ۋكراينانىڭ بۇل سپورت تۇرىندەگى ەڭ ەلەۋلى تابىسى – وليمپيا ويىندارىنىڭ قولا جۇلدەسى. 2004 جىلى افينادا ولار ايدى اسپانعا ءبىر-اق شىعارىپ, جەڭىس تۇعىرىنىڭ ءۇشىنشى ساتىسىنا كوتەرىلگەن ەدى. ودان بولەك, اتالعان مەملەكەتتىڭ قول دوبى شەبەرلەرى 2000 جىلى ەۋروپا چەمپيوناتىندا كۇمىس مەدالدى يەلەنسە, 2003 جىلى الەمدىك دودادا ءتورتىنشى ورىنعا تابان تىرەدى. دەسەك تە وسى جارىستا ۋكراينالىقتار دا قازاقستان سەكىلدى G توبىنىڭ فاۆوريتتەرىنە لايىقتى قارسىلىق كورسەتە المادى. ولار برازيليا (20:35) مەن يسپانيادان (20:32) ويسىراي ۇتىلدى. ءسويتىپ, توپتىق جارىستا كىمگە ءۇشىنشى ورىننىڭ بۇيىراتىنى وسى قوس كوماندا اراسىنداعى باسەكەدە شەشىلدى.
وكىنىشكە قاراي, وتانداستارىمىز بۇل ماتچتا دا وسالدىق تانىتتى. ۆيتالي اندرونوۆ باپتاعان كوماندا قاقپامىزعا 37 گول سوقتى. قازاقستان گاندبولشىلارىنىڭ 24 رەت قانا نىسانانى ءدال كوزدەۋگە شامالارى جەتتى. ءسويتىپ, ءبىز ءوز توبىمىزدا سوڭعى ورىندا قالىپ قويدىق. ال ءبىرىنشى ورىندى يسپانيا يەلەندى. پيرەنەي تۇبەگىنىڭ گاندبولشىلارى شەشۋشى ويىندا برازيليادان 27:25 ەسەبىمەن باسىم ءتۇستى. ەندى جارىستىڭ ەكىنشى كەزەڭى باستالادى. ودان كەيىن پلەي-وفف سايىستارىن تاماشالايمىز.
