فوتو: bakhyt_khajibayev پاراقشاسىنان
مىرجاقىپ دۋلات ۇلىنىڭ ءرولىن جوعارى دەڭگەيدە سومداپ, كوپشىلىكتىڭ كوڭىلىنەن شىققان اكتەر جاڭا فيلمگە تۇسكەنىن جاريالادى. فيلم «نابات وپەراتسياسى» دەپ اتالادى.
«شىنايى وقيعاعا نەگىزدەلگەن تولىقمەتراجدى بۇل فيلم, كەلەسى جىلدىڭ باسىندا وزدەرىڭىزگە جول تارتپاق. ءوزىم ءۇشىن كەزەكتى ءبىر تاجىريبە بولدى, ۇجىمعا العىسىم شەكسىز! بۇل جولى كەيىپكەرىم قانداي بولماق؟ قالاي ويلايسىز؟», دەپ جازدى اكتەر Instagram پاراقشاسىندا.
«نابات وپەراتسياسى» ءفيلمى شىنايى وقيعاعا نەگىزدەلگەن. فيلمگە ارقاۋ بولعان وقيعا بىلاي ءوربيدى:
6 قىلمىسكەر كۇزەتشىلەردى ءولتىرىپ, 2 كالاشنيكوۆ اۆتوماتىن, 8 ماكاروۆ تاپانشاسىن, وق دارىلەرىن الىپ قاشىپ كەتەدى. ولار قىزىلوردادان سارىاعاشقا كەتىپ بارا جاتقان جولاۋشىلار اۆتوبۋسىن باسىپ الادى. قىلمىسكەرلەر اۆتوبۋستاعى ادامداردى كەپىلگە الىپ, قۇقىق قورعاۋ ورگاندارى قىزمەتكەرلەرىنەن ۇشاق پەن مول اقشا تالاپ ەتەدى. سول كەزدەگى مەملەكەتتىك قاۋىپسىزدىك قىزمەتىنىڭ ارنايى بولىمشەلەرى «نابات» وپەراتسياسىن جۇرگىزىپ, قىلمىسكەرلەردىڭ كوزىن جويادى.
1992 جىلى جۇرگىزىلگەن بۇل وپەراتسيا تاۋەلسىزدىك تاريحىندا ترانسپورتتا كەپىلدىككە الىنعان ازاماتتاردى قۇتقارۋ باعىتىنداعى العاشقىسى بولدى. «نابات» وپەراتسياسىنىڭ قۇرىلىمى شەتەلدىك قۇقىق قورعاۋ ورگاندارىنىڭ دا قىزىعۋشىلىعىن تۋدىرعان.
سول تۇستا «نابات» وپەراتسياسىنا 10 قۇقىق قورعاۋ ورگانىنىڭ قىزمەتكەرى قاتىسقان. كەيىننەن قر تۇڭعىش پرەزيدەنتى ن.نازارباەۆ ولاردى ارنايى قابىلداپ, قۇرمەت گراموتالارىمەن ماراپاتتاعان.
ءفيلمنىڭ قويۋشى رەجيسسەرى بۇعان دەيىن كورەرمەن كوزايىمىنا اينالعان «سىرعالىم», «قىزدار», «قۇستار ءانى», «سەردتسە موە - استانا» سەريالدارى مەن «قاراشاڭىراق», «ارمان», «اينا» فيلمدەرىن تۇسىرگەن - راشيد سۇلەيمەنوۆ.
قويۋشى-وپەراتورى: ەرنۇر رىسپاەۆ
ستسەناري اۆتورلارى: يلحام دجاليلوۆ, راشيد سۇلەيمەنوۆ, رۋستام ازاماتوۆ.
«نابات» وپەراتسياسىن ءتۇسىرۋشى ۇجىم فيلمگە شەتەلدىك اكتەرلەردى دە شاقىرعان. ولاردىڭ قاتارىندا رەسەيلىك جانە قازاقستاندىق اكتەر - الەكسەي شەمەس, بەلارۋسيالىق اكتەر ءارى كاسكادەر سەرگەي بىحوۆ, وزبەكستاندىق تەاتر جانە كينو اكتەرى - انۆار كارتاەۆ بار.
ال باستى رولدەردى سومداعان وتاندىق اكتەرلەر - باقىت قاجىباەۆ پەن ايگەرىم ءجۇنىسوۆا.
ش.ايمانوۆ اتىنداعى «قازاقفيلم» تۇسىرگەن فيلم جاڭا جىلدىڭ باسىندا كورەرمەنگە جول تارتادى.
