تۇساۋكەسەرگە مادەنيەت جانە اقپارات ۆيتسە-ءمينيسترى ەۆگەني كوچەتوۆ, مينيسترلىكتىڭ جاستار جانە وتباسى ىستەرى كوميتەتى توراعاسىنىڭ مىندەتىن اتقارۋشى روللان قۇسپان مەن عىلىمي-ساراپتامالىق قوعامداستىقتىڭ, ساياسي پارتيالاردىڭ, ۇكىمەتتىك ەمەس جانە جاستار ۇيىمدارىنىڭ وكىلدەرى قاتىستى. جيىندا «جاستار» عزو ديرەكتورى ايسۇلۋ ەرنيازوۆا ۇلتتىق باياندامانى دايىنداۋ بويىنشا جۇمىستىڭ نەگىزگى قورىتىندىلارىنا توقتالدى.
– ۇلتتىق بايانداما جاستار اراسىنداعى الەۋمەتتىك دامۋدىڭ اعىمداعى ترەندتەرىن, ولاردىڭ قاجەتتىلىكتەرى مەن مۇددەلەرىن ايقىنداۋعا باعىتتالعان. قۇجات ەلىمىزدىڭ بارلىق ايماعىندا «Face to face» فورماتىنداعى جاپپاي ساۋالناما نەگىزىندە جۇرگىزىلدى. جاستاردىڭ قازىرگى جاعدايىن تالداۋ اياسىندا ەلىمىزدىڭ بارلىق وڭىرىندە 6 مىڭ رەسپوندەنتتى قامتيتىن الەۋمەتتانۋلىق زەرتتەۋلەردىڭ ناتيجەلەرى پايدالانىلدى. اشىپ ايتساق, ساۋالناما نەگىزىندە جاستاردىڭ بوس ۋاقىتى مەن دەنساۋلىعى, ءبىلىم مەن عىلىمداعى ورنى, الەۋمەتتىك-ەكونوميكالىق جاعدايى, كەمسىتۋشىلىك, تۇرعىن ءۇي جاعدايى, ەڭبەكپەن قامتۋ ماسەلەلەرى, كاسىپكەرلىك قىزمەت تاجىريبەسى, كوشى-قون كوڭىل كۇيى, قۇندىلىق باعدارلارى, تىلدىك ورتاسى, ءدىن, جاستاردىڭ قوعامدىق كوڭىل كۇيلەرى, پايدالاناتىن الەۋمەتتىك جەلىلەر مەن مەسسەندجەرلەر, ازاماتتىق بەلسەندىلىگى, قاۋىپسىزدىك ماسەلەلەرى مەن قۇقىعىنىڭ ساقتالۋى, جاستار ساياساتىن ىسكە اسىرۋدىڭ تيىمدىلىگى, مەملەكەتتىك باعدارلامالار تۋرالى حاباردار بولۋى, ترەندتەرى زەردەلەندى. باياندامادا ەلدەگى الەۋمەتتىك-ەكونوميكالىق, سونداي-اق ساياسي وزگەرىستەردى ەسكەرە وتىرىپ, سالالار بويىنشا ۇسىنىمدار دا قالىپتاستىرىلدى. بۇل زەرتتەۋلەر مۇددەلى بارلىق تاراپقا – مەملەكەتتىك ورگانداردىڭ, ازاماتتىق سەكتور ۇيىمدارىنىڭ, جاستار ساياساتى ينستيتۋتتارىنىڭ, وقۋ ورىندارىنىڭ, جاستار ۇكىمەتتىك ەمەس ۇيىمدارىنىڭ, ساراپشىلار قاۋىمداستىعى, باق وكىلدەرىنە ارنالعان, – دەدى ا.ەرنيازوۆا.
ەكونوميكا عىلىمدارىنىڭ دوكتورى ايگۇل كوشەرباەۆا بايانداماداعى «جاستار شوقىسى» دەگەن ماسەلەگە نازار اۋداردى. ونىڭ ايتۋىنشا, كەيىنگى 13 جىلداعى 16 جاسقا دەيىنگى ەل حالقىنىڭ قۇرىلىمىن تالداۋ ءاربىر كەلەسى جاستاعى حالىقتىڭ ورتاشا ءوسۋ قارقىنى 2-دەن 4 پايىزعا دەيىن ەكەندىگىن كورسەتەدى. سونىمەن قاتار 2011 جىلى تۋعان ۇرپاق جاستار شوقىسىنىڭ قوزدىرعىشى بولا الادى, ياعني ولار قازىر 11-12 جاستاعى بالالار. سونداي-اق فيلوسوفيا دوكتورى, قاۋىمداستىرىلعان پروفەسسور ەربول وماروۆ جاستار اراسىنداعى قاۋىپسىزدىك ماسەلەلەرىنە قاتىستى پىكىرىمەن ءبولىستى.
– جاستار اراسىندا قىلمىستىڭ پايدا بولۋىنا الەۋمەتتىك تەڭسىزدىك, ءبىلىم الۋعا جانە جۇمىسقا ورنالاسۋعا قولجەتىمدىلىكتىڭ بولماۋى, سونداي-اق قۇقىق قورعاۋ ورگاندارىنا سەنىمسىزدىك سياقتى بىرقاتار فاكتور ىقپال ەتەدى. سونىمەن قاتار ينتەرنەت پەن الەۋمەتتىك مەديانىڭ اسەرى قىلمىستىق مىنەز-ق ۇلىققا اكەلەتىن جاعىمسىز تەندەنتسيالاردى كۇشەيتۋى مۇمكىن, – دەدى ول.
كەزدەسۋ بارىسىندا «Amanat», «اۋىل» جانە «Respublica» پارتيالارى جاستار قاناتتارىنىڭ وكىلدەرى دە ءسوز سويلەدى. ولار جاستاردىڭ ساياسي بەلسەندى بولىگى اراسىندا جاستار ساياساتىن ىسكە اسىرۋ تاجىريبەسىمەن ءبولىستى. بۇعان قوسا جۇمىس بارىسىندا عىلىمي نەگىزدەلگەن تاسىلدەردى قولدانۋدىڭ ماڭىزدىلىعى تۋرالى ايتتى. سونداي-اق ساراپشىلار جاستار ءومىرىنىڭ ءارتۇرلى اسپەكتىلەرى بويىنشا ۇسىنىس-پىكىر الماستى. قاتىسۋشىلار ءبىراۋىزدان عىلىمي زەرتتەۋلەردىڭ ناتيجەلەرى اسىرەسە جاستار اراسىندا ناسيحاتتاۋدىڭ ماڭىزدىلىعىن اتاپ ءوتتى.
ايتا كەتەيىك, «جاستار» عىلىمي-زەرتتەۋ ورتالىعى «مەملەكەتتىك جاستار ساياساتى تۋرالى» زاڭعا سايكەس 2013 جىلدان بەرى جىل سايىن جاس وتانداستارىمىزدىڭ ءومىرىنىڭ نەگىزگى سالالارىنداعى جاعدايى تۋرالى ۇلتتىق بايانداما دايىندايدى.
