعاراتىن زاۋىتتى ىسكە قوسۋ جوباسىن تانىستىردى. نىسانعا جالپى كولەمى 5,3 ميلليارد تەڭگە ينۆەستيتسيا سالۋ كوزدەلىپ وتىر.
AqtobeCem كومپانياسىنىڭ باس ديرەكتورى ستانيسلاۆ ششەرباكوۆ قاسىم-جومارت توقاەۆقا اقتوبە وبلىسىندا جالپى سوماسى 70 ميلليارد تەڭگە بولاتىن تسەمەنت كلينكەر وندىرەتىن زاۋىتتىڭ جوباسىن ۇسىندى.
«قازاقبيتۋم» كومپانياسىنىڭ باقىلاۋشى كەڭەسىنىڭ توراعاسى بەكجان مامىت پرەزيدەنتكە سوماسى 32,2 ميلليارد تەڭگەنى قۇرايتىن بيتۋم زاۋىتى-تەرمينالىن سالۋ جوباسى تۋرالى ايتتى.
كەزدەسۋ سوڭىندا مەملەكەت باسشىسى كاسىپكەرلەردىڭ قولعا العان جوبالارىنىڭ تابىستى جۇزەگە اسىرىلۋىنا تىلەكتەستىك ءبىلدىردى.
