«فەستيۆال دارىندى جاستاردى انىقتاۋعا كومەكتەسەدى. سول سياقتى دارىندى بالالار مەن ۇجىمداردىڭ شىعارماشىلىق دامۋىنا ىقپال ەتەدى. ستۋدەنت جاستاردىڭ مادەني الەۋەتى شەكسىز. جاستار شىعارماشىلىق فەستيۆالگە قاتىسۋ ارقىلى قازىرگى جاستاردىڭ بەلسەندى ازاماتتىق ۇستانىمىن, الەۋمەتتىك جاۋاپكەرشىلىگىن, پاتريوتتىق سەزىمدەرىن, ادامگەرشىلىك قۇندىلىقتارى مەن كوشباسشىلىق قاسيەتتەرىن قالىپتاستىرا تۇسەدى دەپ سەنەمىن», دەدى استانا قالاسى جاستار ساياساتى ماسەلەلەرى باسقارماسىنىڭ ءبولىم باسشىسى باعدات اتىمتاي.
فەستيۆالدىڭ كونكۋرستىق باعدارلاماسىنا استانانىڭ 15 ۋنيۆەرسيتەتى قاتىسادى. ولار مىنا نوميناتسيالار بويىنشا ۇزدىكتەردى انىقتايدى: ەسترادا, ۇلتتىق بي, زاماناۋي بي, مۋزىكالىق اسپاپتار, شاحمات, پوەزيا, مەديا, تەاتر, سۋرەت, Qazaq Quiz.
«Jastar Jalyny-2023» فەستيۆالىنىڭ قازىلار القاسىنىڭ قۇرامى ەلىمىزدىڭ ەڭ تاجىريبەلى ماماندارىنان قۇرالدى. نوميناتسيالار بويىنشا ونەر جانە مادەنيەت قايراتكەرلەرى, ەلىمىزدىڭ ەڭبەك سىڭىرگەن ارتىستەرى, كاسىبي حورەوگرافتار مەن ۆيدەوگرافتار باعالايدى.
كونكۋرس جەڭىمپازدارى اقشالاي سەرتيفيكاتتارمەن ماراپاتتالادى. سىياقى قورى: 1-ورىن – 100 مىڭ تەڭگە (10 دانا); 2-ورىن – 70 مىڭ تەڭگە (10 دانا); 3-ورىن – 50 مىڭ تەڭگە (10 دانا); گران-پري – 500 مىڭ تەڭگە.
«Jastar jalyny-2023» بايقاۋى جاستار ساياساتى سالاسىنداعى باسىمدىقتار مەن مىندەتتەردى ىسكە اسىرۋ, قالا جاستارىنىڭ شىعارماشىلىق دامۋىنا جاعداي جاساۋ, ستۋدەنت جاستاردىڭ رۋحاني-مادەني الەۋەتىن دامىتۋ ماقساتىندا وتكىزىلەدى.
«Jastar Jalyny-2023» جاستار شىعارماشىلىق فەستيۆالىنىڭ سالتاناتتى جابىلۋ ءراسىمى 13 جەلتوقسان كۇنى «استانا» كونتسەرت زالىندا وتەدى.
