اتاۋلى كۇن ءارتۇرلى ەلدەردە مەترولوگيالىق ستاندارتتاردىڭ بىرلىگىن قامتاماسىز ەتۋگە باعىتتالعان. سونداي-اق الەمدەگى قولدانىستاعى ەڭ ەسكى حالىقارالىق شارتتاردىڭ ءبىرى سانالاتىن 1875 جىلعى پاريج مەتر كونۆەنتسياسىنىڭ قابىلدانۋىنا ارنالعان.
كوميسسيا وتىرىسىندا ءسوز سويلەگەن قازاقستاننىڭ يۋنەسكو جانىنداعى تۇراقتى وكىلى اسقار ابدراحمانوۆ ۇيىمعا مۇشە مەملەكەتتەرگە وسى باستامانى قولداعاندارى ءۇشىن ريزاشىلىعىن ءبىلدىردى.
ونىڭ ايتۋىنشا, مەترولوگتار قاۋىمداستىعىنىڭ كاسىبي مەرەكەسىنە بۇۇ دەڭگەيىندە حالىقارالىق مارتەبە بەرۋ بۇكىل الەمدەگى ادامداردىڭ كۇندەلىكتى ومىرىنە كوپ جاعدايدا كورىنبەسە دە ءىس جۇزىندە زور ىقپال ەتەتىن وسى ماڭىزدى عىلىم سالاسىنىڭ جوعارى بەدەلىن ودان ءارى نىعايتادى دەگەن تۇسىنىككە سۇيەنە وتىرىپ, قازاقستان وسىنداي قارارعا باستاماشىلىق ەتكەن.
ء«بىز قازاقستاندا بيىل ەلىمىزدەگى العاشقى مەترولوگيالىق مەكەمەنىڭ 100 جىلدىعىن اتاپ وتكەن جانە وسى عىلىمدى ۇلتتىق, وڭىرلىك جانە جاھاندىق دەڭگەيدە دامىتۋعا ءوزىنىڭ لايىقتى ۇلەسىن قوسىپ كەلە جاتقان مەترولوگتاردىڭ مىقتى كاسىبي قوعامداستىعىنىڭ بەلسەندىلىگىن ماقتان تۇتامىز», دەپ اتاپ ءوتتى وتاندىق ديپلومات.
ۇيىمعا مۇشە 43 مەملەكەت ەلىمىز باستاماشىلىق ەتكەن قاراردىڭ بىرلەسكەن اۆتورى اتاندى.
حالىقارالىق مەترولوگيالىق قوعامداستىق اتىنان وتىرىستا دۇنيەجۇزىلىك سالماق جانە ولشەم بيۋروسىنىڭ ديرەكتورى مارتين ميلتون ءسوز سويلەپ, قازاقستان مەن يۋنەسكو-عا مۇشە مەملەكەتتەرگە 2025 جىلى مەتر كونۆەنتسياسىنىڭ 150 جىلدىعىن مەرەكەلەۋ قارساڭىندا مەترولوگيانى دامىتۋدىڭ ماڭىزدىلىعىنا بۇكىل الەمدە قوسىمشا نازار اۋدارۋعا مۇمكىندىك بەرەتىن قۇندى باستاماسى مەن قابىلدانعان شەشىمى ءۇشىن العىس ءبىلدىردى.
