اۋىلدا تۇراتىن قاراپايىم ەڭبەك ارداگەرى تۋعان جەر تاريحىنا قىزىعۋشىلىق قالاي باستالعانىن اڭگىمەلەيدى.
– ءبىزدىڭ بوكەيلىك سوۆەت بيلىگى كەزىندە ءتۇرلى قيىندىقتى كوردى عوي. ەكى مارتە قۇرىلىپ, ەكى مارتە تارادى. جەرگىلىكتى حالىق قازاقستاننىڭ 19 وبلىسىنا جانە ودان تىسقارى جەرلەرگە دە بوسىپ كەتتى. قۇم نارىننىڭ قاسيەتتى دە قاسىرەتتى تاريحىنا اۋەلدەن قىزىعىپ ءجۇرۋشى ەدىم. 2014 جىلى اۋدانعا وكىل يمام بولىپ كەلگەن مۇراتبەك قاجى جاحاتوۆ «ولكەتانۋشىلار ۇيىمىن» قۇرۋعا مۇرىندىق بولدى. ءسويتىپ, 10 جىلعا تاياۋ ۋاقىت ىشىندە 77 رەت ەكسپەديتسياعا شىعىپپىز. 45 مىڭ شاقىرىمنان اسا جول ءجۇرىپپىز. بۇل دەگەن – ەكۆاتوردى اينالىپ شىققاننان دا ارتىق قاشىقتىق قوي, – دەيدى تىنىشتىق اعا.
شىنىندا دا جەرگىلىكتى ون ادامنان قۇرىلعان جاڭاقالالىق ولكەتانۋشىلار ۇيىمى قۇم نارىننىڭ قويناۋىن ابدەن شارلاپ, تالاي ەسكى قونىستى, تاريحي جەردى, كونە زيراتتى انىقتاعان. جوعارىدان نۇسقاۋسىز, ءوز قالتالارىنان شىعارعان 10 مىڭ تەڭگەلىك جارناعا كولىك جالداپ, جانارماي الىپ, ساپارعا اتتانا بەرەتىن جانكەشتى توپتىڭ اقساقالى قابدىعالي تەكەباەۆتىڭ جاسى 90-عا تاياپ قالدى. كوپشىلىگى زەينەتكەر بولسا دا بابا تاريحى دەگەندە سەرگەك, قۇلشىنىپ تۇر. توپ جەتەكشىلەرىنىڭ ءبىرى تىنىشتىق وتەشقالي ۇلى بيىل 70-كە تولعان. قازاقستان رەسپۋبليكاسى مادەنيەت جانە اقپارات مينيسترلىگى بەكىتكەن «ۇزدىك ولكەتانۋشى» توسبەلگىسىن الىپ, رەسپۋبليكالىق فورۋمعا دا قاتىسىپ كەلدى.
«بۇگىن شىققان كىتاپ ءبىز جيناعان دەرەك-تاريحتىڭ بەستەن ءبىرى عانا. 1892 جىلى بوكەيلىكتىڭ شەجىرەسىن 12 ادام جازعان ەكەن, تۇپنۇسقاسى قولىمدا تۇر. ءبىزدى توسەكتە تىنىش جاتقىزباي جۇرگەن – كەلەر ۇرپاققا, نەمەرە-شوبەرەمىزگە قانداي ۇلگى-ونەگە قالدىرامىز؟ – دەگەن وي عوي. تۋعان جەردىڭ تاريحىن تەرەڭ بىلگەن ورەن ونى سۇيە دە بىلەدى, وتانىنىڭ پاتريوتى بولادى. ءبىزدىڭ ماقساتىمىز وسى» دەيدى اۆتور.
– كەز كەلگەن جاڭا كىتاپ – وقىرمان قازىناسى. ءبىزدىڭ كىتاپحانانىڭ تىرەگى دە تىنىشتىق وتەشقاليەۆ سىندى باستاماشىل جاندار عوي. جاس وقىرماندارىمىز جاڭا كىتاپتى وقىپ, قۇم نارىننىڭ قاسيەتىن تەرەڭ بىلە تۇسەدى دەپ ويلايمىن, – دەيدى وسى ءىس-شارانى ۇيىمداستىرۋشى, حامزا كىتاپحاناسىنىڭ جۇرتشىلىقپەن بايلانىس جانە بۇقارالىق جۇمىس ءبولىمىنىڭ باسشىسى گۇلناز حامزينا.
باتىس قازاقستان وبلىسى
