«ەلەكتروندى جەتەكشى» – كوزى ناشار كورەتىن جانداردىڭ ءجۇرىپ-تۇرۋىنا كومەكتەسەتىن يننوۆاتسيالىق قۇرىلعى. تاياقتاعى داتچيك پايدالانۋشىنىڭ جولىنداعى كەدەرگىلەردى الدىن الا انىقتاپ وتىرادى ءارى دىبىستىق نۇسقاۋلار بەرەدى. سونداي-اق پايدالانۋشىعا قاجەتتى ورىندى تابۋعا كومەكتەسەتىن ءموبيلدى قولدانبالار دا بار. اينالاداعى ءارتۇرلى نىسانداردى جانە باسقا دا ماڭىزدى بولشەكتەردى انىقتاۋعا كومەكتەسەتىن كومپيۋتەرلىك كورۋ تەحنولوگياسى دا قاراستىرىلعان. بۇعان قوسا قوسىمشا مۇمكىندىكتەردى پايدالانۋ ءۇشىن قۇرىلعىنى سمارتفونعا قوسۋعا مۇمكىندىك بار.
جوبانى ينفورماتيكا ءپانى مۇعالىمدەرى التىناي ىبىراەۆا مەن ارايلىم ىسقاقوۆا, ورىس ءتىلى ءپانى مۇعالىمى ايجان قۋاندىقوۆا, ماتەماتيكا ءپانى مۇعالىمى دانيار نادىرباەۆ جاساپ شىققان.
«ەڭ ءبىرىنشى Arduino مەن ۋلترودىبىستىق داتچيك اراسىندا بايلانىس بولۋ ءۇشىن ونى سىمدارمەن جالعادىق. بۇل كەدەرگىلەردى كورەدى. كەلەسى زۋممەر داتچيگىن قوسىپ, دىبىسىن قامتاماسىز ەتتىك. قۋات بەرۋ ءۇشىن باتارەيا قاجەت بولدى. Arduino باعدارلاماسىن پايدالانىپ, C++ تىلىندە باعدارلاما جازدىق. كومپيۋتەر مەن جاساعان ماشينانى USB شنۋرمەن جالعاپ, جازعان باعدارلامانى ەلەكتروندى جەتەكشىگە جۇكتەدىك», دەيدى جوبا اۆتورلارى.
مۇعالىمدەر «ەلەكتروندى جەتەكشى» قۇرىلعىسىنا جۇمسالاتىن شىعىن مەن كىرىستى دە ويلاستىرعان. ولاردىڭ ايتۋىنشا, ءبىر تاياقشانى جاساپ شىعارۋعا 7 860 تەڭگە قاجەت, ال ونى نارىقتا 17 مىڭ تەڭگەگە ساتۋعا بولادى. ەلىمىزدە مۇنداي قۇرىلعى جوق, سوندىقتان باعاسى دا قولجەتىمدى.
الداعى ۋاقىتتا جوبا اۆتورلارى مۇگەدەكتەر قوعامىمەن كەلىسىپ, مەملەكەتتىك ساتىپ الۋعا قاتىسۋدى جوسپارلاپ وتىر. ايتا كەتەيىك, مۇعالىمدەر جوباسى قاراشا ايىندا IT چەمپيوناتقا قاتىستى.
