جاڭا جىلۋ قۋاتى ىسكە قوسىلدى: استانانى جىلىتۋ جۇمىسى قالاي ءجۇرىپ جاتىر؟

«قۇرىلىسى ۇزاققا سوزىلعان جەو-3-ءتى ىسكە قوسۋ ءۇشىن ۇلكەن جۇمىس اتقارىلدى.
اتالعان جىلۋ ەلەكتر ورتالىعىنداعى ءتورت قازاندىقتىڭ ءبارى ىسكە قوسىلدى. بۇل قالانى 440 گكال/ساعاتپەن قامتاماسىز ەتۋگە مۇمكىندىك بەرەدى.

جەو-3-ءتىڭ ءبىرىنشى كەزەڭىنىڭ قۇرىلىسى قازان ايىندا اياقتالدى. نىسان وسى كەزدەن باستاپ قالاعا جىلۋ بەرۋدى باستادى. جەو-3 سول جاعالاۋدىڭ ءبىر بولىگىن جانە قۇرىلىس جۇمىستارى ءجۇرىپ جاتقان جاڭا اۋدانداردى جىلۋمەن قامتيدى.

سول سياقتى تىرشىلىكتى قامتاماسىز ەتەتىن جاڭا نىسانداردا جاڭا قۋاتتار ىسكە قوسىلدى. ماسەلەن, جاڭا «وڭتۇستىك-شىعىس» گاز جىلۋ ستانتسياسىن الايىق. بۇل گاز جىلۋ ستانتسياسى «باعىستان», «مىڭجىلدىق اللەياسى» تۇرعىن ءۇي كەشەندەرى اۋداندارىن, قالانىڭ سول جاعالاۋىن جىلۋمەن سەنىمدى قامتاماسىز ەتەدى. وسى جىلدىڭ سوڭىنا دەيىن ستانتسيانى 350 گكال/ساع ماكسيمالدى قۋاتتىلىققا دەيىن جەتكىزۋ بويىنشا ىسكە قوسۋ جۇمىسى جالعاسادى.

سونداي-اق جەلتوقسان ايىندا قۋاتتىلىعى 350 گكال/ساع بولاتىن «تۇران» گاز جىلۋ ستانتسياسىنىڭ 1-كەزەڭىن ىسكە قوسۋدى جوسپارلاپ وتىرمىز. وسىلايشا, ءۇش نىساننىڭ كۇشى 1140 گكال/ساع قۇرايدى», دەپ جازدى جەڭىس قاسىمبەك.