ءداستۇرلى دودادا 36 جاستاعى سەربيالىق ساڭلاقتىڭ اقتىق سىنعا دەيىن القىنباي جەتەتىنىنە كۇماندانعاندار كەمدە-كەم ەدى. سەبەبى سپورتتىڭ بۇل تۇرىندە دجوكوۆيچتىڭ باعىندىرماعان بەلەسى جوق. سونىمەن قاتار وعان كوپتەگەن رەكوردتىق كورسەتكىش تيەسىلى. دەسەك تە توپتىق تۋرنيردە ول ويدا جوقتا ياننيك سيننەردەن ۇتىلىپ, كوپشىلىكتى ءبىراز ويلاندىرىپ تاستاعان ەدى. سوعان قاراماستان نوۆاك پلەي-وففقا جولداما الىپ, جارتىلاي فينالدا يسپانيالىق كارلوس الكاراستى 6:3, 6:2 ەسەبىمەن قاپى قالدىردى. ال 22 جاستاعى يتاليا وكىلىنىڭ ەڭ ۇزدىك كورسەتكىشى – بيىل ۋيمبلدوندا ۇزدىك تورتتىكتىڭ قاتارىنان كورىنىپ, اتر تۋرنيرلەرىندە 11 مارتە توپ جارۋى. قازىرگى كەزدە الەمدىك رەيتينگتە ءتورتىنشى ساتىعا جايعاسقان سيننەر جارتىلاي فينالدا رەسەيلىك دانيل مەدۆەدەۆتى جەڭدى – 6:3, 6:7, 6:1.
شەشۋشى سايىستا قوس ساڭلاقتىڭ جولى قايتا قيىستى. توپتىق تۋرنيردەگى ساتسىزدىكتەن ساباق العان دجوكوۆيچ اقتىق سىندا سيننەردى ەش قينالماي-اق ەڭسەردى. ەسەپ – 6:3, 6:3. ءسويتىپ, سەربيالىق تەننيسشى اتر-نىڭ قورىتىندى ءتۋرنيرىنىڭ باس جۇلدەسىن جەڭىپ الدى.
