«قازاقستان حالقىنىڭ سانى 20 ميلليونعا جەتتى» دەگەن قۋانىشتى حاباردى ۇلتتىق ستاتيستيكا بيۋروسى, دەنساۋلىق ساقتاۋ مينيسترلىگى, ەڭبەك جانە حالىقتى الەۋمەتتىك قورعاۋ مينيسترلىگى مەن وتباسى بانكى وكىلدەرى بىرلەسە وتكىزگەن بريفينگ بارىسىندا حابارلادى.
«ەل تاريحىنداعى ەرەكشە ءسات – 20 ميلليونىنشى ازاماتتىڭ دۇنيەگە كەلۋىن اتاپ وتۋدەمىز. بۇل كۇن ءبارىمىز ءۇشىن ماڭىزدى. ءبىز ولارعا ارقايسىسى 2 ملن تەڭگە نومينالدى قۇنى بار سىيلىق سەرتيفيكاتتارىن سىيلايمىز. بۇل جاي عانا سىيلىق ەمەس, ول بۇگىننەن باستاپ بۇلدىرشىندەرىمىزگە جارقىن بولاشاق قۇرۋعا ۇلكەن مۇمكىندىك بەرەدى», دەدى ءلاززات ەركىنقىزى.
سونىمەن قاتار باسقارما باسشىسى بالالارعا ارنالعان دەپوزيتتەردىڭ سانى ارتقانىن ايتىپ, ناقتى دەرەكتەر كەلتىردى.
«وتباسى بانكىندە بالالارعا ارنالعان 300 مىڭعا جۋىق دەپوزيت بار. 5 جاسقا دەيىنگى بالالارعا 50 مىڭنان استام جيناق شوتتارى اشىلدى. ال 1 جاسقا دەيىنگى ەڭ كىشكەنتاي سالىمشىلارىمىزدىڭ اتىنا اشىلعان 12 700 دەپوزيت بار», دەدى وتباسى بانك باسشىسى.
ەلىمىزدەگى ءاربىر وتباسىنىڭ, قازىرگى جانە بولاشاق ۇرپاقتىڭ ءال-اۋقاتىنا وڭ اسەرىن تيگىزەتىن تاعى ءبىر ماڭىزدى جايت – «ۇلتتىق قور – بالالارعا» بىرەگەي جوباسىن رەسمي تۇردە ىسكە قوسۋ تۋرالى «قازاقستان رەسپۋبليكاسىنىڭ كەيبىر زاڭنامالىق اكتىلەرىنە قازاقستان رەسپۋبليكاسىنىڭ ۇلتتىق قورىنان بالالارعا تولەم جاساۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» قازاقستان رەسپۋبليكاسىنىڭ زاڭىنا مەملەكەت باسشىسىنىڭ قول قويۋى. جوبانىڭ نەگىزگى ماقساتى – ۇلتتىق قوردىڭ جىلدىق ينۆەستيتسيالىق كىرىسىنىڭ 50 پايىزىن بالالار 18 جاسقا تولعانعا دەيىن مەرزىمىنەن بۇرىن الۋ قۇقىعىنسىز ماقساتتى جيناق شوتتارىنا اۋدارۋ ارقىلى بالالارعا قولداۋ كورسەتۋ.
«2024 جىلدىڭ اقپان ايىنان باستاپ 18 جاسقا تولعان جوبانىڭ العاشقى قاتىسۋشىلارى ءوز تولەمىن الادى. الىنعان جيناقتى – تۇرعىن ءۇي الۋعا جانە بىلىمگە جۇمساۋعا بولادى. وتباسى بانك بۇل جوباعا ۋاكىلەتتى وپەراتورلاردىڭ ءبىرى رەتىندە قاتىسادى. بۇل باعىتتا بىزدە ۇلكەن تاجىريبە بار, ءتىپتى جوبانى قاشىقتان, ونلاين رەجيمىندە جۇزەگە اسىرۋعا دايىن پلاتفورما دا جۇمىس ىستەپ تۇر. ول enpf-otbasy.kz دەپ اتالادى. ميلليونعا جۋىق ادام وسى پلاتفورمانى پايدالانىپ, كەزەكتە تۇرماي, ارتىق ابىگەرسىز نىسانالى ماقساتقا قولدانىپ كەلەدى. پلاتفورما كومەگىمەن جوباعا قاتىسۋشىلار وزدەرىنىڭ جيناقتارىن بەلگىلى ماقساتتارعا باعىتتاي الادى», دەدى ءلاززات ەركىنقىزى.
