تەكسەرىس ناتيجەسىندە ۇشاق بيلەتتەرىن ۇشۋ كۇنى نەمەسە تاياۋ كۇندەردە ساتىپ العان كەزدە «Air Astana» جولاۋشىلاردىڭ بارلىق ساناتتارىنان 3 500-دەن 6 500 تەڭگەگە دەيىنگى مولشەردە جانارماي الىمىن نەگىزسىز الىپ, ونى قولدانۋدىڭ ماقساتى مەن قاعيداتىن ءىس جۇزىندە ءوز قالاۋىنشا رەتتەگەنى انىقتالدى. باسەكەلەستىكتى قورعاۋ جانە دامىتۋ اگەنتتىگىنىڭ حابارلاۋىنشا, وتىن الىمى تاسىمالداۋعا ارنالعان ءتاريفتىڭ قولدانىلۋ كەزەڭىندە اۆياوتىنعا جۇمسالاتىن شىعىنداردىڭ ءوسۋىن وتەۋ ماقساتىندا عانا الىنۋى مۇمكىن, ونى ەسەپتەۋ كەزىندە بۇل ءوسىمدى ەسكەرۋ مۇمكىن بولماپتى.
وسى رەتتە اۋە كومپانياسى مەن اگەنتتىك اراسىندا ىشكى باعىتتار بويىنشا مونوپوليالىق باعىتتارداعى باعانى تەجەۋگە باعىتتالعان مونوپولياعا قارسى كومپلاەنس جاسالدى. بىرىنشىدەن, 2023 جىلعى 6 جەلتوقساننان باستاپ جانارمايعا قوسىمشا اقى قولدانۋ الىپ تاستالادى. ياعني ۇشۋ كۇنىنە قاراماستان 2023 جىلعى 6 جەلتوقسانعا دەيىن جانارمايعا ۇستەمەاقى تولەنىپ, ساتىلعان بيلەتتەرگە قولدانىلمايدى. ماسەلەن, استانا – الماتى باعىتىنداعى بيلەتتىڭ ورتاشا باعاسى اعىمداعى باعانىڭ ورنىنا 28 435 تەڭگەدەن 24 435 تەڭگە بولادى (باعانىڭ تومەندەۋى 14%), الماتى – اقتاۋ باعىتىندا ورتاشا باعا قازىرگى 37 568 تەڭگەنىڭ ورنىنا 31 078 تەڭگەنى قۇرايدى (باعانىڭ 17%-عا تومەندەۋى). ەكىنشىدەن, 2024 جىلدىڭ سوڭىنا دەيىن ىشكى باعىتتار بويىنشا جولاۋشىلاردى اۆياتاسىمالداۋ قىزمەتتەرىنىڭ باعاسىن كوتەرۋ شەكتەلەدى. ۇشىنشىدەن, وسى جىلى جانە 2024 جىلعى 31 جەلتوقسانعا دەيىن «Air Astana» ورتاشا جانە تومەن باعامەن ساتىلاتىن بيلەتتەرىنىڭ سانى 70%-دان (ياعني Y, B, H برونداۋ كلاسىنىڭ تاريفتەرى بويىنشا تەك 30%) تومەن بولماۋعا ءتيىس.
«سونداي-اق اگەنتتىك كەلەسى جۇيەلى شارالارعا باستاماشىلىق جاسايدى: اگەنتتىكتىڭ باستاماسىمەن كولىك مينيسترلىگى «اۋا ەركىندىگىنىڭ» 5-دارەجەسىنە قولجەتىمدىلىكتى كەڭەيتۋ ماقساتىندا شەتەلدىك تاسىمالداۋشىلاردىڭ وتاندىق اۆياكومپانيالارمەن قاتار جەكەلەگەن اۋەجايلاردا مارشرۋتتار بويىنشا ۇشۋلاردى جۇزەگە اسىرۋ مۇمكىندىگىن كەڭەيتەتىن شارالار قابىلدادى. بۇل شەتەلدىك اۆياكومپانيالاردىڭ كەلۋىن ىنتالاندىرۋعا مۇمكىندىك بەرەدى, باسەكەلەستىككە وڭ اسەر ەتەدى جانە تۇتىنۋشىلاردىڭ تاڭداۋىن ارتتىرادى. سونىمەن قاتار اگەنتتىك جانارماي الىمىن الۋدى توقتاتۋدى كوزدەيتىن زاڭناماعا تۇزەتۋلەر ەنگىزۋگە باستاماشىلىق جاسادى», دەلىنگەن حابارلامادا.
