سۋرەتتى تۇسىرگەن – دميتري ەروفەەۆ
سالتاناتتى ءىس-شاراعا وبلىس اكىمى بەيبىت يساباەۆپەن قاتار قازاقستان فۋتبول فەدەراتسياسىنىڭ پرەزيدەنتى ادىلەت بارمەنقۇلوۆ, فۋتبولدان ۇلتتىق قۇرامانىڭ باس باپكەرى ماگومەد اديەۆ تە قاتىستى.
كەيىنگى ۋاقىتتا سپورت سالاسىنداعى باستامالار وڭىردەگى جاستاردى جىگەرلەندىرىپ جاتىر. جينالعان كوپشىلىكتى قۋانىشتى وقيعامەن قۇتتىقتاعان وبلىس اكىمى جاستاردىڭ سپورتپەن شۇعىلدانىپ, بوس ۋاقىتىن ءتيىمدى وتكىزۋىنە مەملەكەت تاراپىنان بارىنشا جاعداي جاسالىپ وتىرعانىن اتاپ ءوتتى. ماسەلەن, بيىل 14 سپورت نىسانىنىڭ قۇرىلىسىنا وبلىس بيۋدجەتىنەن 8,1 ملرد تەڭگە ءبولىنىپ, سونىڭ التاۋى پايدالانۋعا بەرىلگەن. اتاپ ايتقاندا, سپورت كەشەندەرى, كۇرەس زالى, ورتالىق ستاديون سياقتى ماڭىزدى نىساندار.
«مەتسەناتتار, ءىرى كومپانيالار مەن ىرگەلى ۇيىمدار دا وسى ىسكە اتسالىسىپ كەلەدى. باتىرجان وڭعاروۆ اتىنداعى ورتالىق ستاديونىنىڭ فۋتبول الاڭىنا «قازاقستان فۋتبول فەدەراتسياسى» اسسوتسياتسياسىنىڭ دەمەۋشىلىگىمەن رەنوۆاتسيا جۇمىستارى جۇرگىزىلدى. فەدەراتسيا باسشىلىعىنا جەتىسۋلىقتاردىڭ اتىنان ريزاشىلىعىمدى بىلدىرەمىن. وسى الاڭنان تالانتتى بالالار سپورتتا جارقىراپ شىعادى دەپ سەنەمىن», دەدى ب.يساباەۆ.
ودان كەيىن ءسوز العان قازاقستان فۋتبول فەدەراتسياسىنىڭ پرەزيدەنتى ادىلەت بارمەنقۇلوۆ بولاشاق فۋتبول جۇلدىزدارى وسىنداي اۋىلدىق جەرلەردەن شىعاتىنىن, سوندىقتان جەرگىلىكتى جەرلەردە بالالاردى فۋتبولعا باۋلۋدىڭ ماڭىزى زور ەكەنىن جەتكىزدى. سول سياقتى قازاقستاننىڭ فۋتبولدان ۇلتتىق قۇراماسىنىڭ باس باپكەرى ماگومەد اديەۆ, جوبانىڭ باس دەمەۋشى كومپانياسىنىڭ وكىلى كيريلل ميليچكين, تالدىقورعان قالاسى قوعامدىق پالاتاسىنىڭ توراعاسى ۆيكتور بۋكوۆ تا كوكسۋلىقتارعا ىزگى تىلەگىن ءبىلدىردى.
قوناقتار نىساننىڭ لەنتاسىن قيعاننان كەيىن الاڭدا «جەتىسۋ» فۋتبول كومانداسى مەن كوكسۋ اۋدانىنىڭ فۋتبول كومانداسى اراسىندا جولداستىق كەزدەسۋ ءوتتى. ءىس-شارا سوڭىندا اۋىلدىڭ سپورتشى بالالارىنا 100 دوپ تاراتىلدى.
«باتىرجان وڭعاروۆ اتىنداعى ورتالىق ستاديونىنىڭ فۋتبول الاڭى جاڭارعان, جاڭعىرعان كەيىپتە پايدالانۋعا بەرىلىپ جاتقانى – ءبارىمىزدىڭ ورتاق قۋانىشىمىز. پرەزيدەنتىمىز قاسىم-جومارت توقاەۆ جولداۋىندا بۇقارالىق سپورتتى دامىتۋ, وعان مەيلىنشە كوڭىل ءبولۋ تۋراسىندا الدىمىزعا ۇلكەن مىندەت جۇكتەگەن ەدى. سول مىندەتتى ءمىنسىز اتقارۋدا ءبىرشاما جۇمىس جۇرگىزىلىپ كەلەدى. وسىنداي قولداۋلاردىڭ ناتيجەسىندە وسى اۋداننان دا كۇنى ەرتەڭ ەسىمىن الەم بىلەتىن ابىلسەيىت ايحانوۆ, امانجول بۇعىباەۆ, ماۋلەن مامىروۆ, نۇرباقىت تەڭىزباەۆ, اسحات جىتكەەۆ, ايدىن سماعۇلوۆ, جانىبەك ءالىمحان ۇلى سياقتى ەل ماقتانىشتارى شىعاتىنىنا سەنىمدىمىن. وڭىردەگى باسقا دا سپورت تۇرلەرىنە مەتسەناتتار مەن كاسىپكەرلەر دە قولداۋ كورسەتىپ جاتىر. مىسالى, جىل سوڭىنا دەيىن «جەتىسۋ» كاسىپقوي ۆولەيبول كلۋبىنىڭ سپورتشىلارىنا ارنالعان 4 قاباتتى تۇرعىن ءۇي عيماراتىنىڭ, كەلەسى جىلى ۇستەل تەننيسى ورتالىعىنىڭ قۇرىلىسى اياقتالادى. قايتا جاڭعىرعان ورتالىق ستاديون كوپتىڭ يگىلىگىنە جاراپ, جاستاردى جىگەرلەندىرىپ, سپورتتا بيىكتەرگە تالپىندىرا بەرسىن», دەدى ءا.بارمەنقۇلوۆ.
ونىڭ ايتۋىنشا, پرەزيدەنتتىڭ بۇقارالىق سپورتتى دامىتۋ تۋرالى تاپسىرماسىنا سايكەس قفف 2023 جىلدىڭ جازىندا «Alañ» فۋتبول الاڭدارىن جاڭارتۋ باعدارلاماسىن ىسكە قوسىلعان ەدى. باعدارلاما 3 جىلعا سوزىلادى جانە ۋەفا قولداۋىمەن جۇزەگە اسىرىلادى. وسى باعدارلاما اياسىندا بالپىق بي اۋىلىنداعى ب.وڭعاروۆ اتىنداعى ستاديوننىڭ فۋتبول الاڭى جاڭعىرتىلعان.
نەگىزى ءىس-شارانىڭ ماقساتى – سپورتتىق ينفراقۇرىلىمنىڭ ساپاسىن ارتتىرۋ, بالالار مەن جاسوسپىرىمدەر فۋتبولىن جانە بۇقارالىق فۋتبولدى دامىتۋ ءۇشىن قولايلى جاعدايلار جاساۋ. بۇعان دەيىن اقتوبە قالاسىنداعى №2 بجسم ستاديونىندا العاشقى جاڭارتىلعان الاڭ پايدالانۋعا بەرىلگەن ەدى. «Alañ» باعدارلاماسى اياسىندا ەل وڭىرلەرىندە جالپى سانى 20 فۋتبول الاڭىن وسىلايشا تەگىن جاڭارتۋ جوسپارلانعان.
ءوڭىر اكىمىنىڭ ءباسپاسوز قىزمەتىنىڭ مالىمەتىنشە, جالپى قۇرىلىس جۇمىستارىنىڭ قۇنى 197,8 ملن تەڭگەنى قۇراعان. قۇرىلىس بيىل قىركۇيەك ايىنان باستاپ جۇرگىزىلگەن. فۋتبول الاڭىنىڭ ەسكى جابىنى مەن توسەلگەن توپىراعى تۇگەلدەي الىنىپ, جاڭادان جاساندى جابىن توسەلدى. بەس قاباتتان تۇراتىن الاڭعا ءىرى تاستار, گەوتەكستيل, قيىرشىق تاس جانە ەڭ ۇستىڭگى قاباتىنا جاساندى جابىن توسەلىنگەن.
بۇعان قوسا سارقان قالاسىنداعى بالالار جانە جاسوسپىرىمدەر سپورت مەكتەبىنىڭ قاسىنداعى ورتالىق ستاديونىنىڭ جاڭا كەيپى دە اۋىل بالالارىنىڭ قۋانىشىن ەسەلەدى. ويىن الاڭى سول ماڭدا تۇراتىن بالالار مەن جاسوسپىرىمدەر ءۇشىن سالاماتتى ءومىر سالتىن ۇستاناتىن ورىنعا اينالىپ ۇلگەرگەن. تۇرعىنداردىڭ بوي جازىپ, سەرگۋىنە ىقپال ەتىپ, بوس ۋاقىت وتكىزەتىن سپورت نىسانىنىڭ زامان تالابىنا ساي جاڭارتىلعانىنا كوپ بولعان جوق.
«سارقان قالاسىنداعى ورتالىق ستاديوندى قايتا جاڭعىرتۋ جۇمىستارىن «نۇر شاپاعات قۇرىلىس» جشس جۇرگىزدى. 2022 جىلى 15 تامىزدا جاسالعان №226 كەلىسىمشارت بويىنشا قۇرىلىس جۇمىستارىنىڭ قۇنى 659 ملن 57 مىڭ تەڭگەنى قۇرادى. نىسان بيىل قازان ايىندا قولدانۋعا بەرىلدى. تاپسىرىس بەرۋشى – جەتىسۋ وبلىستىق قۇرىلىس باسقارماسى. جوعارى ستاندارتتارعا ساي سالىنعان فۋتبول الاڭى كورەرمەندەر مەن جانكۇيەرلەرگە ارنالعان جابىق تريبۋنالارمەن قامتاماسىز ەتىلگەن. سونداي-اق جۇگىرۋ جولاعى مەن سنارياد لاقتىراتىن الاڭ دا قاراستىرىلعان», دەيدى اۋدان اكىمىنىڭ ورىنباسارى جومارت مىڭباەۆ.
شىنىندا, جۇيەلى جاتتىعۋ ادامنىڭ يممۋنيتەتىن كۇشەيتىپ, دەرتتەرگە قارسى تۇرۋعا سەپتىگىن تيگىزەدى. ەستە ساقتاۋ قابىلەتىن جاقسارتىپ, تىنىش ۇيقى سىيلايتىن سپورت بەلسەندىلىكتى ارتتىرىپ, جۇرەك-قانتامىر جۇيەسىنىڭ جاقسارۋىنا ايرىقشا كومەكتەسەدى. دەمەك اۋىل بالالارىنىڭ سپورتپەن اينالىسۋى ۇلت ءۇشىن تاعى ءبىر ماڭىزعا يە.
جەتىسۋ وبلىسى
