فورۋمعا سەنات دەپۋتاتى اقمارال ءالنازاروۆا, قازاقستان حالقى اسسامبلەياسى جانىنداعى رەسپۋبليكالىق انالار كەڭەسىنىڭ توراعاسى نازيپا شاناي, زيالى قاۋىم وكىلدەرى, ەڭبەك ارداگەرلەرى مەن كوپبالالى انالار قاتىستى. بارلىق وڭىردەگى انالار كەڭەسىنىڭ توراعالارى مەن مۇشەلەرى, اۋداندارداعى ايەلدەر كەڭەستەرىنىڭ مۇشەلەرى ونلاين رەجىمدە قوسىلدى.
ورتالىق عيماراتىندا ايماقتىڭ ونەرلى قىز-كەلىنشەكتەرى جاساعان ونىمدەردەن كورمە ۇيىمداستىرىلىپ, تۇيە جانە ەشكى سۇتىنەن جاسالعان تابيعي سابىن, ۇلتتىق كيىمدەر مەن اشەكەيلەر, ءتۇرلى تەحنيكالارمەن سالىنعان كارتينالار جانە وزگە دە ەرەكشە بۇيىمدار قويىلدى.
فورۋمدا وبلىس اكىمى نۇرلىبەك نالىباەۆ جۋىردا عانا قىزىلوردا قالاسىندا قولدانىسقا بەرىلگەن زاماناۋي ءارى كوپفۋنكتسيالى «اناعا تاعزىم» ورتالىعى قىز-كەلىنشەكتەردىڭ رۋحاني ورداسىنا اينالعانىن اتاپ ءوتتى. وبلىسقا جۇمىس ساپارىمەن كەلگەن مەملەكەت باسشىسى قاسىم-جومارت توقاەۆ سالت-ءداستۇرىمىزدى ناسيحاتتاپ, ۇلتتىق قۇندىلىقتار قادىرىن ايقىندايتىن ورتالىققا جوعارى باعا بەرگەن.
– «اناعا تاعزىم» ورتالىعى – بالاۋسا قىز بالادان ارداقتى اسىل اجەگە دەيىن باس قوساتىن تاربيە مەكتەبى. وسى جەردە اقىلدى دا پاراساتتى انالاردىڭ, يناباتتى كەلىندەردىڭ ونەگەلى ىسىنەن, سالماقتى سوزىنەن ۇلگى الاتىن جاستار قاتارى كوبەيەرى ءسوزسىز. بۇگىندە تۇرمىستىق قيىندىققا تاپ بولعان انالار مەن بالالارعا قولداۋ كورسەتۋ ماقساتىندا 7 اۋدان مەن قىزىلوردا, بايقوڭىر قالالارىندا «باقىتتى وتباسى» بولىمدەرى اشىلدى.
ورتالىقتاردا زاڭگەرلىك جانە پسيحولوگيالىق كومەك كورسەتۋدەن باستاپ, كاسىپكەرلىك نەگىزدەرگە وقىتۋ, بيزنەس-جوسپار قۇرۋعا, گرانت نەمەسە شاعىن نەسيە الۋعا قۇجات راسىمدەۋگە جاردەمدەسۋ, جۇمىسقا ورنالاستىرۋ جانە وزگە دە باعىتتاردا قىزمەتتەر كورسەتىلەدى. وعان قوسىمشا 114 جەدەل ارەكەت ەتۋ توبى قۇرىلدى. بۇل توپ ومىرلىك قيىن جاعدايعا تاپ بولعان وتباسىلارعا دەر كەزىندە جاردەم بەرۋ ءۇشىن جاساقتالدى, – دەدى ايماق باسشىسى.
قازاقستان حالقى اسسامبلەياسى جانىنداعى رەسپۋبليكالىق انالار كەڭەسىنىڭ توراعاسى نازيپا شاناي «مادەنيەتتى انا – مادەنيەتتى ۇلت» جالپىۇلتتىق جوباسى تۋرالى بايانداپ, ونىڭ ەرەكشەلىكتەرىن تانىستىردى.
ماڭىزى ەرەكشە ءىس-شارادا پاۆلودار وبلىسى اكىمىنىڭ ايەلدەر ىستەرى جونىندەگى كەڭەسشىسى, ۇلاعاتتى ۇستاز, «قۇرمەت» وردەنىنىڭ يەگەرى باقىتجامال ماكسيلوۆا, تۇركىستان وبلىسىنداعى اتا-انالار وداعىنىڭ توراعاسى اقبايان جاقىپوۆا, «قازاقستان بارىسى-2022» جەڭىمپازى ماقسات يساعابىلوۆتىڭ اناسى روزا قۋاڭباەۆا, قىزىلوردا وبلىسىنىڭ قۇرمەتتى ازاماتى الماگۇل بوجانوۆا تاقىرىپ اياسىندا وي-پىكىرىن ءبىلدىردى.
رەسپۋبليكالىق فورۋمدا الەمدىك دودالاردا ەل نامىسىن قورعاعان سپورتشىلاردى, ونەر بايقاۋلارىندا دارا شىققان دارىنداردى دۇنيەگە اكەلگەن انالار, وبلىستىڭ الەۋمەتتىك-ەكونوميكالىق دامۋىنا ۇلەس قوسقان قىز-كەلىنشەكتەر ءتۇرلى اتالىمدار مەن ماراپاتتالدى. ءۇش دۇركىن «التىن دومبىرا يەگەرى» مۇحتار نيازوۆتىڭ اناسى جۇماكۇل وڭعارباەۆاعا, الەم چەمپيوناتىنىڭ ەكى دۇركىن كۇمىس جۇلدەگەرى قامشىبەك قوڭقاباەۆتىڭ اناسى ۇلبوسىن الىپقاشوۆاعا, «قازاقستان بارىسى-2022» ماقسات يساعابىلوۆتىڭ اناسى روزا قۋاڭباەۆاعا كوپ الدىندا وسىنداي قۇرمەت كورسەتىلدى.
ەكى كۇندىك باعدارلاما اياسىندا فورۋمعا قاتىسۋشىلار «اناعا تاعزىم» ورتالىعىمەن تانىسىپ, ءتۇرلى كەزدەسۋگە قاتىستى, تاجىريبە الماستى.
قىزىلوردا
