توراعا ورىنباسارى ءوز سوزىندە فينليانديا قازاقستاننىڭ ەۋروپالىق وداقتاعى ماڭىزدى ارىپتەسى بولىپ تابىلاتىنىن اتاپ ءوتتى جانە ءبىزدىڭ ەلدەرىمىزدىڭ حالىقارالىق نەگىزگى ماسەلەلەر بويىنشا كوزقاراستارى ورتاق ەكەنىن ايتا كەلىپ, بۇۇ, ەقىۇ جانە باسقا دا حالىقارالىق ۇيىمدار اياسىندا تىعىز ىنتىماقتاستىق جۇرگىزىپ كەلە جاتقانىن اتاپ ءوتتى.
«قازاقستان مەن فينليانديا اراسىنداعى پارلامەنتارالىق بايلانىستاردى دامىتۋ ەكىجاقتى كۇن تارتىبىندەگى ماڭىزدى ماسەلە بولىپ تابىلادى. سونىمەن قاتار بىزگە الداعى كەزەڭدە كوميتەتتەر دەلەگاتسيالارىنىڭ جۇمىس بايلانىستارىن تەرەڭدەتۋ جانە پارلامەنتتىك قىزمەت تاجىريبەسىن, ونىڭ ىشىندە زاڭنامالىق اكتىلەردى ازىرلەۋ جانە قابىلداۋ تاجىريبەسىن زەردەلەۋ ءۇشىن ساپار الماسۋعا بولادى. بۇل ءبىزدىڭ ەكىجاقتى ءوزارا ءىس-قيمىلىمىزعا جاڭا سەرپىن اكەلەتىنىنە سەنىمدىمىن», دەدى جاقىپ اسانوۆ.
تاراپتار كەزدەسۋ بارىسىندا قازاقستان پرەزيدەنتى قاسىم-جومارت توقاەۆتىڭ باستاماسىمەن جۇرگىزىلىپ جاتقان ساياسي جانە ەكونوميكالىق رەفورمالارعا قاتىستى ماسەلەلەردى تالقىلادى. توراعا ورىنباسارى كانتسلەرگە ەلىمىزدە جۇزەگە اسىپ جاتقان «ادىلەتتى قازاقستان» تۇجىرىمداماسى تۋرالى ايتتى. ونىڭ ماقساتى ساياسي جۇيەنى ترانسفورماتسيالاۋ جانە بارلىق سالالاردا ادىلەتتىلىك قاعيداتىن ەنگىزۋ, سونداي-اق جۇرگىزىلىپ جاتقان ساياسي جانە ەكونوميكالىق رەفورمالاردى زاڭنامالىق قامتاماسىز ەتۋدەگى پارلامەنتتىڭ ماڭىزدى ءرولىن بەلگىلەۋ بولىپ تابىلادى.
تۋوماس پويستي ءوز كەزەگىندە ەكى ەل ىنتىماقتاستىعىنىڭ ماڭىزىن جوعارى باعالادى جانە ولاردىڭ تاراپى قازاقستانمەن ءوزارا قارىم-قاتىناستى نىعايتۋ مەن دامىتۋعا دايىن ەكەنىن اتاپ ءوتتى.
