سۋرەتتى تۇسىرگەن – ەرلان ومار, «ەQ»
وسىمەن ءتورتىنشى جىل قاتارىنان ۇيىمداستىرىلعان سىيلىق ۆولونتەرلەر قوزعالىسىن دامىتۋعا جانە قولداۋعا, الەۋمەتتىك جانە قوعامعا پايدالى مىندەتتەردى شەشۋگە ەلەۋلى ۇلەس قوسقان وتاندىق جانە حالىقارالىق ۆولونتەرلەر مەن ۆولونتەرلەر توپتارىن, ۆولونتەرلەر ۇيىمدارىن كوتەرمەلەۋگە جانە ىنتالاندىرۋعا باعىتتالعان.
مادەنيەت جانە اقپارات ۆيتسە-ءمينيسترى دانيار قادىروۆ ۆولونتەرلەردى حالىقارالىق مەرەكەمەن قۇتتىقتاي كەلە, بۇگىندە ەلىمىزدە ۆولونتەرلىك سالا وتە قارقىندى دامىپ كەلە جاتقانىن اتاپ كورسەتتى. بۇل قىزمەتكە اتسالىسىپ جۇرگەن ازاماتتار مەن ۇيىمدار سانىنىڭ تۇراقتى ارتۋى قالىپتى جاعدايعا اينالعانىنا توقتالدى.
– كەيىنگى ون جىلدا, – دەپ جالعاستىردى ءسوزىن ۆيتسە-مينيستر. – ەرىكتىلەر قاتارى 4 ەسەگە ءوستى. قازىر رەسپۋبليكادا 600-دەن اسا ۆولونتەرلىك ۇيىم, 250 مىڭنان استام ۆولونتەر بار. سايكەسىنشە, ۆولونتەرلەردىڭ قاتىسۋىمەن ىسكە اسىرىلاتىن باعدارلامالار مەن جوبالاردىڭ اۋقىمى كەڭەيدى. «جىل ۆولونتەرى» سىيلىعىنا جەڭىمپازداردى ىرىكتەۋ ەكى ساتى بويىنشا جۇرگىزىلدى. باستاپقىدا تاۋەلسىز ساراپشىلار ءوتىنىم بەرگەندەردى قوعامعا ماڭىزى مەن الەۋمەتتىك جەلىدەگى بەلسەندىلىگىنە قاراپ, كەلەسى كەزەڭگە وتكىزدى. ال ەكىنشى ساتىدا مينيسترلىك جانىنان قۇرىلعان كوميسسيا مۇشەلەرى اشىق داۋىس بەرۋ ارقىلى شەشىم قابىلدادى.
مەرەكەلىك كەشكە رەسپۋبليكانىڭ تۇكپىر-تۇكپىرىنەن ۆولوتەرلىكتى سەرىك ەتكەن بەلسەندى ۆولونتەرلەر ارنايى كەلدى. بۇل جولى قوعام بەلسەندىلەرى 15 الەۋمەتتىك ماڭىزى بار اتالىم بويىنشا ىرىكتەلگەن. «دەنساۋلىق ساقتاۋدى دامىتۋعا بەلسەندى قاتىسقانى ءۇشىن» وزبەكستان مەملەكەتى تاشكەنت قالاسىنان جاسۋربەك كاميلوۆ, قازاقستاننىڭ جەتىسۋ وبلىسىنان قازىنا ورىنبەكوۆا مەن بايعالىق بياحمەت ماراپاتتالدى. ال «بەيبىتشىلىكتى, دوستىق پەن كەلىسىمدى نىعايتۋعا قوسقان ۇلەسى ءۇشىن» پاۆلودارلىق ۆەنەرا سماعۇلوۆا مەن استانالىق ديانا مىرزاعاليەۆا, «توتەنشە جاعدايلاردى جويۋعا بەلسەنە قاتىسقانى ءۇشىن» جەتىسۋ وبلىسىنان حوليدا كۋسانوۆا, ەكىباستۇز قالاسىنان سامال دۇيسەنباەۆا, شىمكەنت قالاسىنان اباي سىرلىباەۆ, پەتروپاۆل قالاسىنان ابدين دامير, تۇركىستان وبلىسىنان اقمەيىر نارمۇراتوۆا جىل ۇزدىكتەرى اتاندى. «سالاماتتى ءومىر سالتىن ناسيحاتتاۋعا بەلسەندى قاتىسقانى ءۇشىن» اباي وبلىسىنان رۋسلان بۋتاناەۆ, استانا قالاسىنان دانا تاكەنوۆا, پاۆلودار قالاسىنان ۆيكتور كارياگين, جەتىسۋ وبلىسىنان جانسەرىك بايدەنوۆ ارنايى سىيلىق يەلەندى. ء«ىز-ءتۇسسىز جوعالعان ادامداردى ىزدەۋگە بەلسەندى قاتىسقانى ءۇشىن» اتالىمىمەن ماراپاتتالعان ۇزدىكتەر قاتارىندا قوستانايلىق ولەسيا لوگوشينوۆاچەۆسكايا, تالدىقورعاننان ەكاتەرينا سەرەدينا, استانالىق «Qanat» ۆولونتەرلىك قوزعالىسى» باستاماشىل توبى, ەكىباستۇز قالاسىنان ولەسيا ۆوليكوۆا دا بار.
«ۇزدىك ۆولونتەرلىك ۇيىم» اتالىمى بويىنشا «Lider.kz», «استانا اقپەيىلدىلەر كلۋبى» ۆولونتەرلەر قوعامى, «VITA» پاۆلودار قالاسىنىڭ ىزدەۋشىلەرى» قوعامدىق بىرلەستىگى, «شىمكەنت قالالىق ACCESS تۇلەكتەرى «ASAA»» جاستار قوعامدىق بىرلەستىگى جەڭىمپاز بولدى. «ۇزدىك الەۋمەتتىك كومەكشى» اتالىمىندا جىل ۆولونتەرى تاراز قالاسىنان ازامات نامەلبەك, كوكشەتاۋ قالاسىنان ەربول امانتاەۆ, قوستانايدان اناستاسيا پۋشكارەۆا اتاندى.
– الەۋمەتتىك باعىتتاعى ۆولونتەرلىكپەن اينالىسىپ جۇرگەنىمە 14 جىلداي بولدى. بىلتىر «جەڭىس» جوباسىن دا قولعا الدىق. يگى ءىس اياسىندا جالعىزباستى نەمەسە از قامتىلعان ارداگەرلەر مەن تىل ەڭبەككەرلەرىنە كومەك قولىن سوزدىق. پاندەميا تۇسىندا دا حالىقتىڭ وسال توپتارىنا جاردەمدەستىك. ءدارى-دارمەك, ازىق-تۇلىك ۇلەستىردىك. سول بەلسەندىلىگىمىز ءۇشىن مەملەكەت باسشىسى قاسىم-جومارت توقاەۆ تاعايىنداعان «حالىق العىسى» ارنايى مەدالىمەن ماراپاتتالدىم. قازىر توپتا 55 ۆولونتەر بار. باسىم كوپشىلىگى ستۋدەنتتەر. قاتارىمىزدا جاسى 55-تەن اسقان ازاماتتار دا بار. ءبىز بۇل قايىرىمدىلىق شارالارىن الداعى ۋاقىتتا دا جالعاستىرا بەرەتىن بولامىز, – دەدى ۆولونتەر ا.پۋشكارەۆا.
