قازىرگى كەزەڭ – جاساندى ينتەللەكت ءداۋىرى. ونىڭ مۇمكىندىكتەرىن بۇكىل الەم مويىنداپ جاتىر. ەلىمىزدە دە جاساندى زەردەنى يگەرۋگە دەن قويىلىپ, ونىڭ دامۋىنا ەداۋىر كوڭىل بولىنە باستادى. بىراق بۇل سالانى يگەرىپ قانا قويۋ جەتكىلىكسىز. باسەكەدە العا جىلجۋ ءۇشىن تۇتىنۋشىدان وندىرۋشىگە اينالۋ قاجەت.
سۇرانىسقا يە جاساندى ينتەللەكت قوسىمشاسىن جاساپ شىققان ەربول ۇلىبريتانيادا Newcastle University-دە ءبىلىم العان. وقۋىن بىتىرگەن سوڭ شەتەلدە قالىپ جۇمىس ىستەۋ مۇمكىندىگى بولسا دا, ەلگە قايتىپ كەلۋدى تاڭداعان. ول وسى سالادا كوپتەگەن جوبامەن اينالىسىپ, تاجىريبەسىن ارتتىرا تۇسەدى. كەيىننەن جەكە ءوز جوباسىن باستاۋعا شەشىم قابىلداعان.
«AI-عا سۇرانىستىڭ كۇرت ءوسىپ جاتقانىن كورگەندە, ەندىگى باعىتىمىزعا ەش كۇمان كەلتىرمەدىك. ادامدار تەحنيكالىق شەكتەۋلەرگە قاراماستان, جاڭا نارسەگە بىردەن اقشا تولەي باستادى. بۇل – تەحنولوگيالىق سەرپىلىس. ادام نەيروجەلىمەن سويلەسە السا, نەگە ەينشتەينمەن سويلەسپەسكە دەپ ويلادىق. كەز كەلگەن تانىمال تۇلعانىڭ اتىنان سويلەسىپ, تىلدىك مودەلدى ۇيرەتىپ الۋعا بولادى. ادامدار وعان تولەۋگە دايىن ەكەنىن بىلگەندە تاڭدانىسىمىزدى جاسىرا المادىق. ودان ءارى داميىق دەپ مۇمكىندىگىمىزدى ارتتىرا تۇستىك», دەيدى ەربول كوپجاسار.
GoatChat قوسىمشاسى ChatGPT-گە ۇقساس ۇلكەن تىلدىك مودەلدەر نەگىزىندە جۇمىس ىستەيدى. ياعني تسيفرلىق كوشىرمە جاساۋ, سۋرەت سالۋ, اڭگىمە جازۋ سىندى مۇمكىندىكتەرى بار. قوسىمشادا تەگىن جانە اقىلى قىزمەتتەر قاراستىرىلعان. تەگىن نۇسقاسىندا 9 حابارلاما جىبەرىپ, 5 سۋرەتكە دەيىن گەنەراتسيا جاساۋعا بولادى. اقىلى نۇسقاسىندا شەكتەۋ جوق جانە فۋنكتسياسى كوپ. پايدالانۋشىلار قوسىمشانى شەكتەۋسىز قولدانۋ ءۇشىن قىزمەتتەردى ساتىپ الادى. جازىلۋ قۇنى ەلگە بايلانىستى. مىسالى, اقش-تا اپتالىق جازىلىم قۇنى – $9,99, اي سايىنعىسى – $24,99, ال جىلدىق جازىلىمى – $99,99. قوسىمشا App Store-عا قاڭتار ايىندا ورنالاستىرىلعان. جىل باسىنان بەرى ونى 5 ميلليونعا جۋىق قولدانۋشى جۇكتەپ العان. سونىڭ ناتيجەسىندە قازىر ولار AI سالاسىنداعى تابىستى research-كومپانياعا اينالىپ وتىر.
ء«بىزدىڭ بەلسەندى اۋديتوريامىز ايىنا شامامەن 1 ميلليون ادامدى قۇرايدى. اقپاننىڭ سوڭىندا تۇراقتى ساتىلىم جاساي باستادىق. كۇتپەگەن جەردەن فرانتسيا, گەرمانيا, وڭتۇستىك كورەيا, پولشا جانە باسقا ەلدەردىڭ App Store-دا ۇزدىك وندىققا كىرگەن العاشقى قازاقستاندىق قوسىمشا ءبىز بولدىق. ول ءۇشىن ءبىر رەتتىك جۇكتەپ الۋ كورسەتكىشىنىڭ جوعارى بولعانى ەمەس, كۇندەلىكتى جۇكتەلىم سانىنىڭ كوپ بولعانى قاجەت», دەيدى ول.
قوسىمشا اۆتورىنىڭ ايتۋىنشا, قازىر GoatChat-تا ءۇش نەگىزگى ءبولىم بار. ءبىرىنشىسى – فايل جۇكتەۋگە بولاتىن ونلاين-كومەكشى. عالامتورداعى كەز كەلگەن بەتتى اشىپ, ونداعى اقپاراتتى قورىتىپ, سونىڭ مازمۇنى نەگىزىندە ادامدارمەن سويلەسە الادى. بۇل جاعدايدا تىلدىك مودەل ChatGPT-ءدىڭ سوڭعى نۇسقاسىنداعى دەرەكتەر قورىنا ەمەس, ۇسىنىلعان اقپاراتقا سۇيەنەدى. وسى پرينتسيپپەن PDF-فايل جۇكتەۋگە بولادى. ءبىر ەرەكشەلىگى, بۇل مودەل اعىلشىن تىلىندە وقىتىلعان. سوندىقتان ورىس, قازاق تىلدەرىندە جاقسى جۇمىس ىستەمەيدى. ەكىنشىسى – explore. بۇل بولىمدە قولدانۋشى نارىقتا بار AI چات-بوتتاردى پايدالانا الادى. ولاردىڭ كومەگىمەن سۋرەت, كەسكىن, اڭگىمە بولسىن, ءتۇرلى ۆيزۋال جانە ماتىندىك كونتەنت جاساۋعا بولادى. ءۇشىنشىسى – تسيفرلىق كوشىرمە نەمەسە كەز كەلگەن كەيىپكەردى جاساپ شىعارۋ قىزمەتى. جەكە چات-بوتقا قاجەتتى اقپاراتتى جۇكتەسە جەتكىلىكتى, ول ءتۇرلى سۇراقتارعا جاۋاپ بەرە الادى.
«ازىرگە قوسىمشادا ۆيدەو جاساۋ مۇمكىندىگى جوق. ويتكەنى بۇل وتە قىمبات. قازاقستانداعى وندىرىستىك ۆيدەوكارتالاردىڭ ەڭ كوپ سانى بىزدە بولسا دا, جابدىعىمىز بۇعان جەتپەيدى. ولاردىڭ ەسەپتەۋ قۋاتىن تىلدىك مودەلدەردى وقىتۋعا نەمەسە كونتەنت جاساۋعا عانا پايدالانۋعا بولادى. تىلدىك مودەلدەرگە قاتىستى شەشىلمەگەن تاعى ەكى ماسەلە بار. ءبىرىنشىسى – «گالليۋتسيناتسيا» نەمەسە جالعان اقپارات بەرۋ. ەكىنشىسى – مازمۇننىڭ ۇزاقتىعى. چات-بوتپەن سويلەسۋ كەزىندە حابارلاماداعى ءسوز سانىندا نەمەسە سەسسيا سانىندا شەكتەۋ بار. بۇعان قوسا, ءبىز قازىر كىتاپ جازىپ جاتىرمىز. جاڭا تىلدىك مودەلىمىز 5 مينۋتتا 128 بەتتىك وقيعانى قۇراپ بەرەدى. بولاشاقتا ونىڭ كومەگىمەن كينو ستسەناريىن جازعىمىز كەلەدى. تەست نۇسقانى قازىردىڭ وزىندە 10 مىڭ ادام جۇكتەپ الدى. وقيعا نە تۋرالى, باستى كەيىپكەر كىم ەكەنىن ەنگىزسە بولدى, تىلدىك مودەل ءبارىن ءوزى جازىپ بەرەدى», دەيدى ە.كوپجاسار.
IT-مامان جاساندى ينتەللەكتىنىڭ قاۋپىن جوققا شىعارمايدى. سونداي-اق نەيروجەلىنىڭ ادامداردى اۋىستىرۋعا قاۋقارى جەتۋى ابدەن مۇمكىن دەپ ەسەپتەيدى.
«Open AI ءوز ازىرلەمەلەرىنىڭ قاۋىپسىزدىگىنە شامامەن 10 ميلليون دوللار ءبولدى. بىراق بۇل قاراجات كومپانيانىڭ اپپاراتتىق قۇرالدارعا جۇمسايتىن قارجىسىمەن سالىستىرۋعا دا كەلمەيدى. قاراپايىم جانە قۇرىلىمدالعان دەرەكتەردى جيناۋ مۇمكىن ەمەس سالالاردا وزگەرىس كوپ ۋاقىتتى الادى. AI وپتيميستەر نەيروجەلى ادامدى تولىق اۋىستىرمايدى, تەك كومەكشى قۇرال بولادى دەپ ەسەپتەيدى. الايدا مەن ولارمەن كەلىسپەيمىن. McDonald’s اۆتوماتتى كاسسالاردى ورناتقان بويدا كومپانيا كاسسير قىزمەتكەرلەرىنىڭ سانىن قىسقارتتى. كاپيتال ارقاشان ەڭبەك تيىمدىلىگىن ارتتىرۋعا ۇمتىلادى. تيىسىنشە, ءسىزدىڭ قۇزىرەتىڭىزدى ەشقانداي تىلدىك نەمەسە باسقا ۇلگى جاساي المايتىن سالالاردى ىزدەۋ كەرەك. مىسالى, كاليفورنياداعى Cruise كومپانياسى جۇرگىزۋشىسى جوق تاكسي قىزمەتىن ۇسىنىپ جاتىر. ازىلدەيتىن شاما جوق. ادامدار ەرەۋىلگە شىعىپ جاتىر. بۇل دۇنيەدەگى ەكونوميكاسى ەڭ دامىعان ەلدەگى جاعداي. مۇنىڭ ءبارى وپتيميزم تۋدىرمايدى, بىراق مەنىڭ ويىمشا, بارا-بارا جاڭا ماماندىقتار پايدا بولاتىن سياقتى. مىسالى, ستسەناري اۆتورلارى جازۋدان گورى ستسەناريدى وڭدەپ, يدەيا ويلاپ تابۋمەن اينالىسادى», دەيدى قوسىمشا اۆتورى.
OpenAI كومپانياسى سەكىلدى ەربول دا ءوز جوباسىن اقشا تابۋدىڭ جولىن تاپقان زەرتتەۋ كومپانياسى رەتىندە قالىپتاستىرۋدى كوزدەپ وتىر. سونىمەن قاتار جاڭا ونىمدەر شىعارۋدى جانە جاڭا تەحنولوگيالاردى پايدالانا وتىرىپ, قولدا بار ونىمدەردى جاڭارتۋدى جالعاستىرا بەرمەك.
