وقۋشىلاردى كوركەم سويلەۋگە باۋليتىن بايقاۋ جىل سايىن ءورىسىن كەڭەيتىپ كەلەدى. رۋحاني مۇرامىزدى ۇلىقتاۋ ماقساتىندا ۇيىمداستىرىلعان بيىلعى ءسوز دوداسىنا ەلىمىزدىڭ 12 وبلىسى مەن 3 ءىرى قالاسىنان (الماتى, استانا, شىمكەنت) جانە نازارباەۆ زياتكەرلىك مەكتەبىنەن 24 وقۋشى قاتىستى. بالا ءدىلمارلار شارشى توپ الدىندا جان-جاقتى ءبىلىمى, اقىل-پاراساتى, وي ۇشقىرلىعى مەن سويلەۋ شەبەرلىگىن سىننان وتكىزىپ, ساراپقا سالدى. العاش رەت تاقىرىپ سايىس ۇستىندە بەرىلىپ, جاس تالاپكەرلەردىڭ تاپقىرلىعى ناقتى ولشەممەن باعالاندى. ناتيجەسىندە, مۇنداي جوعارى دەڭگەيگە جەتۋ ءۇشىن زور ىزدەنىس, مول ءبىلىم, كوپ تاجىريبەنىڭ قاجەت ەكەنى اڭعارىلدى. سايىستان گورى ساباق الۋعا بەيىم بايقاۋعا كەلگەن جەتەكشىلەر مەن شاكىرتتەردىڭ تۇيگەنى مەن جيعانى مول بولدى.
جوبا اۆتورى اباي اتىنداعى رەسپۋبليكالىق مەكتەپ-ينتەرناتتىڭ «شەشەندىك ءسوز ونەرى» ءپانىنىڭ مۇعالىمى, جۋرناليست جارقىن سالەن ۇلى جىل سايىن بايقاۋدىڭ مازمۇنى ارتىپ, قاتىسۋشىلاردىڭ دا دەڭگەيى ءوسىپ كەلە جاتقانىن ايتادى. تالعار اۋداندىق مەملەكەتتىك ءتىلدى وقىتۋ ورتالىعىنىڭ ديرەكتورى كامنۇر ءتالىم ۇلى, سۇلەيمەن دەميرەل ۋنيۆەرسيتەتىنىڭ پروفەسسورى بەرەكە جۇماقاەۆا, م.اۋەزوۆ اتىنداعى ادەبيەت جانە ونەر ينستيتۋتى ابايتانۋ جانە جاڭا ءداۋىر ادەبيەتى ءبولىمىنىڭ عىلىمي قىزمەتكەرى ايدانا جۇماتاەۆا قازىلىق ەتكەن سايىستا قاتىسۋشىلار جەرەبە ارقىلى جۇپتاسىپ, تاڭدالعان تاقىرىپتار بويىنشا وي ءوربىتتى. ولاردى باعالاۋدا وي قيسىنىن ساقتاي وتىرىپ, جىلدام ءارى ساۋاتتى پىكىر ءبىلدىرۋ ءسوز تاپقىرلىعى, لوگيكالىق جۇيەلىك, ءسوز كوركەمدىگى, ءتىل تازالىعى, تاقىرىپتى اشا ءبىلۋى سىندى شارتتار نەگىزگە الىندى.
بايقاۋ ناتيجەسىندە رەسپۋبليكالىق ء«دىلمار» شەشەندىك ونەردى دامىتۋ كلۋبىنىڭ مۇشەسى, «اياگوز-ءدىلمار» ۇيىرمەسىنىڭ جەتەكشىسى ءالي ءتۇرسالىم باس جۇلدەنى جەڭىپ الدى. سەمەي قالاسىنداعى نازارباەۆ زياتكەرلىك مەكتەبىنىڭ شاكىرتى ۇممىگۇلسىم جاباعيەۆا ءى ورىنعا يە بولسا, جۇلدەلى II ورىن اباي اتىنداعى رممي وقۋشىسى اياۋلىم جاپاس پەن باتىس قازاقستان وبلىسىنان كەلگەن بەكارىس ۇمبەتقاليعا بۇيىردى. شىمكەنتتىك جانبولات ابديحاي, الماتى وبلىسىنىڭ تۇلەگى اباي نۇباراق ۇلى, اقتوبەلىك ءاسيا وڭداسىنقىزى, جامبىلدىق اقبوتا اسقارقىزى قازىلار شەشىمىمەن ءىىى ورىنعا لايىق دەپ تانىلدى. سونداي-اق نۇراي شايقىبەكوۆا (پاۆلودار), اسەل اۋعانباي (ماڭعىستاۋ), اقەركە نۇرجانقىزى (الماتى وبلىسى), ايگەرىم قايرات (اباي اتىنداعى رممي) قاتارلى قاتىسۋشىلار ارنايى جۇلدەگە يە بولدى. جۇلدەگەر اتانعان جەتكىنشەكتەر بايقاۋ دەمەۋشىسى «KazAgroFeed» كومپانياسى تىككەن قارجىلاي سىيلىقتارعا يە بولدى. باسەكەدە باق سىناعان باسقا دا قاتىسۋشىلارعا سەرتيفيكاتتار مەن كىتاپتار تارتۋ ەتىلدى.
«جۇيەلى سويلەي الۋ – ادامنىڭ تۇلعا رەتىندە قالىپتاسقانىنىڭ ءبىر بەلگىسى. «سوزىنە قاراپ كىسىنى ال, كىسىگە قاراپ ءسوز الما» دەگەن حاكىم تاعىلىمى – بۇعان دالەل. جالپى, سويلەۋ مادەنيەتى ءومىردىڭ بارلىق سالاسىن قامتيدى دەسەك, سونىڭ ىشىندە شەشەن سويلەي الۋ – ادامنىڭ رۋحاني بولمىسى مەن تابىسىنىڭ دا كىلتى. سەبەبى ءبارىمىز قوعامدا ءومىر ءسۇرىپ, كۇنبە-كۇن كوممۋنيكاتسياعا تۇسەتىن جاندارمىز. جۇيەلى سويلەي بىلەتىن ادامنىڭ ءبىلىمى, كىسىنى تىڭداي الۋى, ءوزىن-ءوزى ۇستاۋى, قيسىندى وي جۇيەسى, ءسوز مادەنيەتى ەرەكشەلەنىپ تۇرادى. وكىنىشتىسى, ەكى اۋىز ءسوزدىڭ باسىن قۇراپ, ءوز ويىن ەركىن جەتكىزە الاتىن جاستاردىڭ ازايىپ كەلە جاتقانى جاسىرىن ەمەس. سەبەبى نەدە دەسەك, ءبىلىم بەرۋ سالاسىنداعى جۇيەسىز رەفورمالار مەن شاتقاياقتاپ تۇرعان ءتىل ساياساتىنا تىرەلەمىز. وعان قوسا تەحنوكراتتىق زاماندا گۋتەنبەرگ ونەر تابىسىن مىسە تۇتپاي, تسۋكەربەرگ الەمىنە شۇعىل كوشىپ كەتۋىمىزدىڭ دە سالدارى بار. بىلىمگەرلەرىمىزدىڭ كوركەم شىعارما وقۋدان شەكتەلۋى وسىنى بايقاتادى. بۇل بايقاۋدىڭ بىرنەشە ماقساتى بولدى. الدىمەن تىلىمىزگە جاناشىرلىق, ءسوز ونەرىمىزگە قۇرمەت, حالقىمىزدا امانات بولىپ كەلە جاتقان رۋحاني مۇرامىزدى ۇلىقتاۋعا دەگەن قۇلشىنىس دەسەك, سونىمەن قاتار جاستارىمىزدى دامىتۋعا, تۇلعا بولىپ قالىپتاسۋىنا ىقپال ەتۋ دەپ تۇسىنگەن ورىندى. بايقاۋعا قازىلىق ەتە وتىرىپ, قاتىسۋشىلار تاراپىنان ءبىراز ىزدەنىستىڭ, تىڭ تالپىنىستىڭ بولعانىن اڭعاردىق. «جۇيەلى ءسوز قيسىندى ويدان تۋادى» دەيدى. شەشەندىك ونەردە ءسوز ۇتقىرلىعى, وي قيسىندىلىعى اسا ماڭىزدى ءارى شۇباتپاي ءسوزدى انىق دىتتەگەن نىساناعا ءدوپ تۇسىرە الۋ دا شەبەرلىك. «كوپ ويلاپ, جاقسى سويلە, نۇسقا بولسىن, قايتارار جاۋابىڭ دا قىسقا بولسىن» دەيتىن بابامىز ءار ءسوزدىڭ قادىرىن ءبىلۋدى مەڭزەيدى. بايقاۋ بارىسىندا ءسوز دوداسىن قولما-قول, تالداپ-تارازىلاپ, ءاربىر قاتىسۋشىنىڭ ءار كەزەڭدەگى ءسوز ساپتاسىنا اشىق پىكىر ايتىلدى, اسىرەسە ءسوز قولدانىستارىنا, ءتىل تازالىعىنا, كوركەمدىگىنە باعا بەرىلىپ وتىردى. ءوز ورايىندا قازىلار تاراپىنان ايتىلعان سىن-پىكىر قاتىسۋشىلارمەن قوسا تۇتاس كورەرمەنگە دە ايتارلىقتاي ونەگە-ساباق بولدى. سويلەۋ ارەكەتىمەن قاتار, تىڭدارمانىن يگەرۋ, ساحنا مادەنيەتى دەگەندەر دە نازاردان تىس قالمادى. مۇنداي ءىس-شارالاردىڭ جاندانۋى, ءداستۇرلى دوداعا اينالۋى اسا ماڭىزدى. ءوز ۇلتىمىزدىڭ ەرەكشەلىگىن ايشىقتاپ, ۇلتتىق كودىمىزدىڭ قۇنىن تانىتۋدىڭ بولاشاق ءۇشىن قاجەتتىگى اسا زور», دەيدى ءدىلمارلار دوداسىنا قازىلىق ەتكەن پەداگوگيكا عىلىمدارىنىڭ كانديداتى, سۇلەيمەن دەميرەل ۋنيۆەرسيتەتىنىڭ پروفەسسورى بەرەكە جۇماقاەۆا.
الماتى
