وليمپيادالىق سالماققا اۋىسقىم كەلمەيدى – الەم چەمپيونى

– تەمىرتاس,  جەڭىس قۇتتى بولسىن. «ۇلكەن پىشاق ۇيالعاننان وتەدى» دەيمىز. بايقاۋىمىزشا, بوكستان وتكەن جازعى سپارتاكيادا ويىندارىنا قاتىسقان سپورتشىلاردىڭ ىشىندەگى جاسى ۇلكەنى ءوزىڭ عانا.

– دۇرىس ايتاسىز, قاتىسۋشى بوكسشىلاردىڭ جاسى  وزىمنەن الدەقايدا كىشى. ءتىپتى 16-17 جاس كىشى تالانتتار دا قاتىستى. ولاردىڭ فيزيكالىق قۋاتى, شەبەرلىگى ءوسىپ كەلە جاتقانى قۋانتادى. تاجىريبەمىزدىڭ تولىسىپ, تالاي دوداعا قوسىلعانىمىزدىڭ  ناتيجەسىندە جەڭىس ماعان بۇيىردى. فينالدىق جەكپە-جەكتە استانالىق  اسحات جۇسىپوۆتەن باسىم بولدىم. ەكەۋمىز بۇعان دەيىن دە بىرنەشە مارتە جەكپە-جەكتە ايقاستىق. ونىڭ جۇدىرىقتاسۋ ءستيلىن جاقسى بىلەمىن, ول دا مەنى زەرتتەپ العانى ايقىن  بايقالدى. باپكەرلەرىمنىڭ باعىتتاۋى  بويىنشا قاتەلىككە ۇرىنباي  ايقاستىم.    

– ءوزىڭنىڭ ەنشىڭدە ازيا چەمپيوناتىنىڭ التىنى, الەم چەمپيونى سىندى ايتۋلى اتاق, دارەجە بار. ۇلتتىق قۇراما ساپىندا 15 جىلدان بەرى ءجۇرسىڭ عوي.  بىراق جازعى سپارتاكيادانىڭ  التىنى وسى كۇنگە دەيىن  بۇيىرماعان ەكەن.

– 2011 جىلى جارتىلاي فينالدا ءسۇرىنىپ, جازعى سپارتاكيادانىڭ قولا مەدالىن مىسە تۇتقان ەدىم. 2015 جىلى «استانا ارلاندارى» كاسىپقوي كلۋبىنىڭ ساپىندا  جەكپە-جەككە تۇسكەندىكتەن, جازعى سپارتاكياداعا قاتىسپادىم. 2019 جىلى ازيا چەمپيوناتىندا قولا مەدال العاندىقتان, جازعى سپارتاكيادا ويىندارىنا قوسىلماي  دەمالىس الدىم. ءوزىڭىز ايتپاقشى, ۇلتتىق قۇرامادا 15 جىل ءجۇرىپ, ءتورت  جىلدا ءبىر اينالىپ سوعاتىن جازعى الاماننىڭ التىن مەدالى وسى جولى بۇيىردى.

– ەندى جەتپەي تۇرعانى – وليمپيادا مەدالى. بىراق كەلەسى جىلى پاريجدە وتەتىن جازعى وليمپيادا ويىندارىندا بوكسشىلار 7 سالماقتا قاتىسادى. سەن 48 كەلىدە سىنعا ءتۇسىپ ءجۇرسىڭ. پاريجدەگى دودادا ەڭ جەڭىل سالماق 51 كەلى. ەندى جوسپارىڭ قانداي, وليمپيادالىق سالماققا وتەسىڭ بە؟ الەم چەمپيونى سانجار تاشكەنباي دا اۋىستى ەمەس پە؟

– مەنىڭ دە ارمانىم جازعى وليمپيادا ويىندارىنان ولجالى ورالۋ. بىراق بۇعان دەيىن 51 كەلىگە ءوتىپ كوردىم, ءوزىمنىڭ سالماعىم  ەمەس ەكەن. بويىمنىڭ تاپالدىعى, قولىمنىڭ قىسقالىعى  بىردەن بايقالدى, كۇشىم دە جەتپەيتىنىن اڭعاردىم. سانجار – جالىنداپ تۇرعان, جاستار اراسىنان ەرەسەكتەر قاتارىنا ەندى وتكەن بوكسشى. دەنە تۇرقى دا ماعان قاراعاندا سيدام, قولى ۇزىن. فيزيكالىق الەۋەتىن كۇشەيتسە, 51 كەلىگە قالىپتاسىپ الادى دەپ ويلايمىن.   

2009 جىلدان بەرى ۇلتتىق قۇرامانىڭ بەلدى بوكسشىلارىنىڭ ءبىرى سانالىپ كەلەمىن. جازعى وليمپيادا  ويىندارىندا ءوزىمنىڭ الەۋەتىمدى سىناپ تا كورگىم كەلەدى. بىراق  بۇيىرتپاسا بەكەر عوي. كىم بىلەدى, 2028 جىلى وتەتىن جازعى وليمپيادا ويىندارىندا بوكسشىلاردىڭ سالماعى 48 كەلىدەن باستالۋى مۇمكىن. ءدام تارتسا, جولىمىز تۇسەر, ءۇمىت ۇزبەيمىن. اسكەريلەر اراسىندا الەم چەمپيونى اتاندىم, 2021 جىلى اۋەسقويلار دۋىندا دا الەم چەمپيوناتىنىڭ التىن مەدالى بۇيىردى. ەندىگى ماقساتىم  – الدا بولاتىن الەم بىرىنشىلىگىنە, باسقا دا قۇرلىقتىق, حالىقارالىق تۋرنيرلەرگە قاتىسۋ ءۇشىن ازىرلىكتى كۇشەيتۋ. 51 كەلىگە اۋىساتىن جوسپار جوق. قازاق بوكسىنىڭ تاريحىندا ەكى دۇركىن الەم چەمپيونى اتانعان ازىرگە سەرىك ساپيەۆ قانا. سول  مەجەگە جەتۋ جولىندا بارىمدى سالامىن. 2025 جىلى جاپونيانىڭ وساكا قالاسىندا قۇرىلاتىن رينگتە الەم چەمپيوناتىنىڭ التىن مەدالىن ولجالاۋ – باستى ماقساتىم.