سلوۆەنيا ءوز الاڭىندا جەڭىلگەن جوق. ساراپشى پىكىرى

«ەۋروعا شىعۋ قانشالىقتى رەال بىراق؟ بيىلعى ناتيجەلەرىمىز جاقسى بولدى. جۇرتتىڭ فۋتبولعا ماحابباتى قايتا وياندى. فۋتبولشىلاردا سەنىمدىلىك پايدا بولدى. تانىمال ماڭىزدى تۇلعالار دا قولداي باستادى. ەندى تەك ءبىر قادام قالدى. سلوۆەنيانى تەك ۇتۋ كەرەك. ال ولارعا تەڭ ويىن دا جارايدى. جەڭىلىپ قالساق, كوكتەمدە ۇلتتار ليگاسى ارقىلى تاعى ءبىر شانس بولادى. وعان قالدىرماي شىققان جاقسى ارينە. بىراق رەاليست رەتىندە قارايتىن بولساق, بۇگىن جەڭۋ قيىن. سلوۆەنيا ونسىز دا كۇشتى قۇراما جانە ءوز الاڭىندا وينايدى. ۋەفا پرەزيدەنتى چەفەرين جانە تورەشى ويىندى بۇزادى دەگەنگە سەنبەيمىن. جالپى ويىن بويىنشا بىلاي دا ۇتادى ولار. ءبىزدىڭ فۋتبولشىلار بۇرىن مۇنداي فينالعا شىعىپ كورمەدى, جۇيكەلەرى سىر بەرەرى انىق. ءبىر قىزىل قاعاز ويىندى قۇرتىپ كەتۋى مۇمكىن. كوماندانىڭ ليدەرلەرى زاينۋتدينوۆ پەن تاعىبەرگەن دە جوق. باپكەر اديەۆ جىگىتتەردى قايراي الاتىن, رۋح بەرە الاتىن جاقسى پسيحولوگ سياقتى. ال بىلاي تاكتيكاسىنا كۇمانىم بار. بۇگىن دە ايىمبەتوۆتى العا جىبەرىپ, تەك دوپ لاقتىرىپ وتىراتىن ويىن قۇرمايتىن شىعار دەپ سەنگىم كەلەدى. ورتانى دا بەرىپ قويسا, بىتتىك. سلوۆەندەر پرەسسينگپەن قىسىپ تاستايدى. ءبىزدىڭ فيزيكامىز جەتپەۋى مۇمكىن. كونسەنتراتسيا ماسەلەسى دە بار ءبىزدىڭ قورعانىستا. فينليانديا مەن سان-مارينودان ءبىر ساتتىك قاتەلەردەن جىبەرگەن ەدىك. وسىلاي تولىق بەرىلە الماي قالاتىن كەزدەرىمىز بار. بۇگىن ورتا شەپتى مىعىم ۇستاپ, ولارعا كومەك بەرە الاتىن, جۇگىرەتىن سامورودوۆپەن باستاسا دەيمىن. ياعني, بۇگىن باسقا ءبىر تاكتيكامەن ويناۋلارى كەرەك, قورعانىسقا بەكىنىپ الماي.

نەگىزى كوبىنە ەموتسيامەن الىپ شىقتىق ماتچتاردى, ولاي ۇنەمى بولا بەرمەيدى. ناقتى فۋتبول ويناۋ كەرەك. ەۋروعا شىققىمىز كەلسە, سلوۆەنيا سياقتى كوماندالاردى ۇتۋىڭ كەرەك. الەم چەمپيوناتىنا شىعا المايتىنىمىز تۇسىنىكتى, سوندىقتان ءبىز ءۇشىن وسى تۋرنير ماڭىزدى. جىگىتتەر بارىن سالاتىنى جانە انىق. تەك تىم قاتتى كۇتپەي, سابىرمەن قارايىق دەيمىن», دەپ جازدى ءىت مامانى, بەلگىلى سپورت ساراپشىسى ارشات وراز. 

سلوۆەنيا – قازاقستان ماتچى ليۋبليانا قالاسىنداعى «ستوجيتسە پارك» ستاديونىندا وتەدى. كەلەسى جىلدىڭ ەنشىسىندەگى ەۋروپا چەمپيوناتىنا ىرىكتەۋ تۋرىندا بۇل ەلدىڭ ۇلتتىق قۇراماسى ءوز الاڭىندا ءالى جەڭىلىپ كورگەن جوق. دانيا قۇراماسىمەن يتجىعىس ءتۇستى (1:1), فينليانديا فۋتبولشىلارىن 3:0 ەسەبىمەن ەسەڭگىرەتتى, سولتۇستىك يرلانديا قۇراماسىن دا 4:2 ناتيجەسىمەن جەڭدى, سان-مارينو فۋتبولشىلارىن قابىلداپ, 2:0 باسىمدىعىمەن ۇتتى.