جاقىپ اسانوۆ ءوز سوزىندە مەملەكەت باسشىسىنىڭ ەلوردانى دامىتۋ ماسەلەلەرى جونىندەگى كەڭەستە استانانى كوگالداندىرۋ ىسىندە ماسەلەلەر بار ەكەنىن ايتا كەلىپ, جۇمىس ادىستەرىن وزگەرتۋ قاجەتتىگىنە توقتالعانىن ەسكە سالدى.
«بۇل ماسەلەنى زەردەلەگەندە بىرنەشە اۋقىمدى ماسەلە بايقالدى. ولاردىڭ ىشىندە ەكى نەگىزگى ءارى ەڭ وزەكتى ماسەلەنى ەرەكشە اتاپ وتۋگە بولادى. ءبىرىنشىسى – سۋ تاپشىلىعى. مامانداردىڭ پىكىرىنشە, ونى شەشۋدىڭ ەڭ ءتيىمدى جانە ۇتىمدى ءادىسى – قۇبىر سۋىن پايدالانۋ. قۇبىرداعى سۋدا تەك تابيعي سۋ عانا ەمەس, سونىمەن قاتار اعىن سۋ دا بار. ونى قايتا وڭدەۋگە جانە بارىنشا پايدالانۋعا بولادى. اعاش وتىرعىزۋ جۇمىستارى باسەكەلەس ورتاعا بەرىلدى. مەملەكەتتىك ساتىپ الۋدا كىم جەڭىسكە جەتسە, سول اعاش وتىرعىزادى. مۇنداعى ەڭ ماڭىزدى ولشەم – باعا. كونكۋرستاردا جەڭىسكە جەتكەن كومپانيالار ارزانعا ساتىپ الىنعان كوشەتتەردى وتىرعىزىپ, كەتىپ قالادى. ولار اعاشتىڭ بولاشاعىنا الاڭدامايدى. بۇل ماسەلە دە ماڭىزدى», دەدى جاقىپ اسانوۆ
ەكولوگيا جانە تابيعي رەسۋرستار مينيسترلىگىنىڭ وكىلدەرى سەناتورلارعا جاسىل ەلوردانىڭ جاي-كۇيى جانە وسى ەرەكشە جوبانى ودان ءارى دامىتۋ جوسپارى تۋرالى ايتىپ بەردى. ال استانا قالاسى اكىمدىگىنىڭ باسشىلىعى قالانى كوگالداندىرۋ سالاسىنىڭ وزەكتى ماسەلەلەرى جانە ولاردى شەشۋ جولدارىمەن ءبولىستى.
كەزدەسۋگە پارلامەنت سەناتىنىڭ دەپۋتاتتارى, ەكولوگيا جانە تابيعي رەسۋرستار ءمينيسترى ەرلان نىسانباەۆ, استانا قالاسىنىڭ اكىمى جەڭىس قاسىمبەك, مۇددەلى مەملەكەتتىك ورگانداردىڭ وكىلدەرى جانە استانا قالاسى ءماسليحاتىنىڭ دەپۋتاتتارى قاتىستى.
دەپۋتاتتار كەزدەسۋ قورىتىندىسى بويىنشا ۇسىنىمدار ازىرلەنىپ, الداعى ۋاقىتتا ۇكىمەتكە جىبەرىلەتىنىن اتاپ ءوتتى.
