جىل سايىن وتكىزىلەتىن جوبانىڭ باستى ماقساتى – وسكەلەڭ ۇرپاقتى, ونىڭ ىشىندە وزگە ەتنوس وكىلدەرىنىڭ جاسوسپىرىمدەرى اراسىندا ەلدەگى بىرەگەيلىكتى نىعايتۋ, مەملەكەتتىك ءتىلدى مەڭگەرۋگە ىنتالاندىرۋ. سالتاناتتى ءىس-شاراعا قازاقستان حالقى اسسامبلەياسى توراعاسىنىڭ ورىنباسارى – پرەزيدەنت اكىمشىلىگى قحا حاتشىلىعىنىڭ مەڭگەرۋشىسى مارات ءازىلحانوۆ, مادەنيەت جانە اقپارات ۆيتسە-ءمينيسترى قانات ىسقاقوۆ, سەنات دەپۋتاتتارى, ەتنومادەني بىرلەستىكتەردىڭ وكىلدەرى, جاستار ۇيىمدارىنىڭ مۇشەلەرى قاتىستى.
– ءتىل تاعدىرى – ەل تاعدىرى. جوباعا تارتىلعان مىڭنان اسا ءجاسوسپىرىم قازاق ءتىلىنىڭ قولدانىس اياسىن كەڭەيتىپ, قازاقى ۇلتتىق قۇندىلىقتاردى دارىپتەپ ءجۇر. جەرىنىڭ تاريحى مەن ءتىلىن مەڭگەرىپ وسكەن ۇرپاق بولاشاقتا ەل ىرگەسىنىڭ ءبۇتىن بولىپ قالىپتاسۋىنا ىقپالداسادى. بۇل جوبا تاتۋلىقتىڭ, بىرلىكتىڭ باستاۋى. سوندىقتان وسى يگى ىسكە اتسالىسىپ, ۇلەس قوسىپ جۇرگەندەرىڭىزگە العىس بىلدىرەمىن, – دەدى مارات ءازىلحانوۆ.
«مىڭ بالا» جوباسى اياسىندا بارلىق ايماقتا جىل بويى ءتۇرلى باعىت بويىنشا قازاق ءتىلىن مەڭگەرۋگە ارنالعان 6 مىڭنان استام ءىس-شارا مەن بايقاۋ وتكىزىلگەن. وعان بيىل 320 مىڭنان اسا بالا قاتىسىپتى. قورىتىندى كەزەڭدە ۆوكال ورىنداۋشىلار, دومبىرا مەن قوبىز اسپابىندا وينايتىندار «ونەرلى ورگە جۇزەر», ال مانەرلەپ وقيتىندار مەن جاس اقىندار «جارقىرا, جاس دارىن!» اتالىمدارى بويىنشا ىرىكتەلگەن. كەيىن ۇزدىكتەر ەلوردادا باس قوستى. ءىس-شارادا مادەنيەت جانە اقپارات ۆيتسە-ءمينيسترى قانات ىسقاقوۆ مەملەكەتتىك ءتىلدى ەتنوسارالىق قارىم-قاتىناس ءتىلى رەتىندە ىلگەرىلەتۋدىڭ ماڭىزىنا توقتالدى.
– كەيىنگى جىلدارى وزگە ەتنوس وكىلدەرىنىڭ قازاق ءتىلىن مەڭگەرۋگە دەگەن قۇشتارلىعى ارتىپ كەلەدى. مەملەكەتتىك ءتىلدى مەڭگەرۋدە ايرىقشا ىنتا-ىقىلاس تانىتىپ, ءتىل بىلگەنىنىڭ ارقاسىندا بيىك بەلەستەردەن كورىنىپ ءجۇر. وسى ورايدا مەملەكەت تاراپىنان قازاق ءتىلىن ۇيرەنەمىن دەۋشىلەرگە بارلىق جاعداي جاسالعان. ءتۇرلى كىتاپ, جيناقتار مەن بەينەجازبالار كوپكە قولجەتىمدى. مينيسترلىك الەۋمەتتىك جەلىلەردە ەتنوسارالىق تاقىرىپقا قاتىستى ساپالى قازاق ءتىلدى كونتەنتتى دامىتۋعا, ءتۇرلى الەۋمەتتىك-مادەني توپتاردىڭ جاستارى ءۇشىن بىرىڭعاي مادەني كەڭىستىكتى قالىپتاستىرۋعا باعىتتالعان جوبالاردى قولعا الىپ, جۇيەلى ىسكە اسىرىپ جاتىر. سونىڭ ءبىرى – «مىڭ بالا» جوباسى, – دەدى ۆيتسە-مينيستر.
جەڭىمپازدار اراسىندا «جارقىرا, جاس دارىن!» اتالىمى بويىنشا استانا قالاسىنان پولينا مارتالەر, الماتى قالاسىنان شاحمينا تۋرگانوۆا, شىمكەنت قالاسىنان دۋردانا ابدۋراحمانوۆا, اباي وبلىسىنان الەكساندار دۋدەنكو, اقمولا وبلىسىنان البينا ازات, اقتوبە وبلىسىنان اناستاسيا لىمار, باتىس قازاقستان وبلىسىنان امير يسەمباەۆ, جامبىل وبلىسىنان سايد ايدەنوۆ, جەتىسۋ وبلىسىنان كارينا سيومكينا, سولتۇستىك قازاقستان وبلىسىنان ايسۋن اسلانوۆا جۇزدەن جۇيرىك دەپ تانىلدى. ال «ونەرلى ورگە جۇزەر» اتالىمىندا وزىق بولعاندار قاتارىندا سولتۇستىك قازاقستان وبلىسىنان نيكيتا سكوبا, تۇركىستان وبلىسىنان ديلنوزا تادجيمەت, ۇلىتاۋ وبلىسىنان كسەنيا گاپونەنكو جانە يلنار سابيرجانوۆ, پاۆلودار وبلىسىنان الەكساناد تاراسەنكو, ماڭعىستاۋ وبلىسىنان سافيا امانگاليەۆا بار. ولار ءىس-شارادا قازاق اقىندارىنىڭ تۋىندىلارىن مانەرلەپ وقىپ, مادەنيەت قايراتكەرلەرىنىڭ مۋزىكالىق شىعارمالارىن ناقىشىنا كەلتىرە ورىندادى. سونداي-اق ونەرپازدار وزدەرى شىعارعان ولەڭدەرىن جينالعان قاۋىمعا پاش ەتتى. ءىزباسارلارىنا «مىڭ بالا» جوباسىنىڭ 2015 جىلعى جەڭىمپازى, سەنات دەپۋتاتى گەننادي شيپوۆسكيح يگى تىلەگىن جەتكىزدى.
– مەملەكەت باسشىسى قاسىم-جومارت توقاەۆ قازاقستان حالقىنا العاشقى جولداۋىندا «قازاق ءتىلى – ۇلتارالىق قاتىناس تىلىنە اينالۋى كەرەك» دەپ اتاپ كورسەتتى. پرەزيدەنت تاپسىرماسى نەگىزىندە كۇنى بۇگىنگە دەيىن قحا ءبىراز ءىس-شارانى ۇيىمداستىردى. مەملەكەتتىك ءتىلدىڭ مارتەبەسى قاشاندا بيىكتە. استانا تورىندە رەسپۋبليكانىڭ تۇكپىر-تۇكپىرىنەن جيىلىپ, وزگە ۇلت وكىلدەرىنىڭ قازاق تىلىندە سايراۋى سونىڭ ايقىن كورىنىسى. جەتكىنشەكتەردىڭ مەرەيى ۇستەم, بولاشاقتارى جارقىن بولسىن, – دەدى ول.
