سالاداعى قۇرىلىمدار مەن ۇيىمدار وكىلدەرى, قوعام بەلسەندىلەرى قاتىسقان كەزدەسۋدە رەسمي رەڭك سەزىلگەن جوق, ەسەسىنە ەلگە قاجەتتى ۇسىنىس-پىكىرلەر باسا ايتىلدى. قازىر ەل اراسىندا تالقىعا ءتۇسىپ جۇرگەن «بەينەۋ-شالقار» اۆتوجولى جايلى ۇسىنىس بىلدىرگەن وبلىستىق قوعامدىق كەڭەس مۇشەسى بولات نۇرقوجاەۆ قوعامدىق تىڭداۋلاردا جۇرتشىلىق بۇل جولدى سەكسەۋىل ارقىلى سالۋدى سۇراپ وتىرعانىن ايتىپ, ونىڭ تيىمدىلىگىنە ءتۇرلى دالەلدەر كەلتىردى. بۇل ماسەلەنى ارال اۋدانىنان كەلگەن ازاماتتار دا كوتەردى.
وبلىستىق ارداگەرلەر كەڭەسى توراعاسىنىڭ ورىنباسارى ومىربەك شامەنوۆتىڭ پىكىرىنشە, جەرگىلىكتى جول سالاسىنداعى كومپانيالاردىڭ جۇمىسى ساپا جاعىنان شەتەلدىك ارىپتەستەرىنەن كەم تۇسپەيدى. تەحنيكامەن قامتىلۋى جاعىنان دا كەمشىن ءتۇسىپ جاتقان تۇسى جوق. «ايماق ءۇشىن ماڭىزدى جوبا – «باتىس ەۋروپا-باتىس قىتاي» ءاۆتودالىزىنىڭ قىزىلوردا مەن اقتوبە ارالىعىن 4 جولاقتىعا كەڭەيتۋ بارىسىندا وسى ماسەلە ەسكەرىلۋى كەرەك», دەدى ارداگەر.
– وسى جول 2010 جىلى باستالعاندا دا قوسالقى مەردىگەر رەتىندە جەرگىلىكتى كومپانيالار جۇمىس ىستەدى. قازىرگى جول ساپاسى ولاردىڭ ءوز جۇمىسىن جاقسى مەڭگەرگەندىگىن كورسەتەدى, – دەدى ومىربەك شامەنوۆ.
ءمينيستردىڭ ايتۋىنشا, قىزىلوردا مەن اقتوبە ارالىعىنداعى اۆتوجولدى 4 جولاقتىعا كەڭەيتۋ كەلەر جىلى باستالادى. قازىر اقتوبە وبلىسى اۋماعىنداعى جۇمىستار جوباسى ازىرلەنىپ قويعان. جالپى الداعى 5 جىلدا ەلىمىزدە 8 مىڭ شاقىرىم رەسپۋبليكالىق جول قايتا جاڭعىرتۋدان وتپەك. مينيستر وسى كۇنى وتاندىق جول كومپانيالارىنىڭ مۇنداي اۋقىمدى جوبالاردان قالىس قالماۋى قاداعالانىپ وتىرعانىن ايتتى.
كەزدەسۋدە «قىزىلوردا-جەزقازعان» اۆتوجولى جوباسى جايلى دا ءسوز بولدى. اسىرەسە قىزىلوردا وبلىسى اۋماعىندا قايتا جاڭعىرتۋ جۇمىستارى قارقىندى ءجۇرىپ جاتىر. كەلەر جىلى جولدىڭ ءبىراز بولىگى پايدالانۋعا بەرىلمەك.
– بۇگىنگى كەزدەسۋدە ەل سۇراۋىنا وراي «بەينەۋ-شالقار» جوباسىن ءبىراز تالقىلادىق. كوپ ۇسىنىس ايتىلدى. وسىعان بايلانىستى كەلەر جىل باسىندا تاعى دا قوسىمشا قوعامدىق كەڭەس وتكىزۋگە كەلىستىك, – دەدى كولىك ءمينيسترى مارات قاراباەۆ باق وكىلدەرىنە ارنالعان بريفينگتە.
قىزىلوردا
