كوپ مەكتەپتە پسيحولوگ ماماننىڭ جۇمىسى جۇيەلەنبەگەن. ءبىلىم بەرۋ مەكەمەلەرىندە مامان بولعانىمەن, ول بارلىق وقۋشىمەن تىعىز جۇمىس ىستەۋگە مۇمكىندىگى جوق. ويتكەنى ءبىر پسيحولوگ بۇكىل بالانىڭ جاي-كۇيىن جەكە-جەكە قاداعالاي المايدى. دەگەنمەن بىرنەشە جىلدان بەرى وقۋ-اعارتۋ مينيسترلىگى ءبىلىم بەرۋ ۇيىمدارىندا پسيحولوگيالىق قولداۋدى ينستيتۋتتاندىرۋ بويىنشا كەشەندى جۇمىس جۇرگىزىپ كەلەدى. مىسالى, ءبىر عانا مامانعا 500 وقۋشىنىڭ جاۋاپكەرشىلىگىن ارتۋعا بولمايتىنىن ەسكەرىپ, وسى جۇكتەمەنى ازايتۋ ماسەلەسى قاراستىرىلىپ جاتىر.
سونىمەن قاتار پسيحولوگيالىق قولداۋ قىزمەتىن كۇشەيتۋ ماقساتىندا وقۋ-اعارتۋ مينيسترلىگى بيىل تامىز ايىندا بالالاردى زورلىق-زومبىلىقتان قورعاۋ, ءسۋيتسيدتىڭ الدىن الۋ جانە ولاردىڭ قۇقىقتارى مەن سالاماتتىلىعىن قامتاماسىز ەتۋدىڭ 2023-2025 جىلدارعا ارنالعان كەشەندى جوسپارىن, سونداي-اق پەداگوگ-پسيحولوگتەر مەن الەۋمەتتىك پەداگوگتەردى دايارلاۋعا قويىلاتىن تالاپتاردى قامتيتىن «پەداگوگ» كاسىپتىك ستاندارتىن قابىلداعان بولاتىن.
«مامانداردىڭ نەعۇرلىم ءتيىمدى جۇمىس ىستەۋى ءۇشىن ءبىلىم بەرۋ ۇيىمدارىندا پسيحولوگيالىق قىزمەت ەرەجەلەرى قابىلداندى. مىندەتتى قۇجاتتاردىڭ تىزبەسى قىسقارتىلدى. 8 وڭىردە پسيحولوگيالىق قولداۋ ورتالىقتارى قۇرىلىپ, «تسيفرلىق كابينەتتى» اشۋ جوسپارلانعان. پەداگوگ-پسيحولوگتەردىڭ جۇمىس ۋاقىتى بەكىتىلىپ, وقىتۋ كۋرستارى ۇيىمداستىرىلدى. ماسەلەن, بيىل 4,5 مىڭعا جۋىق پەداگوگ-پسيحولوگ بىلىكتىلىكتى ارتتىرۋ كۋرستارىنان ءوتتى. اتالعان قادامدار بالالار اراسىنداعى كەلەڭسىز قۇبىلىستاردىڭ ۇلەسىن ازايتىپ قانا قويماي, ءپوزيتيۆتى ويلاۋدى قالىپتاستىرۋعا مۇمكىندىك بەرمەك», دەيدى وقۋ-اعارتۋ مينيسترلىگى بالالاردىڭ قۇقىقتارىن قورعاۋ كوميتەتىنىڭ توراعاسى ناسىمجان وسپانوۆا.
مينيسترلىكتىڭ مالىمەتىنشە, ءبىلىم بەرۋ باعدارلامالارىن جاڭارتۋ جانە ءبىلىم بەرۋ ۇيىمدارىندا ماماندار سانىن ارتتىرۋ جۇمىستارى جۇرگىزىلىپ جاتىر. بۇدان بولەك ەلىمىزدىڭ بارلىق وڭىرىندە پسيحولوگيالىق قىزمەت ورتالىقتارىن اشۋ جوسپارلانعان. بۇگىندە ەلىمىزدە 8 مىڭنان استام پەداگوگ-پسيحولوگ جۇمىس ىستەيدى.
«بالالاردىڭ قاۋىپسىزدىگىن قامتاماسىز ەتۋ, ولاردىڭ مەنتالدى دەنساۋلىعى مەن دامۋىن قورعاۋ, سۋيتسيدتەردى بولدىرماۋ جانە كامەلەتكە تولماعاندار اراسىندا بۋللينگتىڭ الدىن الۋ ماقساتىندا دايەكتى قادامداردى جۇزەگە اسىرۋعا ورتاق كۇش-جىگەردى بىرىكتىرۋ قاجەت. بۇگىندە بارلىق مەملەكەتتىك ورگاندى, ۇكىمەتتىك ەمەس سەكتوردى, ستەيكحولدەرلەردى, سونداي-اق اتا-انالار مەن بالالاردىڭ وزدەرىن تارتا وتىرىپ, ومىرلىك قيىن جاعدايعا تاپ بولعان وتباسىلاردى ۋاقتىلى انىقتاۋ جۇيەسىن دامىتۋ ماڭىزدى», دەيدى وقۋ-اعارتۋ ءمينيسترى عاني بەيسەمباەۆ.
كەيىنگى كەزدەرى جاسوسپىرىمدەر اراسىنداعى جانجال جيىلەپ كەتكەنى بايقالادى. بالالاردىڭ بويىنداعى قاتىگەزدىگى, وزىمشىلدىگى, ورتادان بولەكتەنۋى – قوعام دەرتى. سوندىقتان ولارعا دەر كەزىندە ءتيىستى كومەك كورسەتۋ قاجەت. وسى ورايدا وقۋ-اعارتۋ ۆيتسە-ءمينيسترى ەدىل وسپان وڭىرلەردە كامەلەتكە تولماعاندار اراسىندا قۇقىق بۇزۋشىلىقتىڭ الدىن الۋ جۇمىستارى دا قارقىندى ءجۇرىپ جاتقانىن اتاپ وتكەن ەدى.
«بۇعان دەيىن بالالاردىڭ قۇقىقتارىن قورعاۋ كوميتەتى مەكتەپ ىشىندە ەسەپكە الۋدى جۇرگىزۋدىڭ ادىستەمەلىك ۇسىنىمدارىن ازىرلەپ, بەكىتكەن بولاتىن. ولار مەكتەپتەرگە باسا نازار اۋدارۋدى جانە كومەك كورسەتۋدى قاجەت ەتەتىن بالالاردى انىقتاۋ ماقساتىندا ۇسىنىلادى. مۇندا ەسەپتە تۇرعان ءاربىر بالاعا قوسىمشا ساباق ۇيىمداستىرۋ, بالانىڭ شىعارماشىلىق, سپورتتىق الەۋەتىن اشۋ, الەۋمەتتىك جانە پسيحولوگيالىق-پەداگوگيكالىق قولداۋ كومەگى قاراستىرىلعان», دەدى ەدىل وسپان.
