چەمپيوناتقا قاتىسقانداردىڭ قاراسى كوپ. فينالعا ەلىمىزدىڭ 20 وڭىرىنەن كەلگەن 214 قاتىسۋشى اۋەلى 4 مىڭنان استام ادامنىڭ اراسىنان ىرىكتەلىپ الىنعان. وسىعان قاراپ-اق, ەلىمىزدە روبوتتەحنيكا سالاسىنا قىزىعۋشىلىقتىڭ جوعارى ەكەنىن بايقاۋعا بولادى. ال وسى سپورتتىق روبوتتەحنيكا چەمپيوناتى 2016 جىلدان بەرى وتكىزىلىپ كەلەدى.
ەلىمىزدىڭ تۇكپىر-تۇكپىرىندە كوكتەمنەن باستاپ ىرىكتەۋ كەزەڭدەرى ءوتىپ, 5 قاراشادا استانا قالاسىندا وبلىستار مەن مەگاپوليستەردىڭ كوماندالارى باسىن قوسقان فينال بولدى. چەمپيوناتقا اۋىل بالالارى, اۋلا كوماندالارى, جەكە روبوتتەحنيكا مەكتەپتەرى, مامانداندىرىلعان ليتسەيلەر مەن كوللەدجدەر قاتىستى. بايقاۋدا ۇلتتىق سپورت تۇرلەرى مەن ويىندارىنان جارىسقان روبوتتاردى ازىرلەۋشىلەر باسقارىپ وتىردى.
ء«بىزدىڭ ۇيىم قوعامدىق قاعيدالارعا نەگىزدەلگەن جانە قىزمەتىمىز ءۇشىن قارجىلىق وتەماقى المايمىز. ءبىزدىڭ جۇمىسىمىزدىڭ نەگىزگى ماقساتى – عىلىمي-تەحنيكالىق شىعارماشىلىقتى كەڭىنەن ناسيحاتتاۋ جانە بالالار مەن جاستار اراسىندا ينجەنەرلىك ماماندىقتاردىڭ بەدەلىن ارتتىرۋ. سونىمەن قاتار ءبىز ينجەنەريا سالاسىنداعى وزەكتى ماسەلەلەردى شەشۋدە جانە زاماناۋي تەحنولوگيامەن جۇمىس جاساۋدا العان ءبىلىمىمىزدى تاجىريبەدە قولدانۋعا مۇمكىندىك بەرەمىز. ءبىز ينفورماتيكا مۇعالىمدەرىنىڭ بىلىكتىلىگىن ارتتىرۋمەن دە اينالىسامىز, سەبەبى روبوتتەحنيكانى وقىتۋدا باستى جاۋاپكەرشىلىك سول كىسىلەرگە جۇكتەلگەن. ايتا كەتەرلىگى, ءبىزدىڭ بارلىق ءىس-شارالارىمىز دەمەۋشىلەردىڭ قولداۋىنىڭ ارقاسىندا ءوتىپ جاتىر», دەدى «قازروبوتيكس» وتاندىق ءبىلىم بەرۋ جانە سپورتتىق روبوتتەحنيكا فەدەراتسياسىنىڭ پرەزيدەنتى ايجان جەكەەۆا.
ۇيىمداستىرۋشىلاردىڭ ايتۋىنشا, بارلىق تاپسىرمانى NatRoboCom روبوسپورتىنىڭ ۇلتتىق تۇرلەرىن دامىتۋ قوزعالىسى مەن «قازروبوتيكس» فەدەراتسياسى مۇشەلەرى ازىرلەگەن. تەحنيكالىق رەگلامەنتتەر جىلدامدىق پەن دالدىك بويىنشا كونكۋرستىق فورماتتا ورىنداۋ ءۇشىن وقۋ روبوتتارىنىڭ ۇلگىلەرىن قۇرۋ جانە باعدارلامالاۋ داعدىلارىن انىقتاۋدى ەسكەرە وتىرىپ ازىرلەنگەن.
«چەمپيونات يننوۆاتسيالار مەن وزىق تەحنولوگيالارعا قىزىعۋشىلىقتى ارتتىرۋعا, سونداي-اق دارىندى جاستاردى انىقتاپ, قولداۋعا سەپتىگىن تيگىزەدى. بۇل جارىس الەمدىك ستاندارتتارعا جانە وليمپيادالار مەن چەمپيوناتتاردىڭ ەرەجەلەرىنە سايكەس وتكىزىلەتىن سپورتتىق جارىستارعا ۇقسايدى, بىراق قاتىسۋشىلار – ادامدار باسقاراتىن روبوتتار. مۇنداي بايقاۋلار ەلىمىزدى جوعارى بىلىكتى عىلىمي-تەحنيكالىق كادرلاردىڭ جاڭا لەگىمەن قامتاماسىز ەتۋگە كومەكتەسەتىنىنە سەنىمدىمىز», دەدى Astana Hub ءبىلىم بەرۋ باعدارلامالارى كەڭسەسىنىڭ ديرەكتورى داۋلەت بەيمۋرزينوۆ.
چەمپيونات اياسىندا روبوتتەحنيكانى دامىتۋ ماسەلەلەرىنە ارنالعان دوڭگەلەك ۇستەل ۇيىمداستىرىلىپ, ساراپشىلار ءسوز سويلەپ, فەدەراتسيانىڭ ايماقتىق وكىلدەرى ءوز تاجىريبەلەرىن ءبولىستى. جەڭىمپازدار Astana IT Unversity الاڭىندا سالتاناتتى تۇردە ماراپاتتالدى.
ايتا كەتەيىك, KazRoboSport-2023 سپورتتىق روبوتتەحنيكاسى بويىنشا رەسپۋبليكالىق چەمپيوناتتىڭ ۇيىمداستىرۋشىسى – «قازروبوتيكس» قازاقستان ءبىلىم بەرۋ جانە سپورتتىق روبوتتەحنيكا فەدەراتسياسى. ال بايقاۋعا Astana Hub حالىقارالىق تەحنوپاركى دەمەۋشىلىك ەتتى.
