ءار وتىنىشكە تالداۋ جۇرگىزىلەدى

مەملەكەتتىك كورسەتىلەتىن قىز­مەت­تەر ساپاسىن باقىلاۋ جانە مەم­لە­كەت­تىك اپپارات قىزمەتىن بيۋروكراتيادان ارىلتۋ ماسەلەلەرى تۋرالى بايانداما جاساعان مەملەكەتتىك قىزمەت ىستەرى اگەنتتىگى توراعاسىنىڭ ورىنباسارى سالاۋات مۇكسىموۆ: «اگەنتتىك مەملەكەتتىك قىزمەت الۋشىلاردىڭ قۇقىقتارىن قور­عاۋعا باعىتتالعان الدىن الۋ شارالارىنا باسىمدىق بەرەدى. وسىعان بايلانىستى جۇرگىزىلەتىن تەكسەرۋلەر قىزمەت بەرۋشىلەردىڭ قۇقىق­قا قايشى ارەكەتتەرىنىڭ سەبەپتەرى مەن جاعدايلارىن انىقتاۋعا باعىت­تال­عان», دەدى.

وسى ماقساتتا وتكىزىلگەن 195 پرو­في­­لاكتيكالىق ءىس-شارادا 45 مىڭ­نان استام بۇزۋشىلىق انىقتالسا, ونىڭ 58 پايىزى اكىمدىكتەرگە تيەسىلى بول­عان. كورسەتىل­گەن بۇزۋشىلىقتار سا­نى­نىڭ 51%-ى مەملەكەتتىك قىز­مەت كورسەتۋ مەرزىمدەرىن بۇزۋ (18,8%), ارتىق قۇجاتتاردى تالاپ ەتۋ (29,5%) جانە نەگىزسىز باس تارتۋعا (2,8%) بايلانىستى. سونداي-اق جىل باسىنان بەرى اگەنتتىك ساپاسىز مەملەكەتتىك قىز­مەت كورسەتۋگە قاتىستى 629 ءوتىنىش­تى قاراعان. شاعىمداردىڭ كوپ­شىلىگى مەملەكەتتىك ورگانداردىڭ جەر قاتى­ناستارى, ساۋلەت, تۇرعىن ءۇي-كوم­مۋنالدىق شارۋاشىلىعى, جۇمىسپەن قامتۋ جانە الەۋمەتتىك قام­سىزداندىرۋ سالالارىندا مەم­لە­كەتتىك قىزمەتتەر كورسەتۋ كەزىن­دەگى ءىس-ارە­كەتتەرىنە قاتىستى بولىپ وتىر. وتىنىش­تەردى قاراۋ قورى­تىن­دىسى بويىنشا 181 كور­سە­تى­لە­تىن قىزمەتتى الۋشىنىڭ قۇ­قىق­تارى قال­پىنا كەلتىرىلگەن.

سپيكەردىڭ ايتۋىنشا, كەلىپ تۇسكەن ءاربىر وتىنىشكە جان-جاقتى تالداۋ جۇرگىزىلەدى. ودان بولەك, ازامات­تار­دىڭ مۇددەلەرى مەن سۇرانىستارىن ەسكەرە وتىرىپ, كورسەتىلەتىن قىزمەتتى بەرۋ­شىلەردىڭ جۇمىسى مەن تيىمدىلىگى باعا­لانادى. «قىزمەت الۋشىلاردىڭ قۇقىق­تارىن پرواكتيۆتى تۇردە قورعاۋ جانە قالپىنا كەلتىرۋگە ەرەكشە نازار اۋدارىلادى. وسىلايشا, قىزمەت الۋشىلار­دىڭ بۇزىلعان قۇ­قىق­تارىن ولاردىڭ وتىنىشتەرىن كۇتپەس­تەن پرواكتيۆتى تۇردە قاشىقتان مو­نيتورينگ جۇرگىزۋ جولىمەن قال­پىنا كەلتىرۋ تاجىريبەسى ىسكە اسىرىلىپ كەلەدى. جۇرگىزىلگەن مونيتورينگ ناتيجەسىندە باس تارتۋ سەبەپ­تەرىن تولىق كورسەتپەۋدىڭ 571 فاكتىسى انىقتالدى. پروفيلاكتيكا ماق­سا­تىندا مەملەكەتتىك ورگاندارعا كورسە­تى­لەتىن قىزمەتتى بەرۋشىلەر تاراپىنان بولعان جۇيەلى بۇزۋشىلىقتارعا جول بەرمەۋ جونىندە ۇسىنىمداردى قاراستىراتىن تالداۋ جولداندى», دەيدى س.مۇكسىموۆ. ايتالىق, جىل باسىنان 577 قىزمەتكەر تار­تىپتىك جاۋاپكەرشىلىككە, ال 298 مەم­لەكەتتىك ورگاندار مەن ۇيىمداردىڭ باسشىسى اكىمشىلىك جاۋاپكەرشىلىككە تارتىلدى. مەملەكەت كىرىسىنە 22,1 ميلليون تەڭگە وندىرىلگەن.

سونىمەن بىرگە اگەنتتىك جىل سايىن قوعامدىق مونيتورينگ جۇرگىزەدى. ونىڭ اياسىندا مەملەكەتتىك قىزمەتتەردىڭ ساپاسى مەن قولجەتىمدىلىگىنە قاتىس­تى حالىق پىكىرى, مۇددەسى, ۇسىنىستارى مەن قالاۋى زەرتتەلەدى. ودان بولەك, «ەلەكتروندىق ۇكىمەت» پورتالىندا ونلاين ساۋالداما ىسكە قوسىلعان. وندا كەز كەلگەن ازاماتقا ۇسىنىلعان مەم­لەكەتتىك قىزمەتتىڭ ساپاسىن ءوز بە­تىن­شە باعالاۋعا مۇمكىندىك قاراس­تى­رىلعان.

مەملەكەت باسشىسىنىڭ تاپسىر­ما­لارىن ورىنداۋ ماقساتىندا اگەنت­تىك مەملەكەتتىك اپپاراتتى بيۋروكرا­تيا­دان ارىلتۋ جونىندە شارالار قا­بىل­داپ, بۇل باعىتتا جۇرگىزىلگەن مونيتورينگ پەن تالداۋ ناتيجەسىندە 373 ۇسىنىس ازىرلەنگەن. بۇل ۇسىنىستار بيزنەس-ۇدەرىستەردى رەينجينيرينگتەۋ, ارتىق قۇقىقتىق رەت­تەۋدى, جوعارى تالاپتاردى الىپ تاستاۋعا, فۋنكتسيالاردى ورتالىقسىزداندىرۋعا جانە لاۋا­زىمدى تۇلعالاردىڭ دەربەس جاۋاپكەرشىلىگىن كۇشەيتۋگە باعىتتالعان.