باسقوسۋدىڭ اشىلۋىندا تۇركى اكادەمياسىنىڭ پرەزيدەنتى شاھين مۇستافاەۆ, Tۇركيانىڭ قازاقستانداعى توتەنشە جانە وكىلەتتى ەلشىسى Mۇستافا كاپۋدجۋ, ل.گۋميلەۆ اتىنداعى ەۋرازيا ۇلتتىق ۋنيۆەرسيتەتى باسقارما مۇشەسى – عىلىم, كوممەرتسيالاندىرۋ جانە ينتەرناتسيونالداندىرۋ جونىندەگى پرورەكتورى جاننا قۇرمانعاليەۆا, قر سىرتقى ىستەر مينيسترلىگىنىڭ ەرەكشە تاپسىرمالار جونىندەگى ەلشىسى وڭتالاپ وڭالبەك ۇلى, تۇرىك تاريحى قوعامىنىڭ قۇرمەتتى مۇشەسى, حالىقارالىق وسمانلى زەرتتەۋلەرى كوميتەتىنىڭ باسقارما كەڭەسىنىڭ مۇشەسى پروفەسسور يلبەر ورتايلى, ن.نازارباەۆ ۋنيۆەرسيتەتىنىڭ قازاق ءتىلى جانە تۇركىتانۋ كافەدراسىنىڭ مەڭگەرۋشىسى يۋلاي شاميلوعلۋ ءسوز سويلەدى. سونىمەن قاتار كونفەرەنتسيا جۇمىسىنا ديلوماتيالىق ميسسيا قىزمەتكەرلەرى, قوعام جانە مەملەكەت قايراتكەرلەرى, زيالى قاۋىم وكىلدەرى مەن تۇركولوگ-عالىمدار قاتىستى.
جيىندا ءسوز العان اكادەميا باسشىسى ش.مۋستافاەۆ تۇركيا رەسپۋبليكاسىنىڭ 100 جىلدىعى ماڭىزدى تاريحي بەلەس ەكەنىنە توقتالىپ, بۇگىندە تۇركى ىنتىماقتاستىعى اياسىندا باۋىرلاستىق بايلانىستارىن نىعايتا تۇسكەن تامىرلاس مەملەكەتتەر ءۇشىن ۇلكەن مۇمكىندىكتەر اشىلعانىن ايتتى.
«تۇركى الەمىنىڭ گەوساياسات پەن گەوەكونوميكا تۇرعىسىنان ماڭىزى بىرتە-بىرتە ارتىپ كەلەدى. تۇراقسىزدىق كۇشەيىپ جاتقان الاساپىران الەمدە تۇركى الەمىنىڭ بەيبىتشىلىك پەن وركەندەۋ ايماعىنا اينالۋ مۇمكىندىگى وتە جوعارى. الداعى كەزەڭدە تۇركى الەمىنىڭ ءوزارا كەلىسىمگە بەرىك, باۋىرلاستىق بايلانىسقا بەكەم, مىزعىماس دوستىق قاتىناسقا نەگىزدەلگەن, قاۋىپسىزدىك پەن تۇراقتىلىق ساقتالعان ايماق بولۋىن تىلەيمىز», دەدى ش. مۇستافاەۆ.
ءوز كەزەگىندە تۇركيا رەسپۋبليكاسىنىڭ قازاقستان رەسپۋبليكاسىنداعى توتەنشە جانە وكىلەتتى ەلشىسى مۇستافا كاپۋدجۋ بيىل 3 قاراشادا استانادا وتكەن تۇركى مەملەكەتتەرى ۇيىمىنىڭ مەرەيتويلىق ح ءسامميتىنىڭ جوعارى دەڭگەيدە وتكەنىن جانە باسقوسۋ ىنتىماقتاستىقتىڭ جاڭا كەزەڭىنە بەتبۇرىس بولعانىن اتاپ ءوتتى. سونىمەن قاتار ەلشى تۇركيانىڭ 100 جىلدىعىنا ارنالعان اتالعان ءىس-شارانى ۇيىمداستىرعان تۇركى اكادەمياسى مەن ل.گۋميلەۆ اتىنداعى ەۋرازيا ۇلتتىق ۋنيۆەرسيتەتىنە العىسىن ءبىلدىردى.
سىرتقى ىستەر مينيسترلىگىنىڭ ەرەكشە تاپسىرمالار جونىندەگى ەلشىسى وڭتالاپ وڭالبەك ۇلى تۇركيا جۇرتشىلىعىن عاسىرلىق مەرەيتويىمەن قۇتتىقتاي كەلە, تۇركيانىڭ جەتىستىكتەرى — بۇكىل تۇركى الەمىنىڭ ماقتانىشى ەكەنىنە توقتالدى.
كونفەرەنتسيانىڭ قۇرمەتتى قوناعى يلبەر ورتايلى تۇركى حالىقتارى اراسىندا مادەني بايلانىستى تەرەڭدەتۋدىڭ ماڭىزدىلىعىنا, ينتەگراتسيانى نىعايتۋ بارىسىندا مادەني ىنتىماقتاستىقتىڭ ماڭىزى زور ەكەنىنە توقتالدى.
جيىن اياسىندا تۇركى اكادەمياسى بەلگىلى تۇرىك تاريحشىسى افەت يناننىڭ «كەمال اتاتۇرىكتى ەسكە العاندا» اتتى كىتابىنىڭ تۇساۋكەسەر ءراسىمى ءوتتى. جاڭا كىتاپتا تۇرىك زيالى قاۋىمىنىڭ كورنەكتى وكىلى افەت ينان حانىمنىڭ تۇركى الەمىنىڭ ۇلى قايراتكەرى, تۇركيا رەسپۋبليكاسىنىڭ نەگىزىن قالاۋشى مۇستافا كەمال اتاتۇرىك تۋرالى ەستەلىكتەرى مەن ويلارى جيناقتالعان. ايتا كەتۋ كەرەك, كىتاپتى اكادەميا تۇڭعىش رەت قازاق تىلىنە اۋدارىپ جارىققا شىعارىپ وتىر.
بۇدان كەيىن تۇركيادان ارنايى كەلگەن پروفەسسور ي.ورتايلىنىڭ تۇرىك تاريحىن زەرتتەۋ باعىتتارى بويىنشا لەكتسياسى ءوتتى.
كونفەرەنتسيا سوڭىندا پروفەسسور يلبەر ورتايلىعا تۇركى الەمىنىڭ ىنتىماقتاستىعىن ارتتىرۋداعى ۇلەسى ءۇشىن تۇركى اكادەمياسىنىڭ ارنايى مەدالى تابىستالىپ, ل.گۋميلەۆ اتىنداعى ەنۋ ۋنيۆەرسيتىنىڭ قۇرمەتتى پروفەسورى اتاعى بەرىلدى.
