جولتاي – سايىن سارىارقانىڭ شۇرايلى ءبىر ايماعى, قويناۋى ىرىس, جايلاۋى تىنىس جاڭاارقا اۋدانى قارااعاش اۋىلىنىڭ تۋماسى. اكەسى بورانقۇل وتكەن عاسىرداعى كولحوز, سوۆحوز شارۋاشىلىقتارىنىڭ قالىپتاسۋ, دامۋ كەزەڭدەرىنىڭ بارلىعىن ءوز قولىمەن وتكەرگەن, قانداي جۇمىسقا بولسىن ىلكىمدى, ىسمەر, شەبەر, شارۋاقور ادام ەدى. ءاردايىم, جىلدىڭ ءتورت مەزگىلى, تاڭنىڭ اتىسى كۇننىڭ باتىسى, ءبىرى اياقتالسا ەكىنشى باستالىپ جاتاتىن ناۋقاندىق جۇمىستاردىڭ باسى-قاسىندا جۇرەتىن. اينالاسىنداعى اعايىن-تۋعاندى, وتباسىن ءۇيىرىپ ۇستايتىن, ارالارىن جاراستىرىپ, تۋىستىق ءتىنىن بەكىتىپ وتىراتىن بەدەلدى اقساقالدىڭ وسى ەڭبەكسۇيگىشتىك قاسيەتى بارشا بالالارىنا دا جۇعىستى بولدى. جولتاي جاستايىنان ايىر, كۇرەك تۇرماق, اۋىل شارۋاشىلىعىنىڭ بارلىق وندىرىسىنە كوزى قانىقتى, ەتەنە بولىپ ءوستى.
ون جىلدىق مەكتەپتەن سوڭ اۋدان ورتالىعىنداعى مەحانيزاتورلار دايارلايتىن كۋرستى وقىپ ءبىتىردى. ۇلكەن ەڭبەك جولىن تۋعان اۋىلىندا مەحانيزاتور بولىپ باستادى. ت-40 تراكتورىنىڭ رۋلىنە وتىرىپ ءشوپ شاپتى. الىپ ك-700 تراكتورىن تىزگىندەپ, جەر جىرتتى, شارۋاشىلىق ونىمدەرىن تاسىمالدادى. اۋىل داۋلەتىنىڭ ەسەلەپ ارتۋىنا ەلەۋلى سەپتىگىن تيگىزدى. 1979-1981 جىلدار ارالىعىندا اسكەر قاتارىندا ازاماتتىق بورىشىن وتەدى.
1987 جىلى اۋدان ورتالىعى اتاسۋ كەنتىنە قونىس تەۋىپ, تەمىر جول سالاسىنىڭ قالپىنا كەلتىرۋ پويىزى مەكەمەسىنە ت-330 بۋلدوزەرىنىڭ ءماشينيسى بولىپ جۇمىسقا ورنالاستى. سودان بەرىدە, بيىلعى زەينەت جاسىنا جەتكەنگە دەيىن وسى مەكەمەدە تابان اۋدارماي, قالتقىسىز قىزمەت اتقاردى. ۇزاق جىل سونارىندا ورتاق ىسكە دەگەن ۇلكەن جاۋاپكەرشىلىك, تياناقتىلىقپەن ەڭبەك ەتە ءجۇرىپ, كاسىپورىننىڭ مايتالمان ماماندارىنىڭ بىرىنە اينالدى.
جاڭاارقا ستانساسىنا قاراستى قالپىنا كەلتىرۋ پويىزىنىڭ ىرگەتاسى 1936 جىلى قالانىپتى. قوزعالىس بولعان سوڭ قاۋىپ بولماي تۇرمايدى. تەمىر جول تورابىندا قانداي دا ءبىر اپات ورىن الا قالعان جاعدايدا ونىڭ سالدارىن جويۋ مىندەتى ەڭ الدىمەن وسى قالپىنا كەلتىرۋ پويىزىنا جۇكتەلەدى. سول ىڭعايدا جەلىلىك قالپىنا كەلتىرۋ پويىزى تاسىمالدى توقتاۋسىز جۇرگىزۋ ىسىنە لايىقتى ۇلەس قوستى. مەجەسى بيىك, جۇمىسى جۇيەلى, جەتىستىكتەرى ەسەلى, بىرلىگى مىقتى ۇجىم ءاردايىم سەنىم ۇدەسىنەن, جەڭىس تۇعىرىنان كورىنە ءبىلدى. وسىنداي تولايىم تابىستاردا بىلىكتى مامان, ىسكەر ازامات ج.ىسقاقوۆتىڭ دا وزىندىك قولتاڭباسى بار.
«ەل سەنىمىنەن شىعۋ جولىندا جۇمىلعان جۇدىرىقتاي جۇمىس ىستەۋ – باستى مىندەت. بەكىتىلىپ بەرىلگەن تەحنيكانى ساقاداي ساي دايىندىقتا ۇستاۋ ءۇشىن ونىڭ كۇتىمىنە اسا ۇقىپتىلىقپەن قاراۋ قاجەت. بۇزىلا قالسا, اقاۋى بولسا مەزگىلىندە جوندەپ قويۋ كەرەك. مەكەمە كەزەكشىسىنە اپات تۋرالى حابار تۇسىسىمەن, كۇندىز-ءتۇن دەمەي, 40 مينۋتتا جينالىپ جولعا شىعىپ كەتەمىز», دەيدى جولتايدىڭ ءوزى.
ەسەلى ەڭبەك باعالانۋىمەن باياندى. 40 جىلعا جۋىق ۋاقىت ءبىر مەكەمەدە, ءبىر ورىندا تاپجىلماي, قاپىسىز قىزمەت ەتە بىلگەن تاجىريبەلى مامان, وزات ەڭبەككەردىڭ توككەن تەر, ەتكەن قىزمەتى بىرقاتار سالالىق ماراپاتپەن اتالىپ وتكەن. قۇرمەت گراموتالارى, العىس حاتتار, مەرەكەلىك مەدالدار لەگى – ءوز الدىنا ءبىر توبە. 2011, 2016 جىلدارى «قازاقستان تەمىر جولى» ۇك» اق پرەزيدەنتىنىڭ قۇرمەت گراموتاسىمەن ماراپاتتالدى. 2022 جىلى جاڭاارقا اۋدانى اكىمدىگىنىڭ «جىل ۇزدىگى» اتالىمى بويىنشا ء«وز ماماندىعىنىڭ ۇزدىگى» اتاندى.
ج.ىسقاقوۆ سونشا جۇمىستىڭ سىرتىندا ونەگەلى وتباسى يەسى, اسىل جار, ارداقتى اكە, ۇلاعاتتى اتا. 1988 جىلى اۋدان تۇرعىنى لاززاتپەن جانۇيا قۇردى. ەرلى-زايىپتىلاردىڭ بەرەكەلى شاڭىراعىندا ەكى ەر بالا ءوسىپ-تاربيەلەندى. ۇلكەنى جاسىن, كىشىسى كەمەل – ەكەۋى دە بۇگىندە جوعارى كاسىپتىك ءبىلىمى بار ماماندار, ەكەۋى دە اكە جولىن قۋىپ تەمىرجول تورابىندا, لوكوموتيۆ دەپوسىندا ماشينيست بولىپ جۇمىس ىستەيدى. بالالارى دا ۇيلەنگەن, ولاردان وربىگەن نەمەرەلەر – اتا-اجە كوزقۋانىشى, ءۇي بازارى.
جولتاي اعا بۇگىندە مەرەكەسى جارقىن جازداي, بەرەكەسى التىن كۇزدەي بولىپ جەتكەن مەرەيتويى – زەينەت دەمالىسىنا شىققان قازىنالى قۋانىشىن باستان كەشىرىپ جاتىر. اتپال ازامات بۇكىل سانالى عۇمىرىندا بەل شەشپەي ەڭبەك ەتىپ, ەردىڭ ەرى كوتەرەتىن جۇكتى ارقالادى. كوڭىلىنىڭ كەڭدىگى مەن مۇقالماس قايرات-جىگەرى, ادامدىق, اعايىندىق قاتىناستارداعى اقبەرەن ادالدىعى مەن كىشىپەيىلدىلىگى, سوزگە ساراڭ, ىسكە مىعىم قاراپايىم بولمىسى, سۇتتەي ۇيىعان وتباسى بەرەكەسى – كەز كەلگەن ادامدى قىزىقتىرارلىقتاي ۇلكەن ءتالىم-تاربيە ۇلگىسى.
