primeminister.kz
ۇكىمەتتە وتكەن كەڭەستە ءاليحان سمايىلوۆتىڭ 6 قازاندا شىعىس قازاقستان وبلىسىنا جۇمىس ساپارى كەزىندە بەرگەن تاپسىرمالارىن ورىنداۋعا قاتىستى شارالار قوزعالدى.
«ورتالىق مەملەكەتتىك ورگاندار مەن اكىمدىك باسشىلارىنىڭ قاتىسۋىمەن وبلىستاعى قاندىسۋ جانە ۇيدەنە سۋ قويمالارىن, سونداي-اق ءوڭىردىڭ سۋارمالى جەرلەرىندەگى شارۋاشىلىقارالىق جانە شارۋاشىلىقىشىلىك كانالداردى كۇردەلى جوندەۋ ماسەلەلەرى تالقىلاندى. پرەمەر-مينيستر جالپى رەسپۋبليكا بويىنشا كوپتەگەن سۋ قويمالارىن كۇردەلى جوندەۋ قاجەت ەكەنىن, سوندىقتان بۇل جۇمىستى كەزەڭ كەزەڭىمەن جۇرگىزۋ كەرەكتىگىن اتاپ ءوتتى. ەڭ الدىمەن, باسىم جوبالارعا باسا نازار اۋدارۋ كەرەك», دەلىنگەن اقپاراتتا. كەڭەس بارىسىندا بۇقتىرما سۋ قويماسى ارقىلى كوپىر سالۋ, رەسپۋبليكالىق جانە جەرگىلىكتى ماڭىزى بار كۇرە جولدارعا جوندەۋ جۇمىستارىن جۇرگىزۋ, تۋريستىك نىساندارعا كەلۋشىلەرگە جاعداي جاساۋ ءۇشىن جول ينفراقۇرىلىمىن ىسكە اسىرۋ ماسەلەسى دە تالقىلاندى.
ۇكىمەت مۇشەلەرى «التاي» كوتەرمە-تاراتۋ ورتالىعى, ريددەر قالاسىنداعى ەمحاناسى بار كوپسالالى اۋرۋحانا كەشەنىن سالۋدىڭ جايىن دا تالقىلادى. تاۋ-كەن مەتاللۋرگيا كەشەنىنە ينۆەستورلار تارتۋ, قولدانىستاعى سۋ ەلەكتر ستانسالارىن جاقسارتۋ جانە جاڭا شاعىن ستانسالار سالۋ, جىلۋ كوزدەرىندەگى جوندەۋ جۇمىستارىنىڭ بارىسىن باقىلاۋدى قامتاماسىز ەتۋ جانە باسقا دا بىرقاتار ماسەلەنىڭ جايى ايتىلدى. ۇكىمەت باسشىسى وسى جوبالاردىڭ ۋاقىتىندا ورىندالۋىن قاداعالاۋ قاجەتتىگىن ەسكەرتتى.
«مۇددەلى مەملەكەتتىك ورگاندارمەن بىرلەسىپ, مارقاكول جانە كاتونقاراعاي اۋداندارىن قالپىنا كەلتىرۋ جۇمىستارىن قامتاماسىز ەتۋدى تاپسىرامىن. اكىمدىكپەن بىرلەسىپ, تاپسىرمالاردىڭ بارلىعىن ۋاقتىلى ءارى ساپالى ورىنداۋ ءۇشىن ۆەدومستۆوارالىق ءوزارا ءىس-قيمىلدى كۇشەيتۋ قاجەت», دەدى ءا.سمايىلوۆ.
