ءمينيستردىڭ ايتۋىنشا, ەلىمىزدە جاسالاتىن قىلمىستار سانىنىڭ تومەندەۋ ديناميكاسى ساقتالىپ وتىر. كىسى ءولتىرۋ 20 پايىزعا, ۇرلىق 28 پايىزعا, قاراقشىلىق 32 پايىزعا ازايعان.
سونداي-اق توناۋ, بۇزاقىلىق, مال ۇرلىعى, دەنساۋلىققا اۋىر زيان كەلتىرۋ فاكتىلەرى, سونداي-اق باسقا دا قىلمىس تۇرلەرى تومەندەگەنىن باياندادى.
قۇقىقبۇزۋشىلىققا مۇلدە توزبەۋشىلىك قاعيداتىن قالىپتاستىرۋ, زاڭعا قايشى ارەكەتتەر مەن قىلمىس جاساعانى ءۇشىن جازانىڭ بۇلتارتپاستىعىن ىسكە اسىرۋ, جول قاۋىپسىزدىگىن قامتاماسىز ەتۋ جۇمىستارى تۋرالى مالىمەت بەردى.
«بۇگىندە 8 ميلليون 500 مىڭ زاڭعا قايشى ارەكەت انىقتالعان. بۇل وتكەن جىلمەن سالىستىرعاندا 1 ميلليونعا كوپ. جاسالعان قۇقىقبۇزۋشىلىقتار ءۇشىن 90 ميلليارد تەڭگە كولەمىندە اكىمشىلىك ايىپپۇل سالىندى, 71 ميلليارد تەڭگە ءوندىرىپ الىندى», دەدى مينيستر.
ىشكى ىستەر ورگاندارىنىڭ جۇمىسىن جەتىلدىرۋ, سونىڭ ىشىندە ءىىو قىزمەتكەرلەرىن اتتەستاتسيادان وتكىزىپ, ۆەدومستۆونى لايىقسىز مامانداردان تازارتۋ شارالارى تۋرالى باياندالدى.
كەزدەسۋ سوڭىندا قاسىم-جومارت توقاەۆ «زاڭ جانە ءتارتىپ» قاعيداتىن قامتاماسىز ەتۋ جونىندە بىرقاتار ناقتى تاپسىرما بەردى. مەملەكەت باسشىسى قوعامدا ادىلدىك پەن ءتارتىپ ورناتۋ ءۇشىن قۇقىق قورعاۋ ورگاندارىنىڭ قىزمەتكەرلەرىنە ۇلكەن جاۋاپكەرشىلىك جۇكتەلگەنىن ايتتى.
