اقتاۋ قالاسىنىڭ كليماتىنا ساي جاساقتالعان اۆتوبۋستاردا بارلىق جاعداي قاراستىرىلعان. وندا جەلدەتكىش, بەينەباقىلاۋ جانە مۇگەدەكتىگى بار ادامدارعا ارنالعان اپپارەل (پاندۋس) مەن GPS جۇيەسى قامتىلعان. جاڭا اۆتوبۋستاردىڭ ءبىر ەرەكشەلىگى – مەتان جاعارماي قوزعالتقىشتارىمەن جۇرەدى. بۇل زياندى ەلەمەنتتەر بولەتىن ەسكى اۆتوبۋستاردى الماستىرۋ ارقىلى ەكولوگيالىق تۇراقتىلىقتىڭ ساقتالۋىنا سەپتىگىن تيگىزبەك.
وسىعان وراي العاشقى مەتان گاز قۇيۋ ستانساسى دا ىسكە قوسىلدى. سۋ جاڭا اۆتوبۋستاردى ەكولوگيالىق وتىنمەن قامتاماسىز ەتۋ ءۇشىن اشىلعان ستانسا «كاسپي اۆتوپارك» جشس تەحنوپاركىنىڭ اۋماعىندا ورنالاسقان. وندا گاز قۇيۋ بەكەتىمەن بىرگە, اۆتوبۋس مارشرۋتتارىن باقىلاۋعا, قوعامدىق كولىكتەگى بەينەباقىلاۋ جازبالارىن كورۋگە مۇمكىندىك بەرەتىن ديسپەتچەرلىك بولمە بار.
اۆتوبۋستاردى ساتىپ الۋعا, مەتان جاعارماي قۇيۋ ستانساسىن ىسكە قوسۋعا وبلىستىق جانە قالالىق اكىمدىكتەردىڭ قولداۋىمەن «كاسپي اۆتوپارك» جشس جانە «كاسپي اكك» ينۆەستيتسيالىق جوباسى شەڭبەرىندە جۇزەگە اسىرىلدى. ماڭعىستاۋ وبلىسى بويىنشا جولاۋشىلار تاسىمالىن قوعامدىق كولىكپەن قامتاماسىز ەتۋدە قاۋىپسىزدىك پەن ساپالى قىزمەت كورسەتۋ, سونداي-اق ءوڭىردىڭ اۆتوبۋستار پاركىن جاڭارتۋ ماقساتىندا 460 جاڭا جۇمىس ورنىن قۇرۋ مەجەلەنگەن. وسى ماقساتقا جەتۋ ءۇشىن جىل سوڭىنا دەيىن «QazTehna» جشس وتاندىق وندىرۋشىسىنەن «ونەركاسىپتى دامىتۋ قورى» اق ليزينگتىك قارجىلاندىرۋ نەگىزىندە مەتان قوزعالتقىشتارى بار تاعى دا 120 جاڭا اۆتوبۋس ساتىپ الۋدى جوسپارلاعان.
«2020-2022 جىلدار ارالىعىندا وبلىسىمىزدا بىرقاتار باعىتتاعى اۆتوبۋستار جاڭارتىلىپ, سۋ جاڭا وتاندىق 46 جاڭا اۆتوبۋس ەل يگىلىگىنە بەرىلدى. بۇگىندە العاشقى مەتان گاز قۇيۋ ستانساسىنىڭ اشىلۋى دا – ۇلكەن جاڭالىق. ماڭعىستاۋ وبلىسىندا سۇيىتىلعان گازدى تۇتىنۋ ەلىمىز بويىنشا جوعارى كورسەتكىشتەرگە يە. ال مەتان وتىنىن پايدالانۋ سۇيىتىلعان گازعا جۇكتەمەنى ازايتۋعا مۇمكىندىك بەرەتىنىنە سەنىمدىمىن. ءبىزدىڭ ماقساتىمىز – ماڭعىستاۋ وبلىسىندا جولاۋشىلاردى قوعامدىق كولىكپەن تاسىمالداۋ بويىنشا قاۋىپسىز, قولايلى ءارى ساپالى قىزمەتتەردى قامتاماسىز ەتۋ. سونداي-اق اۆتوبۋستاردى كۇتۋ ۋاقىتىن قىسقارتۋ جانە جولاۋشىلار تاسىمالى نارىعىنا جاڭا ساپالى كولىكتەر ۇسىنۋ», دەدى وبلىس اكىمى نۇرلان نوعاەۆ.
ماڭعىستاۋ وبلىسى
