مەملەكەتتىك كەڭەسشىنىڭ حابارلاۋىنشا, ەلىمىز دۇنيەجۇزىلىك مۇرالار كوميتەتىنىڭ مۇشەسى بولىپ يۋنەسكو باس كونفەرەنتسياسى جۇمىسىنىڭ سوڭعى كۇنى سايلانعان. قۇرامىنا 21 مەملەكەت كىرەتىن دۇنيەجۇزىلىك مۇرالار كوميتەتى – يۋنەسكو-نىڭ اسا ماڭىزدى ءارى بەدەلدى باسقارۋشى ورگانى.
«كوميتەتتىڭ نىسانداردى دۇنيەجۇزىلىك مۇرالار تىزىمىنە ەنگىزۋگە جانە الىپ تاستاۋعا ايرىقشا قۇقىعى بار. قازاقستاننىڭ كانديداتۋراسىن 118 مەملەكەت قولدادى. ەلىمىزدىڭ دۇنيەجۇزىلىك مۇرالار كوميتەتىنە مۇشە بولىپ سايلانۋى بىرەگەي مادەني جانە تابيعي مۇرالارىمىزدى ساقتاۋعا قاتىستى بەلسەندى جۇمىسىمىزدى حالىقارالىق قاۋىمداستىقتىڭ مويىندايتىنىن كورسەتەدى. سونداي-اق بۇعان دەيىن يۋنەسكو-نىڭ الماتىداعى كەڭسەسىنە ورتالىق ازيا مەملەكەتتەرىنەن بولەك اۋعانستان, پاكىستان, يران مەملەكەتتەرىن قامتيتىن كوپسەكتورلى ايماقتىق كەڭسە (بيۋرو) مارتەبەسىن بەرۋ تۋرالى شەشىم قابىلدانعان بولاتىن», دەپ جازدى ەرلان قارين.
